Мереке кезінде iPhone-ға сұраныс артады — Apple
Apple мереке көп болатын ең маңызды ағымдағы тоқсанға оптимистік болжам жасады. Осыдан кейін акциясы постмаркеттегі құлдыраудан тез қалпына келіп, 4%-дан астам қымбаттай бастады.
Егжей-тегжейлі
Apple ағымдағы тоқсандағы (2026 қаржы жылының алғашқы тоқсаны) табысы 2024 жылдың сәйкес кезеңімен салыстырғанда 10–12% өседі деп күтеді, деп жазды Financial Times компанияның қаржы директоры Кеван Парехқа сілтеме жасап. Басылымның мәліметінше, Apple осы тоқсанда iPhone сатылымы екі таңбалы өсім көрсетеді деп болжап отыр.
FT атап өткендей, Apple болжамы Уолл-стриттің күткенінен жақсырақ болды — сарапшылар табыс тек 6% өседі деп болжаған. Компанияның бас директоры Тим Кук есеп жарияланғаннан кейінгі конференц-қоңырау кезінде алғыс айту күні мен Рождествоға сәйкес келетін тоқсандағы сатылымдар Apple мен iPhone тарихындағы ең жоғары көрсеткішке жетеді деп мәлімдеді, деді Bloomberg.
Бірінші тоқсан — жаңа iPhone 17 және iPhone Air модельдерінің толық сатылым кезеңін қамтитын алғашқы тоқсан болмақ. Бұған дейінгі есептік мерзімге бұл құрылғылардың нарыққа шыққан алғашқы екі аптасы ғана кірген. Apple өнімдеріне жоғары сұраныс компания акциясының рекордтық деңгейге жетуіне, ал оның капитализациясының алғаш рет $4 трлн межесінен асуына себеп болды.
Apple қалай есеп берді?
2025 қаржы жылының төртінші тоқсанында (27 қыркүйекте аяқталды) Apple компаниясының табысы жылдық мәнде 8% өсіп, $102,47 млрд болды. Сарапшылар $102,24 млрд болжап еді, деп хабарлады CNBC LSEG деректеріне сүйеніп. Түзетілген бір акцияға шаққандағы пайда $1,85-ға жетті — бұл 13%-дық өсім. Бұл көрсеткіш Уолл-стрит болжамынан ($1,77) жоғары болды, деп жазды Bloomberg.
Дегенмен iPhone сатылымы сарапшылар күткеннен төмен болды — $49,02 млрд, ал болжам $50,19 млрд болатын, деп хабарлады CNBC. Соған қарамастан, iPhone компанияның ең танымал өнімі болып қалуда. Табыстың екінші көзі — сервистер ($28,75 млрд). Үшінші орында — киілетін құрылғылар (Apple Watch сағаттары мен Vision Pro шлемі), үйге арналған құрылғылар (HomePod колонкалары) және аксессуарлар — $9 млрд. Mac компьютерлерінің сатылымы $8,73 млрд, ал iPad планшеттері — $6,95 млрд болды.
Сервистер, киілетін құрылғылар және Mac сатылымының күткеннен жоғары болуы Apple-ға Қытайдағы баяулауды өтеп алуға көмектесті, деп жазды Bloomberg. Компания үшін АҚШ-тан кейінгі ең маңызды нарық саналатын Қытайда табыс 3,6% азайып, $14,49 млрд болды. Сарапшылар $16,4 млрд күтті: бұл көрсеткіш Apple Қытай нарығындағы позициясын жоғалтып жатқан болуы мүмкін деген алаңдаушылықты күшейтті. Еуропадағы табыс $28,7 млрд, ал АҚШ нарығындағы табыс $44,19 млрд құрады.
Акция ахуалы
Apple акциясы есептілік жарияланғаннан кейін кеңейтілген саудада алғашында шамамен 1% төмендеді. Алайда, көп ұзамай тренд өзгеріп, қағаз 5% өсе бастады. Негізгі сауда қорытындысы бойынша бағасы 0,63%көтеріліп, $271,4 деңгейінде жабылды — бұл компания акциясы үшін рекордтық көрсеткіш болды.
2025 жылдың басынан бері Apple қағазы 8,4% қымбаттады (30 қазандағы постмаркеттегі өсімді есептемегенде). MarketWatch дерегінше, компания акциясына жалпы 53 сараптамалық рейтинг берілген, олардың ішінде ең танымал рейтинг — «сатып алу» (24 Buy және 8 Overweight). Сонымен қатар, «ұстап тұру» (Hold) — 16, ал «сату» (3 Sell және 2 Underweight) — 5 сарапшы кеңес берді. Орташа мақсатты баға — $257,06, бұл 30 қазандағы негізгі саудадағы жабылудан 5% төмен.
