Meta Google-дың чиптерін сатып алуы мүмкін деген жаңалықтан Nvidia акциясы 7% құлады
ЖИ-бумының басты бенефициарларының бірі — чипмейкер Nvidia акциясы 25 қарашада Нью-Йорктегі саудада 7% құлдырап, $169,5-ға дейін түсті. Бұл — 2025 жылдың қыркүйегінен бергі ең төмен көрсеткіш.
Инвесторлар Nvidia қағазын The Information жариялаған мәліметтен кейін жаппай сатып жіберді. Басылым деректеріне қарағанда, Nvidia жақында өз клиентінің бірі — Google-мен бәсекеге түсуі мүмкін. The Information дереккөздері Google компаниясының Meta-мен миллиардтаған долларлық келіссөз жүргізіп жатқанын, оның аясында Meta 2027 жылға қарай Google-дың ЖИ-чиптерін өз дата-орталықтарында қолдану үшін сатып алатынын хабарлаған.
Бұдан бөлек, басылымның сұхбаттасушылары Google өз ЖИ-чиптерін басқа бұлттық клиенттерге де ұсына бастағанын айтқан. The Information бағалауынша, мұндай қадам Nvidia-ны жылдық табысының шамамен 10%-ынан айыруы мүмкін.
Алайда бірқатар сарапшы Nvidia котировкасының құлдырауынан сатып алу мүмкіндігін көрді. Мәселен, Bernstein сарапшысы Стейси Расгон бұл әдеттен тыс үлкен жаппай сатылым екенін айтты. «Біз Nvidia-ны портфелде ұстап тұруды жалғастырамыз. Акция бағасы құлдырағаннан кейін бұрынғыдан да тартымды бола түсті. Біз сатып алуды жөн көреміз», — деп жазған ол Barron's келтірген жазбасында.
Жыл басынан бері Nvidia-ның нарықтық құны 29% өсті. Салыстыру үшін: АҚШ-тың негізгі индексі S&P 500 осы кезеңде шамамен 14% көтерілген. Nvidia акциясының динамикасын қадағалайтын сарапшылардың 90%-дан астамы инвесторларға оларды сатып алуға (Buy, Overweight) кеңес берді. MarketWatch деректерінше, Уолл-стриттің консенсус-бағасы компания құнының алдыңғы сауда жабылуынан тағы шамамен 40% өсуін білдіреді.
