Micro-cap биотех компаниясы Rani акциялары бір күнде 250% өсті
Инъекцияны таблеткаға айналдыратын технология әзірлеп жүрген Rani Therapeutics Holdings компаниясының акциялары 17 қазанда бір күнде 250%-ға жуық өсіп кетті. Сауда көлемі әдеттегі деңгейден 60 есе жоғары болды. Компания инвесторларға бір күнде екі маңызды жаңалық жариялады: Жапонияның Chugai Pharmaceutical компаниясымен $1,09 млрд көлеміндегі серіктестік келісім. Қосымша $60,3 млн инвестиция тартылуы
Егжей-тегжейлі
17 қазанда Rani Therapeutics акциялары 248%-ға өсіп, $1,64 бағасына жетті. Инвесторлар 489 млн акция сатып алды — бұл әдеттегі күндік көлемнен 60 есе көп (Yahoo Finance деректері). 20 қазанда таңертеңгі саудада акциялар тағы 36% өсті.
Өсімге әсер еткен екі жаңалық болды. Біріншіден, Rani Roche тобына кіретін жапондық Chugai компаниясымен серіктестік және лицензия келісімін жасасты. Келісім бойынша Chugai RaniPill технологиясын пайдалануға құқық алады. Бұл технология укол мен тамырға салынатын дәрілерді ішетін капсула түріне айналдыруға мүмкіндік береді. Chugai оны сирек кездесетін ауруға қарсы дәрі жасау үшін қолданбақ. Қандай ауру екені көрсетілмеген.
Келісім шарты: Rani аванс ретінде $10 млн алады, препараттың дамуына қарай тағы $175 млн дейін төлем алуы мүмкін, Chugai келісімді тағы 5 дәріге кеңейту құқығына ие. Бұл жүзеге асса, келісімнің жалпы көлемі $1,09 млрд болады.
Екінші жаңалық — Rani Samsara BioCapital венчур қорымен бірге инвесторлар тобынан $60,3 млн инвестиция алды. Компанияның мәлімдеуінше, бұл қаржы Chugai компаниясынан алынған аванспен бірге бизнесін 2028 жылға дейін қаржыландыруға жеткілікті.
Rani немен айналысады және бұл не үшін маңызды?
Rani инъекциялық дәрілерді таблеткаға айналдыратын инновациялық технология әзірлеп жатыр. Компания бас директоры Талат Имран айтқандай, укол мен инъекция пациентке қолайсыздық тудырады, сондықтан көптеген адамдар емделуді тоқтатып жібереді. Rani осы мәселені шешуді көздейді — емді ыңғайлы етіп, сапалы өмірді жақсартуды мақсат етеді.
Технологияның қолдану мысалы. Компания бұл шешімді семіздікке қарсы препараттарда қолдануға болатынын атап өтті. Қазір бұл нарықтың 95%-ын екі препарат басқарады: Семаглутид (Wegovy — Novo Nordisk), Тирзепатид (Zepbound — Eli Lilly).
Алайда бұл дәрілер қазір тек инъекция түрінде қолжетімді, таблетка нұсқасы әлі жасалуда.
Бұл бағытта тек Rani ғана жұмыс істеп жатқан жоқ. Lexaria Bioscience компаниясы да Novo Nordisk және Eli Lilly препараттары бойынша ұқсас технологияны сынақтан өткізіп жатыр.
