Microsoft капитализациясы OpenAI-мен мәміле жөнінде жаңалықтан кейін $4 трлн-нан асты
Microsoft OpenAI компаниясымен жаңа ынтымақтастық туралы келісімге қол қойды, деп хабарлады ChatGPT әзірлеушісі. Екі компанияның ынтымақтастығы 2019 жылы бастау алған. Мәміле екі компанияның инвесторлары үшін белгісіздікті жойып, ChatGPT әзірлеушісіне толыққанды бизнеске қайта құрылу жолын ашады, деп жазды Bloomberg.
Мәміле туралы жаңалықтан кейін Microsoft акциясы сауда басында күрт өсіп, капитализациясы $4 трлн-нан асты.
Мәміленің шарттары:
Microsoft OpenAI құрған OpenAI Group PBC жаңа коммерциялық ұйымының (Public Benefit Corporation — қоғамдық игілік корпорациясы) шамамен 27% үлесіне ие болады. Бұл үлестің құны шамамен $135 млрд деп бағаланады, делінген хабарламада.
Бұған дейін Microsoft OpenAI-ды ерте кезеңнен бастап қолдап, оған $13 млрд инвестиция салған. Компания 2032 жылға дейін OpenAI технологияларына, соның ішінде адамның когнитивтік қабілеттерін еліктей алатын AGI деңгейіндегі жасанды интеллект модельдеріне қол жеткізу құқығын сақтайды. Алайда, Microsoft-тың OpenAI технологияларына қолжетімділігі тұтынушылық жабдықтарға таралмайды.
OpenAI-дың жасанды интеллект модельдері AGI деңгейіне жеткен кезде, оны тәуелсіз сарапшылар комиссиясы растауы тиіс, содан кейін Microsoft OpenAI кірісінен үлес алуды тоқтатады.
Сонымен қатар, Microsoft енді OpenAI-ға есептеу қуатын ұсынудағы эксклюзивті құқыққа ие болмайды. Дегенмен корпорацияның хабарлауынша, OpenAI Azure бұлтты қызметтерін қосымша $250 млрд көлемінде сатып алуға келіскен.
«Бастапқыда зерттеу ұйымына салынған инвестиция бүгінде біздің саладағы ең табысты серіктестіктердің біріне айналды, — делінген OpenAI мәлімдемесінде. — Бұл серіктестікті жаңа кезеңге көшіру арқылы біз екі ұйымның ұзақ мерзімді табысына негіз қалайтын жаңа келісімге қол қойдық».
Бұл OpenAI үшін не білдіреді?
OpenAI 2015 жылы коммерциялық емес зерттеу ұйымы ретінде құрылған, алайда 2022 жылы ChatGPT іске қосылғаннан кейін нарықтағы ірі ойыншылардың біріне айналды және инвесторлармен өзара әрекеттесуін жеңілдетуге мәжбүр болды. Биылғы жылдың көп бөлігінде компания дәстүрлі коммерциялық құрылымға көшу мақсатында реструктуризация жүргізді.
Жаңа коммерциялық құрылым — OpenAI Group PBC аясында коммерциялық емес OpenAI Foundation қорының үлесі 26% болады. Тағы 47% үлес қазіргі және бұрынғы қызметкерлер мен стартап инвесторлары арасында бөлінеді.
Reuters жазуынша, реструктуризацияның аяқталуы ChatGPT әзірлеушісіне болашақта биржада акциясын орналастыруға жол ашады. Қыркүйек айында $500 млрд деп бағаланған стартап Илон Масктың SpaceX компаниясын басып озып, әлемдегі ең қымбат жекеменшік компанияға айналды.
