«Үміт пен арманға ақша салмаймыз»: инвестор Apple мен Tesla орнына жаңа ұсыныс айтты
«Керемет жетілік» қатарында Tesla мен Apple орнына Oracle мен Broadcom болуы керек». Мұндай пікірді технологиялық компанияларға қаржы құятын Columbia Seligman Global Technology қорының басқарушысы Вимал Пател айтты. MarketWatch шолушысы Майкл Браштың жазуынша, Пател басқаратын қор кейінгі бес жылда орта есеппен бәсекелестерінен жыл сайын алты пайыздық тармаққа артық табыс көрсетіп келеді. Пател инвесторларға құр уәде беріп, нақты технологиялық жетістік көрсетпейтін компанияларға қарсы ұстаным ұстанады.
Tesla-ның мәселесі неде?
Columbia Seligman Global Technology Fund Tesla акцияларынан бас тартқан. Себебі электромобильдер нарығындағы бәсекелестік өте қатты. Бұған дәстүрлі автокомпаниялармен қатар Қытайдың жаңа ойыншылары да себеп. «Бұл нарықта қазір баға соғысы жүріп жатыр», – дейді Пател. Оның айтуынша, бұл жағдай сатылым өсімін тежеп, бағаның төмендеуіне алып келеді. Ал бұл өз кезегінде компанияның табыс маржасына кері әсер етеді.
Сонымен қатар, Пател роботакси мен Optimus атты адам тәрізді роботтарға қатысты күмәнмен қарайды. Оның пікірінше, Tesla Waymo (Google-ға тиесілі) сияқты бәсекелестермен бәсекеге түсе ала ма, жоқ па – ол әлі белгісіз.
«Біз арман мен үмітке емес, нақты нәтижеге инвестиция саламыз», – дейді ол.
Apple-дің мәселесі неде?
Apple компаниясының жанкүйерлері көп және бұл компанияның құрылғылар, қызметтер мен бағдарламалар экожүйесіне берік байланысқан. Бірақ Пателдің айтуынша, тұтынушылар iPhone-ның ұсақ-түйек жаңартуларынан жалыға бастады. «Бәріміз iPhone-ның жаңа даму кезеңін күтіп жүрміз. Бірақ ол әлі басталған жоқ», – деді ол.
Пател Apple-дің жасанды интеллект саласында қатты қалып қойғанын атап өтті. Сондай-ақ компания Трамппен байланысты геосаяси тәуекелдердің қысымын сезініп отыр. Apple жеткізу тізбегінің бір бөлігін Үндістанға ауыстырғанымен, өндірістің басым бөлігі әлі де Қытайда орналасқан. Бұл АҚШ пен Қытай арасындағы сауда соғысы жағдайында Apple-ді осал етеді.
«Керемет жетіліктің» ішінде бұл тәуекелге ең көп ұшырайтын — Apple. Олар тарифтік соқтығыстан үлкен шығынсыз өте алмайды», – дейді Пател.
Oracle-ды неге сатып алу керек?
Бұрын Oracle дерекқорлармен жұмыс істеуге арналған бағдарламалық жасақтаманы жеткізетін негізгі компания болатын. Сол кезде табысы шамамен 4–7% аралығында тұрақты өсіп отыратын. Бірақ қазір компания жаңа деңгейге көтеріліп жатыр. Пателдің пікірінше, Oracle Amazon, Microsoft және Google өнімдерімен бәсекелесе алатын бұлтты платформаны дамытып жатыр.
«Олар енді гипермасштабтағы провайдерге айнала бастады, яғни алып дата-орталықтарды басқаратын операторға. Енді олар өз мүмкіндіктерін шын мәнінде көрсете бастады», – дейді ол.
Oracle-дың бұлтты инфрақұрылым мен қосымшалардан түскен табысы соңғы тоқсанда 27%-ға өсіп, 6,7 млрд долларға жетті. Жалпы табысы 11%-ға артып, 15,9 млрд долларды құрады. Пателдің айтуынша, келесі жылы компанияның жалпы табысы 16%-ға өсіп, 67 млрд долларға жетуі мүмкін. Ал өткен 12 айда бұл көрсеткіш 9% болған.
Broadcom-ды неге сатып алу керек?
Amazon, Alphabet және Microsoft сияқты технологиялық алыптар қазір жасанды интеллектке арналған көпсалалы чиптерді Nvidia компаниясынан сатып алады. Өйткені бұл чиптерді бағдарламалау оңай. Бірақ олар қымбат әрі қуат тұтынуы жоғары. Осыған байланысты компаниялар арнайы мақсатқа арналған өз чиптерін (ASIC) жасап шығаруға көшіп жатыр. Бұл жерде Broadcom басты серіктестердің бірі болып отыр. Broadcom-мен Google, Meta және Apple жұмыс істейді.
«Nvidia чиптеріне орасан ақша жұмсаудың орнына, бұлтты қызмет көрсетушілер Broadcom-нан өздеріне қажетті шешімдерге тапсырыс береді. Бұл шығын мен қуат тұтынуды едәуір азайтады», – деп түсіндіреді Пател.
Broadcom-ның AI-чиптерінен түскен табысы кейінгі тоқсанда 46%-ға өсіп, 4,4 млрд долларға жетті. Жалпы табысы 20%-ға өсіп, 15 млрд доллар болды. Келесі тоқсанда компания AI-чиптердің жылдық сатылымы 60%-ға артып, 5,1 млрд долларға жетеді деп болжап отыр.
MarketWatch шолушысының жазуынша, жылдың бірінші тоқсанының қорытындысы бойынша Пател қорындағы ең үлкен үлесті Broadcom акциялары алып отыр.
Пател «Керемет жетілік» акциялары туралы не дейді?
Nvidia, Пателдің пікірінше, жасанды интеллект инфрақұрылымына деген тұрақты сұраныс арқасында сенімді өсімін жалғастырады. Келесі секіріс корпоративті AI өнімдері, мысалы, Microsoft Copilot сияқты шешімдердің таралуымен байланысты болады.
Microsoft пен Amazon бұлтты сервистер арқылы өсуді жалғастырады. Өйткені жасанды интеллект дамыған сайын мұндай қызметтерге сұраныс артып келеді.
Meta жасанды интеллектіні жарнама құралдарына енгізудің пайдасын көріп отыр. Бұл платформа клиенттерге жарнама кампанияларын автоматты түрде жасауға көмектеседі.
«Amazon-ның бөлшек саудасы мен Meta мен Alphabet-тің жарнама бизнесі тұрақты күйде», дейді Пател.
Alphabet акциялары бағалау тұрғысынан тартымды: компанияның P/E коэффициенті (бағасы мен болжамды табысы арақатынасы) 19,4 деңгейінде, бұл кейінгі бес жылдағы орташа мәннен 17% төмен. Акцияларға деген қысымды AI-іздеу Google Search-ті алмастырады деген қорқыныш тудырып отыр. Бірақ Пателдің айтуынша, Alphabet-тің AI Overview атты жылдам жауап жүйесі ChatGPT сияқты өнімдермен сәтті бәсекелесіп жатыр.
