Morgan Stanley киберқауіпсіздік нарығында өсуге дайын үш акцияны атады
Morgan Stanley сарапшылары алдағы бір жылда бағасы көтеріледі деп болжанған АҚШ-тың үш компаниясын атады. Бұл компаниялардың ортақ ерекшелігі — олар киберқауіп-қатерлерден қорғаудың кешенді платформаларына белсенді инвестиция салып жатыр.
Егжей-тегжейлі
Уолл-стриттің ең ірі инвестициялық банктерінің бірі Morgan Stanley Palo Alto Networks, CrowdStrike және Zscaler компанияларын киберқауіпсіздіктегі «платформизация» толқынына дайын тұрған үздіктер деп есептейді. Бұл — қауіпсіздік архитектурасын интеграцияланған әрі жеңілдетілген үлгіге көшіру процесі. Бұл туралы Business Insider банктің қыркүйектегі шолуына сілтеме жасап хабарлады.
Аталған компаниялардың әрқайсысы жүйелік қауіпсіздіктің негізгі элементтерін қамтитын шешімдер ұсынады: құрылғыларды, бұлттық орта мен қосымшаларды, сондай-ақ желілерді қорғау.
Morgan Stanley болжамынша алдағы бірнеше жылда киберқауіпсіздік шешімдері нарығы жылына орта есеппен 12% өседі. Осы жағдайда бағдарламалық қамту әзірлеушілердің акциялары үшін негізгі драйверлер — ұзақмерзімді перспективадағы түсімнің өсуі және қысқа мерзімде бос ақша ағымының маржасы (free cash flow margin) болмақ. Банктің бақылау тізіміндегі 15 бағдарламалық компания бойынша түсімнің медиандық өсімі 11,8%, ал бос ақша ағымы маржасының медиандық болжамы 26,6% деңгейінде. Ал Palo Alto Networks, CrowdStrike және Zscaler бойынша күтілетін көрсеткіштер бұдан да жоғары.
Сарапшылардың пікірлері
— Palo Alto Networks. Жаңа буын брандмауэрлерін (firewall) жасаушы компанияның 2026 жылға болжамды түсім өсімі 13,6%, бос ақша ағымы маржасы 38,3% деп күтіледі. Morgan Stanley бұл акцияларға «нарықтан жоғары» (Overweight, яғни «сатып алу») рейтингісін берді. «Біздің ойымызша, ұзақ мерзімде Palo Alto Networks қауіпсіздік саласындағы жетекші платформалық жеткізушілердің бірі болмақ, әсіресе платформизация стратегиясы қарқын алып, нарықта консолидация жүріп жатқанда», — деп келтірді Business Insider банктің шолуын.
— CrowdStrike. Falcon бұлттық платформасын жасаушы компания — бірнеше киберқауіпсіздік функциясын біріктіретін шешім ұсынады. Morgan Stanley оның акцияларына «нарыққа тең» (Equalweight, яғни «ұстап тұру») рейтингін берді. Дегенмен банк базалық сценарий бойынша CrowdStrike акцияларының 9%-ға, ал оптимистік сценарий бойынша 30%-ға өсу әлеуетін көреді. Компанияның болжамды түсім өсімі 21,5%, бос ақша ағымы маржасы — 31%.
— Zscaler. Қыркүйек басында Morgan Stanley бұл компания акцияларының рейтингін Equalweight-тен Overweight-ке көтерді. Zscaler корпоративтік интернет-қатынауға арналған қорғалған бұлттық шлюздерді әзірлейді. Business Insider дерегінше, «бұқа» сценарийі бойынша компания акциялары 44%-ға өсуі мүмкін. Түсім өсімі 18,3%, бос ақша ағымы маржасы 27,3% деп болжануда. «Біз Zscaler-дің Palo Alto Networks пен CrowdStrike қатарындағы толыққанды платформа ретінде орнығу мүмкіндігі бар деп санаймыз», — деді банк сарапшылары.
Уолл-стриттің ортақ пікірі
Уолл-стрит сарапшылары орта есеппен Palo Alto Networks, CrowdStrike және Zscaler акцияларын сатып алуға кеңес береді. FactSet деректеріне сәйкес орташа мақсатты бағалар келесі 12 айда Palo Alto Networks акцияларының 8,9%-ға, CrowdStrike-тың 11,9%-ға, Zscaler-дің 15,3%-ға өсуін болжайды.
