Нарық құлдыраса да, GameStop акциялары ралли жасады — бұл жолы «мем» сипатында емес
Видеойын дүкендер желісі GameStop-тың акциялары 23 мамырда 7%-ға шарықтап, сол уақытта АҚШ-тың жалпы қор нарығы төмендеу көрсетті. Екі сауда күнінің ішінде GameStop қағаздары шамамен 18% қымбаттады. Бұл жолы ралли әлеуметтік желілердегі ажиотажсыз және компания тарапынан ешқандай жаңалықсыз жүріп жатыр. Инвесторлар GameStop-ты енді бұрынғыдай «мем акция» ретінде емес, биткоин бағасының өсуінен пайда табудың бір жолы ретінде қарай бастаған секілді, деп болжады MarketWatch.
Егжей-тегжейлі
23 мамырдағы сауда қорытындысы бойынша GameStop котировкалары 7% қымбаттап, $33-қа жетті. Бұл — 7 қаңтардан бергі ең жоғары жабылу бағасы. Бұған дейінгі күні қағаздар одан да жоғары — 10%-ға көтерілген. Қазір GameStop акциялары 2025 жылдың басымен салыстырғанда 5,4% қымбат. Ал осы аралықта АҚШ-тың негізгі индексі S&P 500 керісінше 1,3% кеміді.
GameStop раллиі нарықтың қалған бөлігі құлдырап жатқан тұста орын алды: S&P 500 индексі күн қорытындысында 0,67% жоғалтты. Инвесторларды Дональд Трамптың Еуроодаққа қарсы 50% көлемінде жаңа баж салығын енгізу және барлық импорттық iPhone-ға 25% салық салу туралы мәлімдемесі алаңдатты. Сауда күнінің соңына қарай қор индекстері құлдырауды тежей алды. Трамп бұл қатерлерді келіссөз жүргізу үшін қысым тетігі ретінде қолданып отыр, деп түсіндіреді Barron’s.
Неліктен GameStop акциялары өсуде
GameStop акцияларының өсуіне биткоин бағасының жаңа рекордтық деңгейге жетуі себеп болды, деп жазады MarketWatch. Бейсенбі күні криптовалюта бағасы $111 мыңнан асып, жұмада $108 мыңға дейін төмендеді.
2021 жылы әлеуметтік желідегі ажиотаждың арқасында бірнеше рет күрт қымбаттаған «мемдік акция» ретінде танылған GameStop қазір биткоинға белсенді инвестиция жасап жатыр. Наурыз айында директорлар кеңесі бірауыздан компания қаражатын криптовалютаға салу және биткоинды резервтік актив ретінде пайдалану шешімін мақұлдаған. Бұл — ең ірі корпоративтік биткоин иесі Strategy (бұрынғы MicroStrategy) қолданған стратегияны қайталау әрекеті.
CNBC жазуынша, биткоинға бет бұру — GameStop бас директоры Райан Коэннің шығынға ұшыраған офлайн-бизнесі бар ритейлерге жаңа серпін беру әрекеті. Компания сатылымның төмендеуімен және стриминг пен цифрлық платформалар тарапынан күшейіп келе жатқан бәсекемен бетпе-бет келіп отыр. Енді, MarketWatch атап өткендей, инвесторлар GameStop-ты Strategy секілді биткоинға тәуекелдік ставка ретінде қарай бастағанға ұқсайды.
Алда не болмақ?
MarketWatch пікірінше, биткоинның сенімді түрде қымбаттап келе жатқаны GameStop акцияларына одан әрі өсуге әлеует береді. Соңғы бір айда криптовалюта шамамен 17%-ға қымбаттады, бұл өсім негізінен ірі инвестициялық қорлар тарапынан артқан сұраныстың нәтижесі болды — бұрынғыдай жаппай спекуляция емес. Осы аптада биткоин өсімі АҚШ қор нарығы құлдыраған кезде тіркелді, бұл оны макроэкономикалық тұрақсыздық жағдайында жаңа «қауіпсіз актив» ретінде қарастырып жатқан инвесторлардың көбейгенін білдіруі мүмкін, дейді сарапшылар.
MarketWatch деректеріне сәйкес, GameStop акцияларының динамикасын екі сарапшы ғана бақылап отыр, екеуі де бұл қағаздарды сатуға кеңес береді (бағалары Underweight және Sell). Уолл-стриттегі консенсус-баға — бір акцияға $13,5, бұл қазіргі нарықтық бағадан шамамен 60% төмен.
