Neuralink маймылға жоқ затты «көруге» үйретті. Масктың стартаптары несімен қызық?
Илон Масктың Neuralink компаниясы маймылдарға жүргізген сынақтары нәтижесінде зерттеушілердің миды имплантат арқылы суретпен «қамтамасыз ете» алатыны дәлелденді. Бұл технология болашақта зағип жандарға көруге көмектесуі мүмкін. Масктың өзге де жобалары ілгерілеп келеді. Caplight сауда платформасының мәліметінше, АҚШ-тағы сайлаудан кейін төрт ай ішінде SpaceX, Neuralink, The Boring Company және xAI компанияларының жиынтық нарықтық құны 45%-ға өсті.
Егжей-тегжейі
Neuralink әзірлеген Blindsight деп аталатын имплантат маймылдың көру қабілетіне жауапты ми бөліктерін ынталандырды, дейді компания инженері Джозеф О’Доэрти 13 маусымда өткен конференцияда. Bloomberg жазуынша, үш сынақтың кемінде екеуінде маймыл көзқарасын шынайы өмірде жоқ, бірақ зерттеушілер «көрсеткісі келген» зат тұрған бағытқа бұрған.
Blindsight көздің жұмысын атқаруға ынталы және ол нейротехнологиядағы ең батыл бастамалардың бірі саналады. Бұл сала медицина шекарасын чиптер мен IT арқылы кеңейтуді мақсат етеді. Blindsight-тың қысқа мерзімді мақсаты — зағип адамдардың көруін қалпына келтіру болса, ұзақ мерзімді жоспарда — инфрақызыл секілді диапазонда көру қабілетін беру арқылы «адамнан артық көру» мүмкіндігін жасау. Масктың айтуынша, Neuralink бұл чипті маймылдарға бірнеше жылдан бері сынап келеді және биыл адамдарға да сынақ жүргізбек. Алайда АҚШ билігі әлі адамға сынауға рұқсат бермеген.
Neuralink сондай-ақ сал ауруына шалдыққан адамдарға ми имплантаты арқылы компьютермен тікелей байланыс орнатуға көмектесіп жатыр. Масктың сөзінше, бүгінде бес адамға осындай құрылғы орнатылған. Кейбір қатысушылар оны аптасына 60 сағатқа дейін қолданады. Маск болашақта бұл технология сал адамдарға қозғалу, тіпті жүру мүмкіндігін қайтаруы мүмкін деп сенеді.
Масктың бұл медициналық жобаларға құлшынысы — оның басты мақсатына жетудегі аралық саты ғана. Оның түпкі ойы — адамдар арасындағы байланыс жылдамдығын арттыру, бұл болса цифрлық жасанды сана туғызар қауіптерді азайтады дейді ол.
Инвесторлар Масктың жеке компанияларына неге қызығады?
Neuralink — Tesla компаниясының бас директоры Илон Масктың жеке компанияларының бірі. Сонымен қатар ол xAI атты жасанды интеллект жобасын дамытып, SpaceX арқылы ғарыштық зымырандар жасап, The Boring Company компаниясымен тоннельдер қазып жатыр. Бұл жобалар инвесторлар тарапынан үлкен қызығушылық туғызуда. Caplight мәліметінше, АҚШ-тағы президенттік сайлаудан кейін 2025 жылғы наурызға дейін осы төрт компанияның жиынтық бағасы 45%-ға өсті.
Bloomberg атап өткендей, мұндай өсім көбінесе инвесторлардың қызығушылығын көрсетеді, өйткені жеке компаниялардың қаржылық есебіне олар тікелей қол жеткізе алмайды.
— Инвесторлар xAI стартапына ерекше назар аударды: оның бағасы төрт айда 110%-ға өсіп, 10 наурызда 96 миллиард долларға жетті. Салыстыра кетсек, осы кезеңде S&P 500 индексіндегі ең табысты акция Super Micro Computer 63% табыс көрсетті. Ал әлеуметтік желі X-ті сатып алғаннан кейін xAI бағасы шамамен 113 млрд долларға жетті.
— SpaceX компаниясының бағасы 2023 жылғы желтоқсанда өткен тендерден кейін шамамен 350 млрд долларға жетті. 11 маусымда ARK Invest қоры 2030 жылға қарай SpaceX-тің бағасы 2,5 триллион долларға жетуі мүмкін деп болжады.
— Pitchbook мәліметінше, Neuralink-тің қазіргі бағасы 9 млрд доллар. Маусым айының басында компания 650 млн доллар инвестиция тартқан.
— Ал тоннель салумен айналысатын The Boring Company, сайлаудан кейін 7,8% құнын жоғалтты. 2023 жылы компания 7 млрд доллардан жоғары бағаланған.
