Nvidia OpenAI-ға $100 млрд құяды: акциясы төмендеуден шарықтауға ұласты
Жасанды интеллектке арналған процессорлардың әлемдегі ең ірі өндірушісі Nvidia ChatGPT жасайтын OpenAI-ға $100 млрд-қа дейін инвестиция салмақ. Екі компания стратегиялық серіктестік орнатқанын хабарлады. Олар OpenAI-дың келесі буыны ЖИ-модельдері үшін кемінде 10 гигаватт Nvidia есептеу қуатын іске қосуды жоспарлап отыр.
«Бұл — ауқымды жоба», — деді Nvidia бас директоры Дженсен Хуанг CNBC-ге берген сұхбатында. Оның айтуынша, 10 гигаватт қуат шамамен 4–5 млн Nvidia графикалық процессорына (GPU) тең: компанияның 2025 жылғы барлық жеткізілім көлемімен шамалас және «өткен жылғы деңгейден екі есе жоғары».
Мәміленің егжей-тегжейі
Жоба дата-орталықтарын салуды және энергия қуатын кеңейтуді қамтиды. Nvidia сайтындағы хабарламаға сәйкес, чип өндірушінің OpenAI-ға салатын инвестициясы кезең-кезеңімен жүзеге асады. Алғашқы қуаттарды іске қосу 2026 жылдың екінші жартысына жоспарланған және жаңа Nvidia Vera Rubin платформасы қолданылады.
OpenAI өзінің «ЖИ фабрикасын» дамыту үшін есептеу қуаты мен желілік шешімдер бойынша Nvidia-ны негізгі серіктесі ретінде таңдады. Компаниялар жоспарларын үйлестіреді: OpenAI — ЖИ-модельдер мен бағдарламалық инфрақұрылым бойынша, ал Nvidia — жабдық пен бағдарламалық қамтамасыз ету бойынша. Бұл келісім сондай-ақ Microsoft, Oracle және SoftBank қатысатын Stargate бастамасы аясындағы екі компанияның ынтымақтастығын кеңейтеді.
«Есептеу инфрақұрылымы болашақ экономиканың негізіне айналады. Біз Nvidia-мен бірге жасап жатқанды жаңа ЖИ жетістіктеріне қол жеткізу үшін және оларды адамдар мен компанияларға кең ауқымда ұсыну үшін пайдаланамыз», — делінген OpenAI-дың негізін қалаушы әрі бас директоры Сэм Альтманның бірлескен мәлімдемесінде.
Серіктестіктің жаңа кезеңіне қатысты соңғы шарттарды жақын апталарда бекіту жоспарланып отыр.
Акцияның жай-күйі
OpenAI-мен серіктестік туралы хабарға дейін Nvidia акциясы төмендеп тұрған, алайда жарияланымнан кейін шығынды өтеп, жылдам өсе бастады. Котировка бір сәтте 4%-дан астам қосымша өсім көрсетті. Nvidia-ның нарықтық капитализациясы шамамен $4,5 трлн-ға күрт өсті.
Контекст
OpenAI-ға жоспарланған инвестиция Nvidia үшін ең ірі салымдардың бірі болмақ, деп атап өтті CNBC. Қыркүйек айында компания мәмілелер мен келісімдер туралы белсенді хабарлады. Мәселен, ай ортасында Nvidia америкалық процессор өндіруші Intel-ден $5 млрд көлемінде үлес сатып алатынын мәлімдеді. Бұған қоса, компания британдық дата-орталығы стартапы Nscale-ға шамамен $700 млн инвестиция салатынын айтты. Сондай-ақ, Nvidia 18 қыркүйекте CNBC жазғандай, ЖИ-стартап Enfabrica бас директоры Рочан Санкарды оның командасымен бірге тартуға және осы компанияның технологияларын лицензиялауға $900 млн-нан астам қаржы жұмсады.
