«Облигациялар королі» 30 жылдық бондардан бас тартты. Орнына не таңдады?
Инвесторлар 30 жылдық трежеристі сатып алудан әзірге тартынып, олардың кірістілігінің өсуін күткен дұрыс, деп есептейді «облигациялар королі» Джеффри Гандлах. Бондтардың орнына ол алтынға және Үндістан нарығындағы акцияларға назар аударуға кеңес береді.
Егжей-тегжейлі
«Қазір ұзақ мерзімді қазынашылық облигациялар енді қауіпсіз актив ретінде жұмыс істемейтіні айқын бола бастады. Олар пайыздық мөлшерлеменің төмендеуіне де, қазіргі 2,5%-ды құрап отырған инфляцияға да бейжай қарайды», — деді әлемдегі жетекші облигациялық қорлардың бірі DoubleLine басшысы Джеффри Гандлах Bloomberg агенттігіне берген сұхбатында.
DoubleLine қазіргі уақытта АҚШ Қаржы министрлігінің 30 жылдық ұзақ мерзімді облигацияларына «мейлінше араласпай» отыр: Гандлахтың пікірінше, олардың кірістілігі АҚШ экономикасы әлсірей бастағанда немесе Федералдық резерв мөлшерлемелерді қайта төмендете бастағанда өседі, деп хабарлайды MarketWatch. «Облигациялар королі» бондардың кірістілігі 6%-ға жетеді деп күтуде — бұл АҚШ ФРЖ-ін сандық жұмсарту шараларын бастауға итермелеуі мүмкін.
АҚШ-тың 30 жылдық облигацияларының кірістілігі мамыр айында соңғы 20 жылдағы максимумға — 5,15%-ға жетіп, 12 маусым, бейсенбі күні шамамен 4,9% деңгейінде саудаланды, деп жазды Bloomberg. 2025 жылдың басынан бері бондардың кірістілігі өсті, ал қысқа мерзімді қазынашылық облигациялар бойынша мөлшерлемелер керісінше төмендеді. Гандлахтың бұл пікірлері 30 жылдық қазынашылық облигациялар бойынша өтетін аукционның қарсаңында айтылды, деп атап өтті агенттік.
Инвесторларға бондардан басқа не таңдау керек?
«Облигациялар королі» инвесторларға долларлық емес активтерді көбейту туралы ойлануға кеңес береді және қазіргі таңда алтынды тартымды инвестиция деп санайды.
«Мен алтынды нақты актив түріндегі класс ретінде қарастырамын. Ол енді есі кеткен аман қалушылар мен жабайы алыпсатарларға ғана арналған құрал емес», — деді ол. Сондай-ақ, қазіргі кезде орталық банктер де бұл бағалы металды белсенді түрде сатып алып жатқанын атап өтті.
«Қаржы ағыны АҚШ-ты айналып өтіп, сапалы актив ретіндегі алтынға ойысуда — бұл парадигманың түбегейлі өзгерісін көрсетеді», — деді Гандлах.
Наурыз айында «облигациялар королі» алтын бағасы трой унциясы үшін $3000-дық рекордтан кейін тағы үштен біріне өседі деп болжаған. Ал мамырда CNBC арнасына берген сұхбатында ол алтын бағасы $4000-ға дейін жетуі мүмкін екенін мәлімдеді. Бұл оптимистік болжамын Гандлах орталық банктердің белсенді сатып алуларымен түсіндірді: оның айтуынша, реттеуші ұйымдар алтынды «өте тік әрі шұғыл траекториямен» жинап жатыр және бұл үрдіс жалғаса беруі мүмкін.
Гандлах Үндістанды да ұсынады
Үнді нарығы ұзақ мерзімді инвестициялар үшін ең тиімді мүмкіндіктердің бірі деп санайды DoubleLine басшысы. Оның айтуынша, ақылды инвестор дәл қазір қаржысын «ұзақ мерзімді бағыттарға» салуы керек, деп хабарлайды MarketWatch.
«Бұл 30 жылға созылуы мүмкін, бірақ сіз Үндістанға инвестиция салуыңыз керек, себебі бүгінгі Үндістанның профилі 35 жыл бұрынғы Қытайға ұқсайды», — деді ол.
Оның пікірінше, Үндістанның демографиялық мүмкіндіктері мол және оған жаһандық жеткізу тізбегінің қайта бөлінуі қосымша артықшылық беріп отыр.
«Үндістан акцияларын сатып алыңыз да, оларды немерелеріңіздің университеттегі оқуына арналған қор ретінде сақтаңыз, содан кейін жай ғана ұмыта салуға тырысыңыз», — деді ол.
Контекст
Мамыр айында АҚШ мемлекеттік облигацияларының кірістілігі 5%-дан асқан кезде Bank of America инвесторлар үшін 30 жылдық қазынашылық облигацияларға кірудің «өте қолайлы деңгейі» деп мәлімдеді. BofA-ның пікірінше, Вашингтон мемлекеттік қарызды бақылауға ала алады, ал бұл облигациялар үшін жақсы перспектива қалыптастырады.
Алайда маусым басында DoubleLine Capital 30 жылдық бондар бойынша инвесторлардың алдында екі ғана тәсіл қалғанын атады: не олардан барынша бойын аулақ ұстау, не арзандауына ставка жасау.
