Oracle OpenAI үшін салып жатқан кей дата-орталықтарды тапсыруды 2028 жылға шегерді
Бұлтты есептеу қуатын жеткізуші әрі бағдарламалық жасақтама әзірлеуші Oracle OpenAI (ChatGPT жасаушы) үшін салып жатқан дата-орталықтарының бір бөлігін аяқтау мерзімін 2027 жылдан 2028 жылға ауыстырды. Бұл туралы Bloomberg дереккөздеріне сүйеніп хабарлады.
Агенттік дереккөздерінің айтуынша, кідірістердің негізгі себебі — жұмыс күші мен материалдардың тапшылығы.
Bloomberg мәліметінше, Oracle мен OpenAI арасында жалпы құны 300 млрд доллар болатын көпжылдық келісімшарт бар. Соған сәйкес Oracle OpenAI модельдерін үйрету және іске қосу үшін қажет есептеу қуатын береді. Кідірістер болғанына қарамастан, АҚШ-тағы жобалардың кестесі әлі де өте өршіл, өйткені бұл нысандар әлемдегі ең ірілердің қатарына кіруі тиіс, деп жазады Bloomberg.
Oracle да, OpenAI да агенттікке пікір білдіруден бас тартты.
Акциялар не болды?
Bloomberg хабары шыққаннан кейін Oracle акцияларының төмендеуі күшейді: күн ішіндегі ең төменгі деңгейде олар шамамен 6,5% арзандады.
Oracle қағаздары қазір 2025 жылдың басымен салыстырғанда 13% қымбат. Бірақ соңғы үш айда бағасы үштен бірінен де көпке төмендеді. Yahoo Finance жазуынша, инвесторларды Oracle-дың OpenAI келісімшарттарына тәуелділігі және ChatGPT жасаушы компания өз міндеттемелерін орындай алмауы мүмкін деген тәуекел алаңдатады. Oracle-дың қаржы жылының екінші тоқсаны бойынша есебі бұл күдікті сейілте алмады.
Қазір сарапшылардың көбі Oracle акциясын сатып алуға кеңес береді. MarketWatch дерегінше, 27 Buy және алты Overweight рейтингі бар, ал 11 Hold (“ұстау”) және екі Sell (“сату”) бағасы берілген. Орташа мақсатты баға 299,66 доллар, бұл соңғы жабылу деңгейінен шамамен 51% жоғары. Дегенмен есептен кейін бірнеше сарапшы өз мақсатты бағаларын төмендетті.
