Ozempic жасаушысының бәсекелесі шығынға батты. Компания акцияларына қалай әсер етеді?
Арықтауға арналған дәрі-дәрмектерді таблетка түрінде әзірлеп жатқан биотехникалық компания Viking Therapeutics екінші тоқсанда сарапшылар күткеннен үштен бірге көп қаражат жұмсады және шығындарын одан әрі арттыруды жоспарлап отыр. Дегенмен, бұл стратегия өз жемісін беріп жатыр — компания семіздікке қарсы дәрілерді әзірлеу бағытында шағын және орта биофармалық ойыншылар арасында көш бастап келеді және Уолл-стрит сарапшыларының пікірінше, Novo Nordisk пен Eli Lilly компанияларының инъекциялық өнімдеріне елеулі бәсекелес бола алады.
Егжей-тегжейлі
Viking Therapeutics компаниясының таза шығыны екінші тоқсанда сарапшылар күткеннен 32% артық болып, $65,6 млн-ды құрады, делінген 23 шілдеде жарияланған қаржылық есепте.
Шығынның артуы зерттеу мен әзірлемелерге, соның ішінде клиникалық сынақтарға кеткен шығындардың өсуімен байланысты. Бұл бағыттағы шығындар бір жыл бұрынғы көрсеткішпен салыстырғанда шамамен 150%-ға артып, $60,2 млн-ға жеткен.
Жалпы және әкімшілік шығындар 40%-ға артып, $14,4 млн болды — бұған негізінен персоналға қатысты шығындардың ұлғаюы себеп болғаны көрсетілген.
Бұл инвестор үшін нені білдіреді?
Қазіргі таңда Viking Therapeutics портфелінде фармацевтикалық реттеуші органдар мақұлдаған бірде-бір дәрі жоқ. Демек, компания әлі сатылымнан табыс таппайды. Алайда шығындары көп, әрі келесі жарты жылда оларды 25–30% аралығында арттыруды жоспарлап отыр, деп мәлімдеді компания басшылығы инвесторлармен өткен телефон конференциясында.
Соған қарамастан, Viking-тің қолында алдағы үш жылға жететін жеткілікті қаржы бар деп есептейді William Blair инвестициялық компаниясының сарапшысы Энди Хси. Екінші тоқсанның соңында компания балансы $808 млн болған.
Сондай-ақ, Jefferies сарапшысы Роджер Сонг Viking әзірлеп жатқан дәрінің баламаларымен салыстырғанда қауіпсіздік деңгейі жоғары екенін айтады. Оның пікірінше, бұл биотех шағын және орта фармацевтикалық фирмалар арасында үздік болып саналады.
Viking сатуды жоспарлап отырған таблетка түріндегі дәрілер тұтынушылар арасында инъекциялық Ozempic пен Wegovy (Novo Nordisk шығарған) өнімдерінен әлдеқайда танымал болады деп күтілуде. Зерттеу нәтижелері бойынша, бұл пероральды дәрі салмақты азайтуда өте тиімді: пациенттер 4 аптада дене салмағының 8,2%-ын жоғалтқан. Салыстырмалы түрде алғанда, Eli Lilly компаниясының инъекциялық Zepbound препараты 72 аптада салмақтың 20,2%-ын, ал оның Orforglipron атты тәжірибелік таблеткасы 40 аптада 7,9%-ын азайтқан.
Viking сонымен қатар семіздікке қарсы табысты бизнеске енгісі келетін басқа ойыншылар үшін жұтып алуға ыңғайлы мақсат ретінде қарастырылуы мүмкін, деп жазады Barrons басылымы.
Акциялардың жағдайы
23 шілде, сәрсенбі күні есеп жарияланғаннан кейін Viking акциялары 10%-ға құлдырады, алайда тез арада қалпына келіп, бейсенбіде сауда күнін 0,3% өсіммен аяқтады. Жыл басынан бері компания 17%-ға жуық құнын жоғалтты.
Қаржылық шығынға қарамастан, HC Wainwright инвестициялық банкі Viking акцияларын сатып алуға кеңес беруді жалғастырды және бағалау нысанасын $102 деңгейінде сақтады, деп хабарлайды Investing.com. Сол сияқты, Cantor Fitzgerald те өз бағалауын растады, компания акцияларын «нарықтан жоғары» деп бағалап, $104 нысанасын көрсетті. William Blair де акцияларды сатып алуға кеңес беріп отыр, алайда оның бағалау межесі сәл төмен — $80.
MarketWatch деректері бойынша Уолл-стриттің 19 сарапшысының ішінде 17-сі Viking акцияларын сатып алуға, ал екеуі ұстауға кеңес береді. Орташа бағалау межесі $89,95, бұл ағымдағы бағаға қарағанда үш есе өсімді болжайды.
Компания туралы маңызды ақпарат
Viking Therapeutics — метаболикалық және эндокриндік бұзылыстарды емдеуге арналған дәрілерді әзірлейтін биофармацевтикалық компания. Оның басты әзірлемесі — семіздікке қарсы VK2735 препараты. Қазіргі уақытта бұл дәрі екінші клиникалық сынақ кезеңінен сәтті өтіп жатыр.
Freedom сарапшылары атап өткендей, бұл дәрі қазіргі уақытта нарықта көш бастап тұрған Novo Nordisk-тің Wegovy (белсенді заты — семаглутид) және Eli Lilly-дің Zepbound (тирзепатид) өнімдерінен тиімділігін жоғары көрсетіп отыр. Бұған дейін брокерлік компания аналитиктері GLP-1 санатындағы нарықтың 95%-ы осы екі препаратқа тиесілі екенін мәлімдеген болатын.
Morningstar агенттігінің былтырғы есебіне сәйкес алдағы бес жылда семіздікпен күресуге бағытталған 16 жаңа препарат нарыққа шығуы мүмкін — олардың қатарында Roche, Amgen, Pfizer, AstraZeneca сынды фармалы алыптармен қатар, шағын фирмалар да бар. Алайда Freedom сарапшыларының пікірінше, Viking — қазіргі сәтте GLP-1 нарығына еніп, Novo мен Lilly-дің дуополиясын бұзуға нақты мүмкіндігі бар жалғыз шынайы үміткер.
