Pfizer онкологияға қарсы дәрі жасау жарысына кеш қосылды. Сарапшылар неге алаңдаулы?
Уолл-стрит сарапшылары Pfizer компаниясының қателесуге мүмкіндігі жоқ екенін ескертті.
Америкалық фармацевтикалық алпауыт Pfizer қатерлі ісікке қарсы жаңа дәрі жасау құқығын сатып алды. Алайда сарапшылардың пікірінше, компания бұл саладағы ең қызу бәсекеге кеш қосылып отыр. Бұдан бөлек, Pfizer бұл мәміле үшін тым қымбат төлеген. Жаңа дәрі үлкен табыс әкелмесе, инвестиция өзін ақтамай қалуы мүмкін. Айта кетсек, бұған дейін компания арықтататын дәрілер нарығындағы жарыстан да шығып қалған еді.
Мәміленің мән-жайы
Pfizer қытайлық 3SBio компаниясынан SSGJ-707 деп аталатын қатерлі ісікке қарсы дәріні әзірлеу, өндіру және сату құқығын 1,25 миллиард долларға сатып алатынын мәлімдеді. Келісімге сәйкес, егер жоба табысты дамыса және сатылымға шықса, Pfizer тағы 4,8 миллиард долларға дейін қосымша төлем жасайды. Сондай-ақ қытайлық компания болашақта роялти түрінде табыстың белгілі бір пайызын алып отырады.
Бұл келісім арқылы Pfizer онкологиялық биотехнология саласындағы ең қызу нарықтардың біріне аяқ басып отыр. Алайда Barron’s басылымының жазуынша, өзге фармацевтикалық алпауыттар мұндай мәмілелерді бірнеше жыл бұрын жасап қойған.
Жарыс 2024 жылдың маусымында қыза түсті. Сол кезде америкалық Summit Therapeutics компаниясы қытайлық Akeso компаниясымен бірлесіп жасаған жаңа дәрі өкпе обырын емдеуде Merck компаниясының атақты Keytruda дәрісінен де тиімдірек екенін мәлімдеді. Ал қарашада Merck тағы бір қытайлық компания — LaNova-мен серіктес болды. BioNTech те Biotheus компаниясымен бірге өз нұсқасын әзірлеуде. Еске сала кетсек, BioNTech пен Pfizer бұрын бірге коронавирусқа қарсы вакцина жасаған еді.
Қандай қауіп бар?
Pfizer нарыққа кеш қосылғаны үшін өте көп шығындалды: 1,3 миллиард доллар бірден және 4,8 миллиард доллар кейінгі кезеңдерде төленуі мүмкін. Бұл — өте ірі сома. Мысалы, Merck компаниясы LaNova-мен келісім жасағанда, тек 588 миллион доллар төлеп, болашақта 2,7 миллиардқа дейін ғана міндеттеме алған.
Аналитиктер Pfizer төлеген сома өзін ақтау үшін жаңа дәрі нарықта нағыз хит болуға тиіс деп отыр. Cantor Fitzgerald сарапшысы Картер Гулдтың пікірінше, бұл — өте тәуекелі көп мәміле. Ол дәрі тек бүкіл саланың жылдам дамуы немесе нарықтағы көшбасшылық арқылы ғана өз тиімділігін дәлелдей алады. Ал Pfizer үшін бұл мәміле жағдайды тіпті қиындатып жіберуі мүмкін.
CNBC жазуынша, Pfizer обырға қарсы дәрілерден үлкен үміт күтіп отыр. Себебі пандемия аяқталғаннан кейін компанияның бизнесі құлдырай бастады. 2030 жылға қарай Pfizer-дің 2023 жылы 17 миллиард доллар табыс әкелген дәрілерінің патенттік қорғауы аяқталады. Бұл компания табысының төрттен бірінен астамын құраған. Оның үстіне, биыл сәуірде Pfizer арықтататын дәрілер бағыты бойынша жарыстан шығып қалған болатын.
Barron’s-тың жазуынша, инвесторлар компанияның өсу стратегиясына әлі де күмәнмен қарайды. Pfizer жаңа дәрілерге қатысты үмітті мәмілелер арқылы ақтағысы келеді. 2023 жылы ол қатерлі ісікке қарсы биотехнологиялық Seagen компаниясын 43 миллиард долларға сатып алды. Ал 2025 жылы жаңа жобаларға тағы 10–15 миллиард доллар жұмсауға дайын. 3SBio-мен мәміле де осы стратегияға сай келеді. Бұл Pfizer-дің онкологиядағы келесі инновациялық толқыннан шет қалмауы үшін жасалған қадамы. Дегенмен бұл нарықта бәсеке күшейіп, орын тарылып барады.
Jefferies сарапшысы Цуй Цуйдің айтуынша, Akeso осы салада жоғары талап қойды. Олар нарыққа ерте шығып, Keytruda дәрісінен клиникалық жағынан тиімділігін дәлелдеген соң, стандартты емдеу тәсілімен бәсекелесе алатынын көрсетті.
Акциялар жағдайы қалай?
Сейсенбі күнгі сауда барысында Pfizer акциялары 3%-ға өсіп, соңғы екі аптадағы ең жоғары көрсеткішке жетті. Компания котировкасының көтерілуіне АҚШ реттеушісінің COVID-19-ға қарсы жаңа вакциналарды мақұлдауға қатысты талаптарды өзгерткені туралы жаңалық та әсер еткен болуы мүмкін. Barron’s басылымының жазуынша, инвесторларды қуантқаны — жаңа ережелер олардың күткендей қатаң болмай шықты.
2025 жылдың басымен салыстырғанда, Pfizer акциялары 11,5%-ға арзандады, ал пандемия кезіндегі ең жоғары бағасымен салыстырғанда олардың құны екі есе төмендеген.
MarketWatch деректеріне сүйенсек, Pfizer акцияларының қозғалысын 26 сарапшы бақылап отыр. Олардың көпшілігі (15) бейтарап ұстанымда және акцияларды портфельде ұстауға кеңес береді (Hold рейтингі). Он сарапшы компания акцияларын сатып алуды ұсынады (Buy және Overweight рейтингтері), ал біреуі олардан құтылуға кеңес береді (Sell).
Уолл-стриттің ортақ болжамы бойынша, Pfizer акциясының нысаналы бағасы – 28,2 доллар. Бұл 20 мамырдағы жабылу бағасынан 20%-ға жоғары.
