Польша ресейлік дрондарды атып түсіргенін мәлімдеді. Варшава биржасы құлдырады

Сәрсенбі күні Варшавада сауда-саттық барысында Польша акциялары мен ұлттық валютасы — злотый төмендеді. Бұған ел билігінің әуе кеңістігіне кіріп кеткен ресейлік дрондарды атып түсіргені туралы мәлімдемесі әсер етті.

Егжей-тегжейлі

Польшадағы WIG20 индексі 2,6%-ға құлдырап, соңғы екі аптадағы ең үлкен төмендеуді тіркеді. Bloomberg дерегінше, ол әлемдік ірі индекстердің ішінде ең нашар нәтиже көрсетті.

Көбіне құлдырағандар қатарында ірі бөлшек банктердің бірі — Alior Bank және Орталық және Шығыс Еуропадағы дискаунтерлер желісінің иесі Pepco Group болды. Олардың акциялары 3%-дан артық арзандады. Злотый да еуроға қатысты 0,5%-ға әлсіреді.

Жалпы алғанда, WIG20 биыл жақсы өсім көрсеткен: жылдың басынан бері 20%-дан астам көтерілген, бұл АҚШ-тың S&P 500 индексінен екі есе жоғары. Алайда соңғы апталарда инвесторлардың көңіл күйі банктерге салықты өсіру жоспарына байланысты нашарлаған.

Esaliens TFI инвестициялық қорының директоры Анджей Бенек қазіргі жағдайды «нарықтың уақытша реакциясы» деп сипаттады: «Билік геосаяси тәуекелдерге жауап ретінде қатаң қадам көрсеткісі келеді. Мұндай шешімдер әрқашан нарықта қатты әсер етеді», — деді ол.

Не болды?

Польша ресейлік дрондар шекарасын кесіп өткенін хабарлап, оны «агрессия актісі» деп атады. Елдің премьер-министрі Дональд Туск НАТО-ны 4-бап бойынша консультация өткізуге шақырды. Бұл бап альянс мүшелері қауіп төнген жағдайда бірлескен әскери жауап шараларын талқылауды көздейді.

Туск сонымен бірге: «Қазір біз соғыс жағдайында тұрмыз деуге негіз жоқ. Бірақ бұл оқиға алдыңғы жағдайлардан асып түсіп, Польша үшін анағұрлым қауіпті», — деп мәлімдеді.

Bloomberg жазғандай, бұл — 2022 жылы Ресейдің Украинаға басып кіргеннен бергі алғашқы жағдай, яғни НАТО-ға мүше ел өз әуе кеңістігіне кірген әскери ұшқышсыз аппаратты атып түсірді.

Ал Кремль бұл туралы пікір білдіруден бас тартты. Ресейдің айтуынша Польша тарапынан ресми байланыс орнатуға ешқандай өтініш түспеген.