«Позицияларды барлау»: Трамп Аляскадағы саммиттен не күтуге болатынын айтты
АҚШ президенті Дональд Трамп дүйсенбі күні Ресей президенті Владимир Путинмен Украинадағы бітім жөніндегі алдағы келіссөздерге қатысты күтулерді бәсеңдетуге тырысты, деп жазады Bloomberg. Ол бұл саммитті дипломатиялық шешімнің мүмкіндігін анықтау үшін «позицияларды барлау» деп атады.
Трамп не деді
«Мен Владимир Путинмен сөйлесіп, оған: «Бұл соғысты тоқтатуыңыз керек» деп айтамын», — деді Трамп Ақ үйдегі баспасөз мәслихатында. Ол сонымен бірге «келісімге келу-келмеуді шешу — менің міндетім емес» деп атап өтті.
«Мен жағдайды өз көзіммен көру үшін барамын, — деді ол. — Бәлкім, шығып: «Сәттілік» деп айтып, бәрі осымен тынар. Немесе бұл мәселенің шешілмейтінін айтуым мүмкін», — деп қосты ол.
Трамп сонымен қатар кездесуге Владимир Зеленскийді шақыру жоспары жоқ екенін айтты. «Ол талай кездесуге қатысқанын білесіздер. Ол сонда үш жарым жылдан бері жүр, бірақ ештеңе өзгерген жоқ», — деді ол.
Оның орнына АҚШ президенті Путинмен кездескеннен кейін Зеленскиймен және Украинадағы еуропалық одақтастарымен телефон арқылы сөйлесуді жоспарлап отырғанын хабарлады. Трамптың айтуынша ол оларға не ықтимал келісімнің нобайын ұсынады, не бейбіт келісімге қол жеткізудің мүмкін еместігін айтады.
Контекст
Айтқандай, Трамп пен Путин 15 тамызда Аляскада саммит өткізеді. Bloomberg-тің мәліметінше бұл Ресей президентінің АҚШ-қа соңғы он жылдағы алғашқы сапары болмақ. Өткен аптада агенттік дереккөздері Ресей Киевтен Донбассқа қарасты аймақтардан әскерін шығаруды талап етіп отырғанын хабарлады. Өз кезегінде Украина президенті Владимир Зеленский территориядан бас тартпайтынын мәлімдеді.
Трамп дүйсенбіде келіссөздер барысында АҚШ Ресей басып алған аумақтың бір бөлігін Украинаның қайтаруына тырысатынын айтты.
Нарық реакциясы
Мүмкін болатын келісім бойынша келіссөздерге дайындық аясында инвесторлар қорғаныс шығындарының өсуінен пайда көріп отырған еуропалық қорғаныс компанияларының акцияларын сата бастады. 11 тамызда Германияның Rheinmetall және Hensoldt қорғаныс концерндерінің бағамдары тиісінше 4,6% және 0,6%-ға төмендеді. Италияның әскери-өнеркәсіптік холдингі Leonardo SpA акциялары 0,7%-ға, Францияның Thales SA қорғаныс компаниясының қағаздары 0,3%-ға арзандады. Лондонда сауда кезінде Ұлыбританияның қорғаныс алыбы BAE Systems акциялары 1,2%-ға құлдырады.
