Qualcomm чип өндіруші Alphawave компаниясын сатып алуға келісті: бұл нені білдіреді
Британдық шағын капиталидық құны бар чип өндіруші Alphawave IP Group компаниясының акциялары Лондондағы саудада бір жылдан астам уақыт ішіндегі ең жоғарғы деңгейге дейін — ширектен астамға өсті. Инвесторларды қуантқан жаңалық — компания технологиялық алып Qualcomm-пен келісімге келіп, Alphawave акцияларын жоғары сыйақымен сатып алуға немесе оларды Qualcomm акцияларына айырбастауға келісті. Бұл мәміле Qualcomm үшін жасанды интеллект саласындағы портфелін күшейтуге бағытталған.
Егжей-тегжейлі
9 маусым, дүйсенбі күні Alphawave акциялары Лондон қор биржасындағы сауда барысында 26%-ға өсіп, 187,9 пенсқа (немесе 1,87 фунт стерлинг) жетті. Бұл 2024 жылғы 8 наурыздан бергі ең жоғары көрсеткіш.
Сол күні компанияны Aqua Acquisition сатып алатыны туралы келісім жарияланды — бұл Qualcomm компаниясына толық тиесілі еншілес ұйым. Qualcomm – әлемдік жартылай өткізгіш нарығының көшбасшыларының бірі және Apple-дің жеткізушісі. Мәміле сомасы шамамен $2,4 млрд немесе бір акция үшін $2,48 (183 пенс) болады. Бұл 6 маусым, жұма күнгі сауда жабылуындағы Alphawave акциялары құнынан 23%-ға жоғары. Сонымен қатар, бұл сома 31 наурыздағы деңгеймен салыстырғанда 96%-дық сыйақыны білдіреді — дәл сол күні Alphawave пен Qualcomm келіссөздер жүргізіп жатқандарын алғаш рет хабарлаған, деп жазады Bloomberg.
Alphawave акционерлеріне бірнеше өтемақы нұсқасы ұсынылған: ақшалай түрде немесе Qualcomm акцияларымен, олар мәміле аясында жаңадан шығарылып, Nasdaq биржасына орналастырылады. Мәселен, Alphawave акционерлері әр акция үшін тікелей 0,01662 жаңа Qualcomm акциясын ала алады. Немесе олар Alphawave акцияларын Qualcomm-тың айырбасталатын бағалы қағаздарына — А және B класты (Qualcomm Exchangeable Security) — айырбастай алады. Бұл қағаздар кейіннен Qualcomm акцияларына айналдырылатын болады, делінген хабарламада.
Alphawave акционерлеріне не ұсынады
2026 жылдың басында жабылуы жоспарланған мәмілені Alphawave акционерлері әлі мақұлдауы керек. Компанияның директорлар кеңесі мен инвестициялық кеңесшілері Qualcomm-ның ақшалай сатып алу немесе жаңа акцияларға айырбастау жөніндегі ұсынысын орынды деп санайды. Ал үшінші нұсқа — айырбасталатын бағалы қағаздар — әр акционерге әртүрлі әсер етуі мүмкін болғандықтан, оның артықшылықтарын немесе кемшіліктерін нақты бағалай алмайды, делінген Alphawave хабарламасында.
Мәмілені мақұлдау үшін Alphawave акцияларының 75%-ын ұсынған инвесторлар қолдау білдіруі тиіс, деп жазады Bloomberg. Компания мәліметінше шамамен 50%-ды құрайтын акционерлер мен директорлар мәмілені қолдап дауыс беруге келіскен.
Qualcomm-ға Alphawave не үшін қажет
Alphawave — деректерді өңдеу орталықтарына арналған жартылай өткізгіш технологияларды әзірлейтін және лицензиялайтын компания. Бұл Qualcomm үшін стратегиялық сатып алу болып отыр. Reuters агенттігі жазғандай, мамыр айында Qualcomm деректер орталықтарына арналған процессорлар нарығына қайта кіретінін хабарлаған болатын. Alphawave сәуір айының басында деректерді өңдеу жылдамдығын арттыратын технологиясы арқылы Qualcomm мен мобильді процессорлар жасаушы Arm-ның назарын аударды. Бұл технология жасанды интеллектті дамыту үшін аса маңызды, деп атап өтті агенттік.
«Біз бірге өсу үшін жаңа мүмкіндіктер ашамыз, инновацияны ынталандырамыз және жасанды интеллект негізінде есептеу мен байланыс салаларында жетекші ойыншыны қалыптастырамыз», — дейді Alphawave президенті және бас директоры Тони Пиалис (оның сөздері хабарламада келтірілген).
Bloomberg мәліметінше, смартфон нарығындағы өсім баяулаған сайын Qualcomm бұл нарыққа тәуелділікті азайтып, жаңа бағыттарға шығуға тырысып жатыр.
Контекст
The Guardian атап өткендей, бұл мәміле Лондон қор биржасы үшін тағы бір соққы болды. Соңғы уақытта бірқатар технологиялық компаниялар биржадан кетіп жатыр. Олар не ірі америкалық бәсекелестердің жұтып қоюына байланысты, не жақсы өтімділік пен жоғары бағалау іздеп, Нью-Йоркке листинг ауыстыруда, деп түсіндіреді басылым.
Мысалы, Wise финтех-компаниясы негізгі листингін АҚШ-қа ауыстыруды жоспарлап отырғанын инвесторларға хабарлады. Бұған дейін Deliveroo тағам жеткізу қызметі АҚШ нарығының көшбасшысы DoorDash тарапынан 2,9 млрд фунт стерлингке сатып алуға келісім берген.
