QuantumScape акциялары 20%-ға жуық өсті: Uber-Lucid келісімі себеп болды ма?
Электромобильдерге арналған аккумулятор өндіретін орташа капиталды QuantumScape компаниясының акциялары 17 шілде күні 20%-ға жуық қымбаттады. Бұған Uber мен Lucid арасындағы келісімге байланысты туындаған дүрлікпе қосымша серпін бергені байқалды. Бұл екі компания Tesla-ға бәсекелес болатын роботаксилер нарығына шығуға ниетті. Маусым айының соңынан бері QuantumScape қағаздары үш есеге қымбаттады — оған компания өз технологиясын жаңа даму кезеңіне өткені туралы жариялаған жаңалық түрткі болды. Бұл технология электромобильдердің өзіндік құнын арзандатуы мүмкін.
Егжей-тегжейлі
QuantumScape акциялары 17 шілде күні 19,8%-ға өсіп, $13,6-ға жетті. Бұл — олардың 2022 жылдың ортасынан бергі ең жоғарғы бағасы. Сол күнгі кейінгі сауда сессиясында баға тағы 5%-ға көтерілді.
Мұндай қарқынның негізгі себептерінің бірі — Uber мен Lucid арасындағы келісім болуы мүмкін. 17 шілдеде Uber компаниясы алдағы алты жылда АҚШ нарығына автономды басқару жүйесімен жабдықталған 20 мыңнан астам Lucid Gravity люкс-внедорожниктерін шығаруға ниетті екенін хабарлады. Бұл көліктер Nuro Driver төртінші буын жүйесімен жұмыс істемек. Сонымен қатар Uber Lucid-тің акцияларына $300 млн инвестиция салатынын мәлімдеді.
Бұл жаңалық маусым айының соңында басталған оң серпінді күшейтті. Сол кезде QuantumScape компаниясы өзінің литий-иондық аккумуляторларға арналған Cobra технологиясы базалық өндіріске өткенін хабарлады. The Motley Fool басылымының жазуынша бұл өндіріс кезеңі дайын өнім жасалатын деңгей саналады. 24 маусымда осы жаңалық жарияланғаннан кейін компания акциялары үш есе қымбаттады.
Бұл екі оқиға қалай байланысты?
QuantumScape қатты күйдегі аккумулятор (solid-state battery) технологиясын әзірлеп жатыр. Бұл аккумуляторлар қазіргі электромобильдерде қолданылатын батареялармен салыстырғанда арзан, бір қуатпен көбірек жол жүруге мүмкіндік беретін және қауіпсіздік көрсеткіштері жоғары болмақ. Бұл өз кезегінде электр көліктерінің қолжетімділігін арттыруы мүмкін, деп жазады Barron’s. Жоспар бойынша, дәл осы Cobra технологиясы жаңа үлгідегі аккумуляторларда қолданылатын болады.
Lucid компаниясы электромобиль өндірісінде қатты күйдегі аккумуляторларды пайдалануға ниетті екенін бұған дейін хабарлаған. Бұл туралы The Motley Fool жазады. Алайда басылым атап өткендей, Lucid бұл аккумуляторларды кімнен сатып алатынын нақтыламаған.
Сарапшылар не дейді
2025 жылдың басынан бері QuantumScape акциялары 162%-ға қымбаттады. Бұл өсімнің басым бөлігі 24 маусымнан кейін тіркелді. Осы оқиғадан кейін Baird Equity Research зерттеу компаниясы инвесторларға QuantumScape қағаздарын сатып алуға асықпауға кеңес берген есеп жариялады. Зерттеушілердің пікірінше әзірге компания өз технологиясын нарыққа шығарған жоқ, ал Baird оны іс жүзінде көрмей тұрып, бұл акцияларға инвестиция салуға кеңес бермейді.
MarketWatch порталындағы деректерге сүйенсек, Уолл-стриттегі сарапшылардың да бұл компанияға деген көзқарасы әлі де сақтықпен қарайды. QuantumScape-ті бақылап отырған жеті сарапшының ішінде тек біреуі ғана «сатып алу» туралы кеңес берген. Төртеуі — «ұстай тұру», ал екеуі — «сату» деп бағалаған. Акция бойынша орташа мақсатты баға $6,83 деңгейінде белгіленген — бұл қазіргі нарық бағасынан төмен.
