Robinhood S&P 500 тізіміне кірмеді: бұл инвесторларға қандай сабақ бермек?
Трейдингке арналған Robinhood сервисі АҚШ-тың басты индексі S&P 500 тізіміне енбей қалды. Бұл жаңалық компания акциялары өседі деп күткен инвесторлардың үмітін ақтамады. Статистика көрсеткендей, индекс түзетулері жарияланғаннан кейінгі алғашқы күні акциялардың өсуінен табыс табу барған сайын қиындап барады. Дегенмен, басқа бір жол бар — қауесеттерге сүйеніп ұтымды әрекет ету, деп санайды MarketWatch.
Егжей-тегжейлі
Онлайн-трейдингке арналған Robinhood Markets платформасының S&P 500 индексіне енбей қалуы күтпеген шешім болды. Өткен аптада Bank of America бұл сервисті индекс құрамына кіруге «негізгі үміткер» деп атаған еді. Олар компанияның өсіп келе жатқан нарықтық капитализациясын және акцияларының саудадағы динамикасын мысалға келтірген: қазіргі таңда қағаздар 2025 жылдың басымен салыстырғанда 93% қымбат. 6 маусым, жұма күні — S&P 500 индексіне түзетулер күтілген сәтте — Robinhood акциялары сауданы $74,88 деңгейінде аяқтады. Бұл баға — 2021 жылдың маусымында өткен IPO-дан бері қағаздардың ең жоғары жабылу құны.
S&P Dow Jones Robinhood-ты S&P 500 индексіне қоспағандықтан (және жалпы тоқсан сайынғы қайта теңгеру кезінде индекске ешқандай өзгеріс енгізбегендіктен), келесі сауда күні — 9 маусым, дүйсенбіде — премаркетте Robinhood акциялары шамамен 7% күрт құлдырады, деп хабарлады Barrons. Дегенмен нарық өз реакциясының шамадан тыс болғанын тез түсінді: акциялар біршама қалпына келгенімен, күнді 2% құлдыраумен аяқтады, деп атап өтті MarketWatch.
Кей трейдерлердің қысқа мерзімді көңілсіздігіне қарамастан, қазіргі кезде S&P 500 индексіне қосылу акция бағасына бұрынғыдай әсер етпеуі мүмкін — яғни олар күткендей нәтиже бермейді, деп жазады MarketWatch.
Бұрын қалай болған? Зерттеушілер түсіндіреді
Гарвард бизнес мектебінің профессорлары Марко Сэммон мен Робин Гринвудтің сәуірде жарияланған зерттеуіне сәйкес, акциялардың биржалық индекс құрамына енгені жарияланған күнгі орташа бағам өсімі қазір айтарлықтай төмендеп кеткен — мысалы, 1990-жылдармен салыстырғанда әлдеқайда аз.
Сэммон мен Гринвуд 1980 жылдан 2020 жылға дейін S&P 500 индексіне қосылған барлық компанияларды талдаған. Олардың дерегінше, 1990-жылдары акцияның индекс құрамына енгені жарияланғаннан кейінгі алғашқы күнгі орташа өсімі 7,4%-ға жеткен. Ал 2010-жылдары бұл әсер бар болғаны 0,8%-ға дейін төмендеген. Профессорлар бұл құбылысты «индекс әсерінің жоғалуы» деп атаған.
Бұдан табыс табудың жолы бар ма? Robinhood кейсі
Егер индекстегі түзетулер жарияланғаннан кейін акциялар өспейтін болса, онда оған дейінгі динамикасына назар аударған жөн. Robinhood акциялары S&P 500 индексіне енгізуге қатысты түзетулер күнінен бірнеше апта бұрын нарықтан айтарлықтай озық қозғалды. 6 маусымға дейінгі бір ай ішінде қағаздар 53,8% қымбаттаған, ал S&P 500 небәрі 7,2% ғана өскен, деп жазады MarketWatch. Оның пікірінше, бұл — «қауесет кезінде сатып алып, жаңалықтар кезінде сату» қажет болатын классикалық жағдай.
Егер инвестор келесі жолы индекс түзетулерінен табыс тапқысы келсе, онда түзетулер туралы ресми хабарланар күннің алдында, индекс құрамына енуі мүмкін акцияларды сату туралы ойланғаны жөн, деп есептейді MarketWatch. Компания шынымен индекс құрамына енген күннің өзінде, инвестор баға өсімінің тек аз ғана бөлігінен айырылуы мүмкін, деп атап өтті басылым.
Сонымен қатар, ресми хабарлану алдында сату — инвесторға компанияның индекс құрамына енбей қалуы жағдайында бағалардың төмендеуінен сақтануға мүмкіндік береді. Дәл осындай жағдай Robinhood акцияларында орын алды, деп қосты MarketWatch.
