Roblox акциялары 15%-ға құлады. Қауіпсіздікке кеткен шығындар сұрақ тудыруда
30 қазан күнгі сауда барысында Roblox ойын платформасының акциялары тоқсандық есеп жарияланғаннан кейін 15%-ға төмендеді. Инвесторларды компанияның күрделі шығындарын арттыру жоспары алаңдатты. Roblox бұл шешім операциялық маржаның қысқаруына әкелуі мүмкін деп ескертті.
Егжей-тегжейлі
Roblox акциялары бейсенбі күнгі сауда қорытындысы бойынша 15,5%-ға төмендеп, $113 деңгейінде жабылды. Бұл — шілденің ортасынан бергі ең төменгі баға. Негізгі сессиядан кейінгі кеңейтілген саудада бағалы қағаздар шамамен 2%-ға өсті.
CNBC-дің дерегінше инвесторлар компанияның күрделі шығындарды өткен жылдағы болжаммен салыстырғанда $158 млн-ға арттыру жоспарын құп көрмеді. Ойын жасаушыларға арналған платформа инфрақұрылымды жаңарту мен қауіпсіздік шараларын күшейту қажеттілігіне байланысты 2025 жылы капиталды шығындар $468 млн-ға жетеді деп мәлімдеді (бұрынғы болжам — $310 млн).
«Біздің операциялық маржа жылдық көрсеткіште аздап төмендеуі мүмкін. Бұған DevEx мөлшерлемесінің өсуі (виртуалды Robux валютасын долларға айырбастау бағамы — Oninvest) және инфрақұрылым мен қауіпсіздікке қатысты инвестициялардың әсері себеп болады», — делінген Roblox компаниясының акционерлерге жолдаған хатында. Developer Exchange (DevEx) бағдарламасындағы мөлшерлеменің артуы Robux бағамының долларға шаққандағы өсуін білдіреді, бұл өз кезегінде компания шығындарының ұлғаюына алып келеді, деп түсіндіреді CNBC.
Компанияның есебі
Үшінші тоқсан бойынша есеп негізгі көрсеткіштер тұрғысынан мықты болды: кіріс жылдық есепте 48%-ға өсіп, $1,36 млрд-қа жетті. Брондау көлемі (Bookings) 70%-ға артып, $1,92 млрд болды — бұл LSEG болжамынан ($1,65 млрд) жоғары, деп жазады CNBC. Акцияға шаққандағы шығын $0,37 болды, бұл Уолл-стрит күткен $0,49-дан аз.
Roblox-тың тәуліктік орташа аудиториясы 70%-ға артып, 151,5 млн пайдаланушыға жетті. Алайда, бір пайдаланушыға шаққандағы орташа брондау (ARPU) $12,68 құрап, StreetAccount күткен $13,24-тен төмен болды, деп атап өтеді CNBC. Дегенмен, компания жылдық брондау болжамын $5,87–5,97 млрд деңгейінен $6,57–6,62 млрд диапазонына дейін көтерді.
Қауіпсіздік мәселесі неде?
CNBC-дің хабарлауынша Roblox соңғы кезде әртүрлі елдердің мемлекеттік органдары жүргізіп жатқан тергеулерге, заң шығарушылардың шағымдары мен сот істерінің көбеюіне байланысты балалардың қауіпсіздігіне баса назар аударуға мәжбүр болды. Платформаға кәмелетке толмағандарды жыныстық тұрғыда пайдалануға жол ашты деген айыптар тағылған бірнеше сот істері қозғалды. Мәселен, Түркия билігі жыл басында «балалардың қауіпсіздігіне байланысты» Roblox платформасын бұғаттады. Компания балаларды ересектердің онлайн-чаттардағы ықпалынан қорғауға жеткілікті шаралар қабылдамағаны үшін сынға ұшырады.
Roblox бас директоры Дэвид Безуки CNBC арнасына берген сұхбатында қауіпсіздіктің компания үшін басты басымдық екенін айтты. Roblox-та суреттер жіберуге тыйым салынған, барлық мәтін сүзгіден өтеді, ал шілде айында бет сканері арқылы жас растайтын жүйе іске қосылды. Платформа пайдаланушыларды жас санаттарына бөледі: 13 жасқа дейін, 13–18 жас және 18 жастан жоғары. «Сенімді байланыстар» сияқты функциялар тек үлкендер тобына қолжетімді, деп жазады CNBC.
Сарапшылар не дейді
2025 жылы (30 қазан саудасының соңына дейінгі мәлімет бойынша) Roblox акциялары 95%-ға өсті. Бағалы қағаздар бойынша 35 талдау рейтингі бар: олардың ішінде 24-і «сатып алу» (Buy, Overweight), сегізі «ұстау» (Hold), үшеуі — «сату» (Sell, Underweight), деп көрсетеді MarketWatch. Орташа мақсатты баға — $150,64, бұл 30 қазан күнгі биржа жабылу деңгейінен шамамен үштен бірге жоғары.
