Rocket Lab ғарыш компаниясының акциялары рекордқа жетті
Жер орбитасына өз зымырандарымен жүк жеткізетін және Илон Масктың SpaceX компаниясымен бәсекелес Rocket Lab акциялары 10% өсіп, тарихи ең жоғары деңгейін жаңартты. Өсу компанияның кезекті сәтті ұшырылымынан кейін басталды және биылғы нәтижесін одан әрі күшейтті. 2025 жылдың басынан бері компанияның нарықтағы құны үш есе артты, бірақ Уолл-стрит әлі де бұл қағаздарды сатып алуға кеңес береді.
Егжей-тегжейі
Дүйсенбі, 22 желтоқсанда Rocket Lab акциялары 10% қымбаттап, Nasdaq биржасындағы рекордын жаңартты. Ал жұма, 19 желтоқсанда компания акциялары бірден 18% өскен. Осылайша жыл басынан бері Rocket Lab капитализациясы 200%-дан аса ұлғайды.
Жұма күні компания тарихындағы ең ірі бір реттік келісім жасалғаны белгілі болды: Rocket Lab АҚШ-тың Ғарыштық даму агенттігімен $816 млн келісімге қол қойған, деп хабарлайды Barron's. Бұл мәміле аясында төмен орбитадағы спутниктер желісі жобасы үшін 18 спутник жобалап, өндіруі керек.
Ал жексенбі күні Rocket Lab биылғы 21-ші ұшырылымын өткізді. Benzinga мәліметінше, бұл биылғы старт саны бойынша рекордты тағы да өсіріп, миссиялардың 100% сәтті өткенін көрсетті. Ұшырылым Жапонияның Institute for Q-shu Pioneers of Space ұйымымен жасалған келісім аясында өтті. Ол компания Жерді түсірумен айналысады.
Сарапшылар не дейді?
Жаңа келісім жарияланғаннан кейін Stifel талдаушысы Эрик Расмуссен Rocket Lab акцияларын сатып алу туралы ұсынысын сақтап, мақсатты бағасын $75-тен $85-ке көтерді, деп жазады Barron's. Бұл 22 желтоқсандағы жабылу бағасымен салыстырғанда шамамен 10%-ға жуық өсу әлеуетін білдіреді.
FactSet дерегінше, Rocket Lab акциясын қадағалайтын талдаушылардың 67%-ы Buy (сатып алу) рейтингін берген. Салыстыру үшін, S&P 500 индексі бойынша мұндай ұсыныстардың орташа үлесі шамамен 55%, дейді Barron's. Компания акциясын сатуға кеңес беретін талдаушы жоқ. Бірақ MarketWatch бойынша орташа мақсатты баға $66-дан сәл жоғары, бұл соңғы жабылу деңгейінен 15% төмен.
Контекст
CNBC жазуынша, салаға қосымша серпін АҚШ президенті Дональд Трамп жұма күні қол қойған “АҚШ-тың ғарыштағы басымдығын қамтамасыз ету” туралы жарлықтан да келді. Мақсаттардың ішінде 2028 жылға дейін Айға қайта оралу, Айда тірек пункт құру және салаға инвестицияны арттыру бар. Бұл жалпы ғарыш технологиялары секторындағы акцияларға қолдау көрсетті. Телеканал атаған тағы бір жақсы жаңалық — NASA басшысы қызметіне миллиардер, Илон Масктың одақтасы Джаред Айзекманның бекітілуі.
Тамызда биржаға шыққан Firefly Aerospace акциялары 16% қымбаттады, ал Intuitive Machines қағаздары Keybanc талдаушысы сатып алуға кеңес бергеннен кейін шамамен 11% өсті.
