S&P 500 мен Dow Jones индекстері рекорд жаңартты. Oracle-дың қандай қатысы бар?
Oracle акциясының құлдырауы капиталдың ЖИ секторынан АҚШ экономикасының өсуінен пайда көретін компанияларға бағытталған ротациясын қозғады. Осы ротация ФРЖ мөлшерлемені төмендеткеннен кейінгі келесі күні Dow Jones пен S&P 500 индекстерінің жаңа рекорд орнатуына ықпал етті. Ал технологиялық Nasdaq Composite күннің аутсайдері болды.
Егжей-тегжейлі
— «Көгілдір фишка» саналатын Dow Jones Industrial Average индексі 11 желтоқсанда 1,34% шарықтап, 48 704 пунктқа жетіп, жаңа тарихи максимум орнатты. Индекс Visa акциясының өсуінен қолдау алды — Bank of America сарапшылары компания қағазын сатып алуды ұсынып, соңғы он жылдағы ең төмен мультипликаторларды атап өтті. Oracle-дың әлсіз есебінен кейін инвесторлардың техсектордан шығуы Dow құрамындағы тұрақты циклдік компанияларға капитал ағымын күшейтті, деп жазды CNBC.
— Кең нарықты қамтитын S&P 500 индексі 0,2% өсіп, 6901 пунктқа дейін жетіп, тарихи максимумды жаңартты. Индекске ЖИ-сектордан капиталдың ротациясы мен тұтынушылық компаниялар акциясының өсуі демеу болды, бірақ Oracle-дың теріс әсері және Nvidia мен Broadcom акциясының төмендеуі өсімді шектеді.
— Технологиялық Nasdaq Composite индексі 0,25% төмендеп, 23 594 пунктқа дейін түсті. Бұл — жасанды интеллектке қатысты компаниялардың жаппай сатылымы салдарынан индекс күннің аутсайдері болғанын көрсетеді.
— Russell 2000 шағын капитализациялы компаниялар индексі 1,24% күрт өсіп, АҚШ ФРЖ мөлшерлемені төмендеткеннен кейінгі импульсты сақтап қалды. Қарыз алу құнының арзандауы шағын компаниялар үшін ерекше маңызды, деп түсіндірді CNBC. Russell 2000 Федрезерв шешімінен кейін жеткен сәрсенбідегі рекордтық максимумын қайта жаңартты.
ЖИ-секторында не болды?
Oracle акциясы тоқсандық есеп жарияланғаннан кейін 11%-дан аса құлдырап, қаңтардан бергі ең нашар біркүндік нәтижесін көрсетті. Bloomberg есептеуінше, компания бір ғана сауда сессиясында $100 млрд-тан аса нарықтық капитализация жоғалтты. Ал оның негізін қалаушылардың бірі Ларри Эллисонның байлығы $24,9 млрд-қа азайып, ол миллиардерлер рейтингінде екінші орыннан үшінші орынға төмендеді.
Oracle-дың өткен тоқсандағы табысы және шығындар бойынша болжамның $15 млрд-қа ұлғаюы инвесторлардың көңілін қалдырды. Бұл компанияның қарыз жүктемесіне қатысты алаңдаушылықты күшейтті: оның кредиттік тәуекел көрсеткіші соңғы 16 жылдағы максимумға жетті, деп жазды агенттік. Инфрақұрылымға салынған инвестициялар бұлтты сервистерден түсетін табыстан жылдамырақ өсіп жатыр — бұл нарық қатысушыларына ұнамайды, деді CNBC.
Есеп сондай-ақ, технологиялық компаниялардың бағалау деңгейіне қатысты бұрыннан бар күдіктерді қайта алға шығарды. Бұл — қарашадағы құбылмалылықты күшейткен факторлардың бірі еді, деп атап өтті Bloomberg. Осы жағдайда чипмейкерлер Nvidia мен Broadcom акциясы арзандады — 1%-дан астам жоғалтты. Жад модульдерін жеткізуші Micron қағазы 2% құлады.
Бұған дейін капиталық шығындарға арналған инвестициялар Nvidia және басқа ЖИ-чип өндірушілерінің акциялар өсуін қолдағанымен, инвесторлар енді бұл шығындардың қаншалықты тұрақты екеніне алаңдай бастады. Әсіресе Oracle және басқа бұлтты сервис компанияларының ChatGPT әзірлеушісі OpenAI-мен жасалған келісімшарттарға тым тәуелділігі алаңдаушылық туғызуда, деп жазды Barron’s. Сондай-ақ, Nvidia инвесторларын Oracle-дың Эллисон жариялаған жаңа «бейтарап саясат» аясында басқа өндірушілердің жартылай өткізгіштерін қолдануды жоспарлауы да мазасыздандыруы мүмкін, деді басылым.
Сарапшылар пікірі
— «Oracle қарыз есебінен қаржыландырылып жатқан дата-орталықтарды жаппай кеңейтуге байланысты өсіп келе жатқан назарға және ірі тапсырыс берушілерге тым тәуелді болу қаупіне тап болып отыр. Әсіресе ЖИ-инвестициялардың тиімділігіне қатысты белгісіздік жағдайында бұл тәуекел күшейе түседі, — деді Bloomberg-ке Emarketer сарапшысы Джейкоб Борн. — Компания табысы Уолл-стрит күткен деңгейге жетпеуі сақ инвесторлардың Oracle-дың OpenAI-мен келісіміне және ЖИ-ға бағытталған агрессивті шығынына қатысты алаңдаушылығын арттыруы мүмкін».
— «Жалпы алғанда, Oracle-дың ЖИ және бұлтты технологиялар сегменттеріндегі негізгі көрсеткіштері, сондай-ақ орындалмаған тапсырыстар көлемі саланың ЖИ-революциясы аясында сұраныстың мықты әрі тұрақты екенін дәлелдейді, — деді CNBC келтірген Wedbush Securities сарапшылары. — Бүгінгі сектордағы жаппай сатылымды біз сатып алу үшін айқын мүмкіндік деп санаймыз. Oracle өткен түнде сұраныстың іргелі базасы бар екенін тағы да көрсетті».
— «Нарықтың Oracle төңірегіндегі жағдайға, жалпы алғанда ЖИ-инвестициялар тарихына қатысты алаңдауы орынды, — деді CNBC-ге Interactive Brokers бас стратегі Стив Сосник. — Мұнда сөз триллиондаған доллар туралы, бірақ осының бәрі нақты қалай жүзеге асатыны әлі түсініксіз. Oracle белгілі бір деңгейде көмір шахтасындағы канарейка рөлін атқарып тұр. Нарық бұл трендтен біраз шегінуге құқылы».
Сосниктің айтуынша, жыл соңындағы «Санта-Клаус раллиі» қазір алдын ала анықталғандай көрінеді және S&P 500 индексін 7000 пункт межесінен асыруы мүмкін. Алайда, кейін ол кең нарыққа қысым түседі деп күтеді және 2026 жылдың соңына арналған индекс бойынша мақсатты деңгейін 6500 пункт деп белгілеген.
