Сұраныстың азаюы мен баж салығы Guinness иесінің пайда көрсеткішін төмендетті
Әлемдегі ең ірі алкоголь өндіруші Diageo компаниясының (Guinness пен Johnnie Walker брендтерінің иесі) жылдық пайдасы инфляцияның, сұраныстың төмендеуі мен басқарудағы дағдарыстың салдарынан шамамен 30% қысқарды. Дегенмен, есеп жарияланғаннан кейін компанияның акциялары өсім көрсетті. Инвесторларды жігерлендіретін болжамдар, үнемдеу жоспарлары және сарапшылар күткеннен жоғары болған органикалық сатылым өсімі тыныштандырды.
Егжей-тегжейлі
2025 жылдың 5 тамызында Лондон биржасында сауда басталғанда Diageo акциялары 7%-ға дейін шарықтады, бұл – компанияның жылдық есебін жариялауымен байланысты. Алайда келесі сағаттарда олардың өсімі 1%-ға дейін баяулады. Ал жыл басынан бері қағаздары құнының 30%-ын жоғалтты.
30 маусымда аяқталған 2025 қаржылық жылы ішінде Guinness пен Johnnie Walker өндірушісінің операциялық пайдасы 27,8% қысқарып, $4,3 млрд-ты құрады. CityAM-нің жазуынша, сарапшылар $5,65 млрд пайда күткен. Дегенмен Reuters хабарлауынша, инвесторларды компанияның 2026 қаржылық жылы кірісінің нөлдік өсімі күтілетіні туралы мәлімдемесі (сауда баждары салдарынан $200 млн залал болатынына қарамастан) біршама тыныштандырды.
Diageo компаниясының табысы 0,1% қысқарып, $20,2 млрд-ты құрады, ал CityAM келтірген сарапшылар оны 1,4% өседі деп болжаған еді.
Басқа көрсеткіштер бойынша есеп нарық күтулерінен жоғары болды: 2025 қаржылық жылы компанияның органикалық сатылымдары 1,7% өсіп, ішкі сауалнама бойынша сарапшылар күткен 1,4%-дан асып түсті, деп жазады Reuters.
Компания болжамына сәйкес, 2026 қаржылық жылының алғашқы жартысында органикалық сатылым сәл төмендейді, ал негізгі өсім келесі жылдың екінші жартысында байқалмақ. Сонымен қатар шығындарды үнемдеу жоспары $625 млн-ға дейін ұлғайтылды, бұл — бұған дейінгі жоспардан $125 млн-ға артық.
«Макроэкономикалық белгісіздік пен тұтынушыларға көрсетілетін қысым алкоголь нарығына әсер етуді жалғастырып жатқанымен, біз саланың ұзақмерзімді тартымды перспективасына және TBA (total beverage alcohol – жалпы алкоголь нарығы) сегментін трансформациялау арқылы үдемелі өсімді қамтамасыз ету қабілетімізге сенеміз. Компания өз бақылауындағы факторларға басымдық беріп, барынша жылдам әрекет етуде. Директорлар кеңесі мен менеджмент акционерлер үшін жоғары қаржылық нәтиже мен тұрақты табыстылыққа қол жеткізуді мақсат етіп отыр», — деді уақытша бас директор Ник Джангиани Yahoo-ға берген пікірінде.
Неге пайда көрсеткіші төмендеуде?
Алкоголь өндірушілері тұтастай алғанда саладағы ұзаққа созылған сатудағы бәсеңдеу аясында қиындықтарға тап болып отыр: жоғары пайыздық мөлшерлемелер мен инфляция тұтынушылардың сатып алу қабілетін төмендетуде, деп жазады Reuters.
Johnnie Walker вискиі мен Smirnoff арағын өндіретін Diageo инвесторлар тарапынан басқарудағы тұрақсыздыққа қатысты алаңдаушылықпен де бетпе-бет келіп отыр. Өткен айда бас директор Дебра Крюдің күтпеген жерден қызметінен кетуінен кейін компания мамыр айында жарияланған шығындарды қысқарту және 2028 жылға дейін активтерді жаппай сату жоспарын іске асыратын жаңа басшыны іздеуде.
Уақытша CEO қызметін атқарып отырған Ник Джангиани конференция барысында журналистерге директорлар кеңесі бұл бағытта белсенді жұмыс істеп жатқанын, ал жаңа басшы туралы шешім қазан айының соңына дейін қабылданатынын айтты, деп хабарлайды агенттік.
Компанияға қосымша қысым тұтынушылық мінез-құлықтың өзгеруінен туындап отыр — салауатты өмір салтына көшу, алкогольге балама ретінде каннабис қосылған сусындарға қызығушылықтың артуы, сондай-ақ Diageo-ның басты нарығы саналатын АҚШ-пен сауда қатынастарына қатысты белгісіздік. Вашингтонмен жасалған сауда келісімдері бойынша Diageo өнімдерін АҚШ-қа импорттау кезінде Ұлыбританиядан келген тауарларға 10%, ЕО-дан келгендерге 15% баж салығы салынады. Дегенмен компания келіссөздер арқылы бұл салықтан босатуға үміттеніп отыр, деп жазады Reuters.
Diageo күшті алкоголь сегментіндегі төмендеуді Guinness брендіне деген сұраныстың артуы есебінен өтейді деп үміттенген. CityAM-нің жазуынша, соңғы жылдары бұл өнімге деген қызығушылық Z буыны тарапынан артты, оған әлеуметтік желілердегі белсенділік те ықпал етті. Бұған дейін компания Guinness брендін дербес бизнеске айналдырып, оны шығындарды қысқарту бағдарламасы аясында бөліп шығарады деген болжамдар болған. Алайда бұл шешімді ресми түрде растаған ешқандай мәлімдеме жоқ, деп атап өтеді басылым.
Сарапшылар пікірі
Аналитиктердің айтуынша, компанияның нәтижелері мен оның ағымдағы қаржылық жылға арналған болжамы күрделі нарықтық жағдайды ескере отырып, үміт күттірерлік көрінеді және сарапшылардың күтулерімен сәйкес келеді, деп жазады Reuters.
«Бұл нәтижелер таңқалдырмауы мүмкін, бірақ тұтыну секторындағы компанияларға сай келеді — олар болжамды», — деп атап өтті RBC Capital Markets сарапшысы Джеймс Эдвардс-Джонс өзінің жазбасында. RBC Diageo қағаздарына бейтарап рейтинг берді, бұл «ұстау» ұсынысына сәйкес келеді.
Robinhood UK жетекші сарапшысы Дэн Лейннің айтуынша, Guinness-тің танымалдылығы шарықтап тұрған сәттің өзінде Diageo-ның пайдасы мен маржасы едәуір қысымға ұшырады, бұл – алаңдауға толық негіз береді, деп жазады Yahoo Finance.
«Diageo-ға байланысты оптимистік сценарий жастар ішімдікті азайтып, бірақ сапасына мән бере бастады деген ұстанымға негізделген. Алайда жоғары инфляция салдарынан тұтынушылар «жоғарғы сөреге» қол жеткізе алмай қалды, әрі ішімдікті аз ішіп, арзанырақ нұсқаларға ауысқан сыңайлы», — деді Robinhood UK жетекші сарапшысы Дэн Лейн.
UBS сарапшылары есеп жарияланған соң Diageo қағаздарына «Сатып алу» рейтингін берді. Банк сарапшысы Санджит Ауджла компания әлсіз өсім жағдайында нәтижелерінің ашықтығын жақсартты, деді. Сонымен қатар, оның айтуынша, 2025/26 қаржылық жылға қатысты табыс пен пайда бойынша болжамдар нарық күтулерінен асып түсті, ал шығындарды азайту мен маржаны жақсарту бойынша мақсаттар да болжамнан жоғары болды.
Diageo акцияларын талдайтын 23 сарапшының ішінен 13-і оларды сатып алуға кеңес береді (Buy және Overweight рейтингтері), жетеуі — ұстауға (Hold), ал үшеуі — сатуға (Sell) ұсыныс білдірген.
