Сарапшылар Palo Alto акцияларына 8% төмендегеніне қарамастан сеніп отыр
20 қарашада киберқауіпсіздік шешімдерін ұсынатын Palo Alto Networks компаниясы тоқсандық есебін жариялағаннан кейін акциялары 8%-ға дейін құлдырады. Есеп көрсеткіштері жаман болмағанымен, инвесторларды онша таңғалдырмады. Соған қарамастан, Уолл-стриттегі кейбір сарапшылар бұл акцияларды сатып алуға кеңес беруді жалғастырып отыр. Олар Palo Alto-ны ЖИ дәуіріндегі киберқауіпсіздікке деген сұраныстың негізгі бенефициары ретінде көреді.
Егжей-тегжейі
Palo Alto акциялары 20 қарашада шамамен 7,5%-ға арзандап, $185 деңгейіне дейін түсті. Сауда кезінде ең төменгі баға — $183,7. Бұл — тамыз айының соңынан бергі ең төмен көрсеткіш. Дегенмен, 2025 жылдың басынан бері компанияның нарықтық құны 1%-ға өсті. Салыстыру үшін: S&P 500 индексі сол кезеңде шамамен 12,5%-ға артты.
Компания сарапшылардың табыс пен кіріс жөніндегі күткенінен асып түсті. Дегенмен бұл акция бағасын ұстап тұруға жеткіліксіз болды. Barron’s мәліметінше, өткен тоқсандағы түзетілген таза пайда бір акцияға шаққанда 93 цент болды (болжам — 89 цент), ал кіріс жылдық есеппен 16%-ға артып, $2,47 млрд-қа жетті (күтілген — $2,46 млрд). Сонымен қатар, Palo Alto бақылау құралдарына маманданған киберқауіпсіздік компаниясы — Chronosphere-ді $3,35 млрд-қа сатып алатынын хабарлады.
Сарапшылар не дейді?
– Evercore ISI сарапшысы Питер Левин Barron’s-ке: «Акциялар арзандаса, сатып алу керек. Palo Alto-ның ұзақмерзімді негізі мықты, платформа тез енгізіліп жатыр, ал компания ірі корпоративтік сегментте үлесін арттыруда», — деді. Оның мақсатты бағасы — $250, бұл қазіргі деңгейден 35%-ға жоғары. Левин сондай-ақ Chronosphere келісімі акционерлерге ұнайды деп есептейді. Бұл кибершабуылдардың алдын алуға көмектеседі.
– DA Davidson сарапшысы Руди Кессингер де бұл акцияларды сатып алуға кеңес беріп, мақсатты бағаны $240 деңгейінде қалдырды (шамамен 30%-ға жоғары). Оның пікірінше, Chronosphere-дің сатып алынуы жазылу қызметтерінен түсетін кірісті арттырып, платформаны кеңейтуге жол ашады. Қысқа мерзімде акцияларға келісімге кеткен шығындар әсер етуі мүмкін, бірақ бұл төмендеу — жақсы кіру нүктесі, деді Кессингер.
– Rosenblatt сарапшысы Кэтрин Трибник те сатып алу ұсынысын сақтап, мақсатты бағасын $250 деңгейінде қалдырды. Ол акция бағасының төмендеуі компанияның көрсеткіштеріне емес, нарықтағы көңіл күйге байланысты екенін айтты. Трибниктің пікірінше, Palo Alto ЖИ дәуіріне бейімделіп, киберқауіпсіздік, идентификация және бақылау сегменттерінде белсенді кеңеюде.
Жалпы баға қандай?
Palo Alto Networks акцияларын бақылайтын 55 сарапшының ішінен: 42 сарапшы сатып алуға кеңес береді (Buy және Overweight), 12 маман нейтралды көзқараста (Hold), тек 1 ғана аналитик сатуға кеңес береді.
Уолл-стриттің орташа мақсатты бағасы — $226. Бұл 20 қарашадағы жабылу бағасынан шамамен 22%-ға жоғары.
