Slide IPO-сы: Флоридадағы жоғары тиімді тұрғын үй сақтандырушысы нарыққа шықты
Алдын ала сауда Freedom клиенттеріне арналған сауда жүйесінде америкалық Slide Insurance сақтандыру компаниясының акцияларымен басталды. Құнды қағаздар SLDE.US тикерімен қолжетімді. Келесі сәрсенбіде олар Nasdaq биржасында пайда болады.
Егжей-тегжейлі
Slide Insurance және оның акционерлері кеңейтілген IPO аясында $408 млн тартты. Компания 24 млн акцияны бір данасы $17 бағамен орналастырды. Bloomberg деректеріне сүйенсек, ұзақмерзімді инвесторлар тарапынан Slide Insurance акцияларына сұраныс ұсыныстан едәуір асып түсті.
Бастапқыда Slide Insurance биржаға бір данасы $15–17 аралығындағы бағамен 20 млн акция шығаруды жоспарлаған. Диапазонның жоғарғы шегінде осындай көлемде акция орналастыру Slide-тың нарықтық құнын $2,1 млрд деңгейінде көрсеткен болар еді.
IPO ұйымдастырушылары Barclays пен Morgan Stanley болды, сондай-ақ Citizens Capital Markets, Keefe, Bruyette & Woods (Stifel еншілес компаниясы) және Piper Sandler да қатысты.
Компания несімен қызықты
Slide Insurance компаниясын 2021 жылы Брюс Лукас негіздеген. Бұған дейін ол Флоридадағы Heritage Insurance компаниясын басқарған және оны елдегі ең жылдам дамушы сақтандыру компаниясына айналдырған. Reuters атап өткендей, 2024 жылы Slide Insurance компаниясындағы Лукастың жиынтық сыйақысы $21,2 млн жеткен — бұл тіпті ірі ұлттық сақтандыру компанияларының топ-менеджерлерімен салыстырғанда да жоғары көрсеткіш.
Slide жеке үйлер мен кондоминиумдарды сақтандыру полистерін Флорида мен Оңтүстік Каролинада ұсынады. 2025 жылдың бірінші тоқсанында компанияның пайдасы 69%-ға өсіп, $92,5 млн жетті. Slide-тың сақтандыру портфелінің 99,5%-ы Флоридада шоғырланған — бұл компанияның өз қатысуын кеңейтуге тырысатын штат, алайда кейбір сақтандыру компаниялары бұл нарықтан кетіп жатыр, себебі стихиялық апаттар, әсіресе дауылдар, қаупі жоғары, деп хабарлайды Reuters.
Freedom не дейді
Freedom Broker сарапшысы Алем Бектеміровтың айтуынша, саладағы P/B мультипликаторы арқылы Slide Insurance-ті бағалау компания акцияларының орналастыру бағасы оның нарықтық құнынан айтарлықтай жоғары екенін көрсетеді. Оның есебі бойынша саладағы орташа P/B деңгейі 3,09x және Slide-тың меншікті капиталы $532,4 млн болса, компанияның капитализациясы $1,65 млрд немесе бір акцияға шаққанда $13,16 — бұл IPO бағасынан 22,6% төмен.
Басқа сарапшылар не дейді
Reuters атап өткендей, сақтандыру компаниялары нарықтағы құлдыраудан басқа бизнес түрлеріне қарағанда жақсы қорғалған: белгісіздік артқан сайын олардың тәуекелді азайтатын ұсыныстарына сұраныс өседі.
«Мүлік пен жауапкершілікті сақтандыру сегментіндегі (қатаң нарық) жағдай — сақтандыру жарналарының өсуі, шарттардың қатаюы және сақтандырушы арасындағы бәсекенің төмендеуі — жоғары андеррайтинг маржиналына ықпал етеді. Бұл сақтандыру компанияларын IPO-ға шығуға тартымды етеді», — дейді Reuters агенттігіне берген түсіндірмесінде IPOX вице-президенті Кэт Лю.
Slide Insurance-тің қаржылық көрсеткіштері кірістің жедел өсуін, табыстың артуын, сондай-ақ операциялық қызметтен түсетін жоғары, дегенмен құбылмалы, ақшалай ағындарды көрсетеді, деп атап өтті Seeking Alpha-дағы IPO нарығы бойынша сарапшы Донован Джонс. Оның айтуынша Slide сақтандыру жарналарын генерациялауда және сақтандыру жағдайларына байланысты шығындарды азайтуды жақсы меңгерген. Егер компания әділ бағаланса, IPO-ға қызығушылық жоғары болады, себебі компанияның өсу және кірістілік траекториясы тұрақты.
Seeking Alpha сарапшысының айтуынша АҚШ-тың шығыс жағалауындағы мүлік пен жауапкершілік (P&C) сақтандыруының мамандандырылған нарығы ауқымды және алдағы жылдары айтарлықтай өседі деп күтілуде. Дегенмен, Slide Insurance бизнесі табиғи апаттардың жиілігі мен қуатының артуына байланысты айтарлықтай тәуекелге ұшырайды. Сонымен қатар, компанияның Флоридадағы географиялық шоғырлану мәселесі бар, ал басқа сақтандыру компанияларынан ірі сақтандыру шарттарын сатып алу және мемлекеттік сақтандыру компаниясынан полистерді өз портфеліне көшіру ұзақ мерзімді тұрақты өсуді қамтамасыз етпеуі мүмкін, деп ескертеді сарапшы.
Контекст
Соңғы апталарда АҚШ-та бірнеше сақтандыру компаниясы IPO өткізді. Aspen Insurance және American Integrity Insurance мамыр айында биржаға шықты, ал мамандандырылған сақтандырушы Ategrity Specialty Insurance өткен аптада көпшілікке ашық компанияға айналды. Үшеуінің де акцияларымен 17 маусымда Нью-Йоркте өткен сауда жабылуында бағасы орналастыру бағасынан жоғары болды: IPO-дан кейін Aspen Insurance акциялары шамамен 7%, American Integrity Insurance — 3%, ал Ategrity — 39% өсті.
Freedom клиенттері негізгі биржалық сессия басталғанға дейін Slide Insurance акцияларымен сауда жасай алады. Сауда АҚШ биржалары ашылғанға дейін 2–3 сағат бұрын ерте премаркет форматында басталады (Астана уақыты бойынша 15:30–16:30 аралығы). Қатысу үшін SLDE.US тикерін басыңыз.
