SoftBank Marvell компаниясын сатып алуды қарастырған — Bloomberg
SoftBank чип өндіруші Marvell Technology компаниясын сатып алып, оны өз бақылауындағы Arm Holdings-пен біріктіру мүмкіндігін қарастырған. Бұл қадам ЖИ инфрақұрылымына қатысын күшейту және саладағы ірі бәсекелестермен тайталасу стратегиясына сай келетін еді.
Егжей-тегжейі
Bloomberg дерегінше, жапондық SoftBank конгломераты 2024 жылдың басында америкалық Marvell Technology компаниясын сатып алуды ойластырған. Егер келісім жасалғанда, бұл жартылай өткізгіштер саласындағы ең ірі мәміле болар еді. Алайда тараптар мәміле шарттары бойынша ортақ шешімге келе алмаған.
Bloomberg-тің дереккөздері SoftBank негізін қалаушы Масайоси Сон Marvell-ді сатып алып, оны Ұлыбританиялық Arm Holdings-пен біріктіргісі келгенін айтады. Бұл – SoftBank-тың ЖИ дамуынан пайда көретін аппараттық шешімдерге бағытталған стратегиясының бір бөлігі. Қазір нақты келіссөздер жүріп жатпағанымен, қызығушылық қайта жанданып қалуы мүмкін. Сонымен қатар, Marvell-ге басқа да сатып алушылар қызығушылық танытуы мүмкін.
Marvell, SoftBank және Arm өкілдері Bloomberg-ке пікір білдіруден бас тартты.
Bloomberg хабарынан кейін 6 қараша күні Marvell акциялары премаркетте 10%-ға дейін өсіп, сауда басталғанда 3%-ға, ал мақала жарияланған кезде шамамен 2,2%-ға жоғары болды.
Неліктен бұл маңызды?
Marvell-ді сатып алу — SoftBank-тың ЖИ инфрақұрылымындағы қатысуын кеңейтуге бағытталған тағы бір қадамы болар еді. Мысалы, биыл наурызда холдинг дата-орталықтарға арналған процессорлар жасайтын Ampere Computing компаниясын сатып алуға келісім берген.
Bloomberg-тің жазуынша, Marvell мен Arm бірігетін болса, олар жартылай өткізгіштер нарығында мықты бәсекелеске айналуы мүмкін. Marvell түрлі чип архитектура элементтерін біріктіріп, оларды өндіріс үшін дайын жобаларға айналдырады. Бұл жобалар кейін TSMC сияқты компаниялар арқылы жүзеге асады.
Алайда бұл мәміле күрделі кедергілерге тап болуы мүмкін. Бағасы $100 млрд-қа дейін жететін бұл сатып алуға АҚШ үкіметі рұқсат бермеуі ықтимал. Себебі Вашингтон жартылай өткізгіштер өндірісін өз елінде дамытуға күш салып жатыр. Масайоси Сон мен АҚШ президенті Дональд Трамптың жақындығына қарамастан, келісімге рұқсат алу оңай емес.
Сондай-ақ Arm мен Marvell-дің бірігуі бәсекелестікке қарсы тергеулерге себеп болуы ықтимал. 2020 жылы Nvidia Arm-ды сатып алмақ болғанда АҚШ, Еуропа және Қытай билігі бұл мәмілені тоқтатқан. 2018 жылы Qualcomm да NXP Semiconductors-ты сатып алмақ болғанда, Қытай келісімді бекітпей қойған.
Marvell акциялары туралы не белгілі?
Өткен жылы Marvell акциялары қатты өсті. Инвесторлар Amazon мен Microsoft сияқты клиенттер компания өнімін Nvidia-ға балама ретінде белсенді пайдаланады деп сенген. Алайда 2025 жылдың наурызында Marvell табыс болжамы сарапшылардың үмітінен әлсіз шыққаннан кейін акциялар соңғы 20 жылдан астам уақыт ішіндегі ең үлкен құлдырауға ұшырады. Ал оның басты бәсекелесі Broadcom жаңа клиенттер, соның ішінде OpenAI-мен келісімдер жасап, өз позициясын күшейтіп келеді.
Barron’s басылымы Marvell акциялары өзге чип компанияларынан артта қалып жатқанын айтады. Жыл басынан бері акциялар 14%-ға арзандады.
Қазан айында Barclays бұл акцияны сатып алуға берілген кеңесін тоқтатып, оны портфельде ұстауға кеңес берді. Банк белгілеген мақсатты баға — $80. Бұл соңғы жабылу бағасынан 14%-ға төмен.
MarketWatch дерегі бойынша, Marvell акцияларын талдайтын 40 сарапшының 31-і сатып алуға кеңес береді. Қалған 9-ы бейтарап көзқараста. Алайда орташа мақсатты баға қазіргі нарық бағасынан төмен.
