SoftBank пен Intel жасанды интеллектке арналған келесі буын жадты әзірлеуге ниеттенуде. Инвесторлар қалай реакция білдіріп жатыр?

Халықаралық инвестициялық алып SoftBank-тың еншілес компаниясы Saimemory американдық чип өндірушісі Intel-пен ынтымақтастық туралы келісімшартқа қол қойды. Тараптар жаңа буындағы компьютерлік жадты бірлесіп әзірлеп, нарыққа шығаруды жоспарлап отыр. Жад чиптерінің тапшылығы мен бағаның өсуі технологиялық сектордағы басты мәселелердің біріне айналуда.

Серіктестік SoftBank веб-сайтындағы мәлімдемеге сәйкес жасанды интеллект пен жоғары өнімді есептеудің өсіп келе жатқан қажеттіліктерін қамтамасыз ете алатын озық жад технологияларын дамытуға бағытталған. Жобаға Z-Angle Memory бағдарламасы немесе ZAM деген жұмыс атауы берілген.

Компания мәлімдеуінше, алғашқы прототиптер 2028 жылғы 31 наурызда аяқталатын қаржылық жылға дейін ұсынылуы жоспарланып, коммерцияландыру 2029 жылғы қаржылық жылға жоспарланған.

SoftBank акциялары 3 ақпанда Токио биржасында 5,1%-ға өсті. Intel акциялары АҚШ-тың алдын ала саудасында 3%-дан астамға өсті. Ал алдыңғы күні негізгі сауда сессиясында Intel акциялары 5%-ға өсіп, 48,81 долларға жетті.

Жоба аясында Saimemory Intel-дің жад саласындағы технологиялық жетістіктері мен тәжірибесіне сүйенеді, соның ішінде АҚШ Энергетика департаментінің «Алдыңғы қатарлы жад технологиялары» бағдарламасына корпорация қатысуы арқылы алған тәжірибесіне де, – деп жазады CNBC.

Бұл бағдарлама жетілдірілген жад үшін негізгі технологияларды дамытуға бағытталды. Intel-дің қатысуы компьютерлер мен сервер жүйелерінде қолданылатын динамикалық кездейсоқ жадтың (DRAM) өнімділігі мен энергия тиімділігін арттыруға бағытталды.

«Дәстүрлі жад архитектуралары жасанды интеллект қойған тапсырмаларды орындауға қауқарсыз», – деді Джошуа Фрейман, Intel компаниясының феллоуі (компаниядағыең жоғары техникалық атақ) және Intel Government Technologies техникалық директоры CNBC-ге берген мәлімдемесінде.

Фрайманның айтуынша, Intel жаңа жад архитектурасы мен құрастыру тәсілін әзірледі, ол DRAM өнімділігін арттырып, энергия тұтыну мен шығындарды азайтады. Бұл технологияның келесі онжылдықта кеңінен таралуына негіз қалайды.

Жадқа сұраныстың күрт өсуі жағдайында ынтымақтастық туралы келісімге қол қойылды. CNBC мәліметі бойынша, сұраныс ұсыныстан айтарлықтай асып түсіп, бұл бүкіл жабдықтау тізбегінде тапшылыққа әкелді. ZAM бағдарламасының энергия тиімділігіне басымдық беруі сондай-ақ жасанды интеллект есептеулері үшін қажетті алып энергия тұтынуына қатысты өсіп келе жатқан алаңдаушылықты көрсетеді.

Қаңтар айының соңында Apple жады бағасының өсуінен пайда маржасына төніп тұрған қауіпті мойындаған ең ірі компаниялардың біріне айналды. Алдыңғы тоқсанда әсері аз болғаннан кейін, Apple ағымдағы тоқсанда «үлкен әсер» күтетінін бас директор Тим Кук айтты.

MarketWatch мәліметі бойынша, талдаушылар Intel акцияларына қатысты сақтықпен қарайды. Ең көп тараған ұсыныс – ұстау (33 «Ұстау» рейтингісі), ал сатып алуға тек тоғыз ұсыныс («Сатып алу» және «Артық салмақ» рейтингтері) және сатуға жеті ұсыныс («Сату» және «Кем салмақ» рейтингтері) бар.