SpaceX iPhone телефондарына спутник байланысын қоспақ. Маск пен Apple татуласа ма?
Илон Масктың SpaceX компаниясы iPhone телефондарына спутник байланысын ұсынуы мүмкін деп хабарлады The Information басылымы. Мәліметке қарағанда, SpaceX жаңа Starlink спутниктерінде Apple қолданатын радиожиілік спектрін қосты. Екі компания арасында ресми келіссөз жоқ, бірақ соңғы оқиғалар ықтимал серіктестікке нұсқайды.
Егжей-тегжейі
Starlink ғаламдық спутник байланыс жүйесін іске қосқан SpaceX жаңа орбиталық топта Apple жиіліктерін қолдайтын жүйе енгізген. Компания бұл спутниктерді алдағы бірнеше жылда іске қосуды жоспарлап отыр. The Information дерегінше, SpaceX Apple-мен болашақта ынтымақтасуға үміт артады.
Қазір iPhone құрылғылары Globalstar компаниясының спутниктері арқылы байланысады. Бұл желі «SOS шақыру» қызметін қолдайды. Ол Wi-Fi немесе ұялы байланыс болмаған жағдайда пайдаланушыға төтенше қызметтермен байланысуға мүмкіндік береді. Соңғы жылдары Apple Globalstar-ға шамамен 2 миллиард доллар инвестиция салған. Ал The Information деректері бойынша, Globalstar директорлар кеңесінің төрағасы Джеймс Монро компанияны 10 миллиард доллардан жоғары сомаға сату мүмкіндігін талқылаған. Осы хабардан кейін Globalstar акциялары 8 пайызға өсті, бірақ 23 қазандағы сауда соңында өсуінің жартысын жоғалтты.
Apple неге Starlink-тен бас тарта алмайды?
The Information мәліметінше, Globalstar желісі Starlink-тен әлдеқайда баяу әрі технологиялық жағынан әлсіз. Apple компанияны сатып алуға басым құқыққа ие, бірақ оны жүзеге асыруы екіталай. Себебі ол байланыс қызметін көрсетуші ретінде реттеуші талаптарға бағынғысы келмейді.
Apple мен Масктың компаниялары арасындағы қатынас бұрын да күрделі болған, бірақ енді жақындасуға себептер пайда болуы мүмкін деп жазады Seeking Alpha. The Information сарапшыларының айтуынша, Apple енді SpaceX-ті елемей өте алмайды, әсіресе Маск EchoStar компаниясына тиесілі жиілік диапазонын пайдалануға мүмкіндік алғаннан кейін. Қазір тек Starlink қана iPhone-ға ұялы байланыссыз және Wi-Fi-сыз интернетке қосылу мүмкіндігін ұсына алады.
SpaceX президенті Гвинн Шотвелл компания смартфон өндірушілермен бірігіп, спутник байланысын тікелей телефондарға енгізу бағытында жұмыс істеп жатқанын айтты. Оның сөзінше, мақсат — спутник байланысын барынша қолжетімді ету.
The Information басылымына Telecom, Media and Finance Associates компаниясының басшысы Тим Фаррар: «Егер Apple балама іздеуді доғарып, SpaceX спутник байланысын таңдаса, Starlink-тің нарықтағы бәсекелестері қалмайды. Бұл оның үстемдігін нығайтады», — деді.
Екі компания арасындағы қақтығыс
Маск 2022 жылы-ақ Apple-ге серіктес болуды ұсынған. Ол Starlink-ті кем дегенде 18 айға арналған эксклюзивті байланыс жеткізуші ретінде бекітіп, 5 миллиард доллар аванс пен кейін жыл сайын 1 миллиард доллар төлем сұраған. Apple бұл ұсынысты қабылдамаған.
The Wall Street Journal дерегінше, Apple-дің Globalstar спутниктік байланысына инвестициялары Маскты ашуландырған. SpaceX АҚШ реттеушілеріне Globalstar-дың жаңа Apple қаржыландырған спутниктер үшін қосымша жиіліктер алу өтінішін қабылдамауды сұрап хат жолдаған.
2025 жылдың басында жағдай ушыға түсті. SpaceX пен оның серіктесі T-Mobile iPhone құрылғыларын Starlink спутниктеріне тікелей қосу туралы келіссөз жүргізген. Бірақ Apple iPhone бағдарламалық экожүйесін толық бақылауда ұстады. Нәтижесінде тараптар жаңа смартфондарға SpaceX пен T-Mobile спутник байланысын енгізуге келісті, бірақ интерфейс толығымен Apple бақылауында қалды.
Бұдан бөлек, Маск iPhone өндірушісін бірнеше рет сынаған. Ол ChatGPT енгізу жоспарын сынға алып, чат-бот пайдаланушылардың деректерін ұрлайды деп мәлімдеген. Ал тамыз айының соңында Масктың xAI стартапы Apple мен OpenAI компанияларын монополиялық іс-әрекет үшін сотқа берген.
