SpaceX-ке жасырын ставка Alphabet табысын өсіруі мүмкін
Илон Масктың SpaceX компаниясына салынған инвестициялар Alphabet үшін алдағы тоқсандық есепте миллиардтаған «қағаз жүзіндегі» пайда әкелуі мүмкін. SpaceX бағасының күрт өсіп, $800 млрд-қа жетуі Google-дың қаржылық көрсеткіштерін төртінші тоқсанда айтарлықтай жақсарта алады.
Егжей-тегжейлі
Bloomberg-тің мәліметінше Alphabet жақын арада жарияланатын қаржылық есепте ірі қағаз жүзіндегі пайда көрсетуді жоспарлап отыр. Бұған SpaceX-тің соңғы инвестициялық раунды себеп болды. Осы раундта әлемдегі ең қымбат аэроғарыш компаниясы $800 млрд деп бағаланды.
Өткен апта соңында агенттік хабарлағандай, SpaceX инсайдерлері акцияларын бір данасын $421 бағамен сатқан. Бұл шілдедегі алдыңғы инвестициялық раундтағы $212 бағамен салыстырғанда шамамен екі есе жоғары. Ал Forge Global дерегіне сүйенсек, 2025 жылдың желтоқсанында SpaceX акциялары шамамен $263 деңгейінде саудаланған.
Google-дың бас компаниясы Alphabet SpaceX-ке кемінде 2015 жылдан бері инвестиция салып келеді. Ол кезде Alphabet Fidelity Investments-пен бірге шамамен $1 млрд төлеп, компанияның 10%-ға жуық үлесін алған. Қазіргі үлес көлемі жарияланбайды, бірақ SpaceX бағасының өзгерісі Alphabet есептеріне бұған дейін де әсер еткен.
Мысалы, биыл сәуірде Alphabet бірінші тоқсан бойынша есепте жеке компанияға салынған инвестициялардан $8 млрд қосымша пайда көрсеткен. Bloomberg дерегіндегі дереккөз бұл компания дәл осы SpaceX екенін айтады.
Инвесторлар үшін бұл нені білдіреді?
Alphabet-тің негізгі табысы интернет-жарнама мен бұлтты сервистерден түссе де, SpaceX акцияларының қайта бағалануы Google-дың қағаз жүзіндегі пайдасын арттырып, акция бағасын қолдауы мүмкін, деп жазады TipRanks.
Alphabet төртінші тоқсан және 2025 жыл бойынша қаржылық нәтижелерін 3 ақпанда жарияламақ.
2025 жылдың бірінші тоқсаны бойынша есеп шыққаннан кейін Alphabet акциялары 5%-ға өскен. Инвесторлар компанияның жасанды интеллектке рекордтық шығындар мен жаһандық экономикалық тұрақсыздыққа қарамастан жоғары табыстылықты сақтай алғанын оң қабылдады.
Уолл-стрит Alphabet акцияларын қалай бағалауда?
Соңғы үш айда Уолл-стритте Alphabet акцияларына қатысты көңіл күй одан әрі оң бағытқа өзгерді. FactSet дерегіне сәйкес, «сатып алу» (Buy және Overweight) ұсынымдарының саны 60-тан 63-ке өсті. Ал «ұстап тұру» (Hold) ұсынымдары 13-тен 12-ге азайды.
Alphabet акцияларын сатуға кеңес беріп отырған бірде-бір аналитик жоқ. Орташа мақсатты баға $334, бұл қазіргі деңгейден шамамен 8% өсім әлеуетін көрсетеді.
