Тарифтер мен ОПЕК+ өндірісінің күрт өсуі мұнай бағасын 7%-ға құлдыратты
Onyx Commodities пікірінше, ОПЕК+ елдері мұнай бағасына қысым жасау үшін бұдан ыңғайлы күнді таба алмас еді.
Инвесторлар жаңа АҚШ тарифтері жаһандық сауда соғысына ұласуы мүмкін деп қауіптенеді — бұл экономикалық өсімді баяулатып, жанармайға деген сұранысты азайтады. / Фото: Shutterstock.com
Бағалар құлдырады
Бейсенбі, 3 сәуір күні мұнай бағасы 7%-ға дейін төмендеді. Саудадағы белсенді сатылымдарға АҚШ жариялаған жаңа тарифтер түрткі болды. Олар жаһандық экономикалық өсімді баяулатып, отынға сұранысты азайтуы мүмкін деген үрей туғызды. Сонымен қатар, ОПЕК+ экспортерлерінің мамырда мұнай өндірісін күтпеген жерден жылдам арттыру шешімі де нарыққа қосымша қысым жасады. Алдағы уақытта сарапшылар мұнай нарығында құбылмалылықтың артуын күтеді. Көптеген инвестбанк 2025–2026 жылдарға арналған мұнай бағасына қатысты болжамдарын төмендетіп үлгерді.
Толығырақ
3 сәуір күні Brent маркалы мұнай фьючерстері −6,9%, барреліне $69,78 деңгейіне дейін түсті. West Texas Intermediate (WTI) мұнайы −7,4%, барреліне $66,38 болды.
Неліктен мұнай арзандап жатыр
3 сәуірдегі онлайн кездесу барысында ОПЕК+ елдері мамыр айында мұнай жеткізуді тәулігіне 411 мың баррельге арттыруға келісті. Бұл — нарық күткен 135 мың баррельден әлдеқайда жоғары. Бұл шешім ОПЕК+ ішіндегі келісімдердің орындалуын бақылауды күшейтуге бағытталған болуы мүмкін, деп жазады Reuters сарапшыларға сілтеме жасап. Агенттік дерегінше, бірнеше ел, соның ішінде топ көшбасшысы Сауд Арабиясы, Қазақстанның наурыз айында квотадан асыра өндіріп, тарихи рекорд орнатқанына алаңдаушылық білдірген. ОПЕК+ мәлімдемесінде нақты елдер аталмаса да, мамырдағы өндіріс көлемі келісім қатысушыларына артық өндірісті өтеу мүмкіндігін береді делінген.
«ОПЕК+ ішінде маусымдық сұраныс өсіп жатқан кезеңде нарық бұл көлемді сіңіріп алады деген сенім бар сияқты. Бірақ жалпы ұсыныстың айтарлықтай өспейтіні де түсінікті, себебі басқа елдерде өндіріс қысқарады немесе жеткізуде үзілістер болады», — деді UBS сарапшысы Джованни Стауново (Reuters).
ОПЕК+ шешімі жаңа тарифтерден кейін басталған мұнай сатылымдарын күшейтті. Экспортерлер кездесуі алдындағы күннің өзінде-ақ мұнай 4%-ға арзандаған еді — инвесторлар Трамптың жаңа тарифтері сауда соғысына әкеліп, экономикалық өсімді тежейді деп қауіптенді.
«Егер ОПЕК+ елдері бағаны тежеуді көздесе, бұдан жақсы сәт болмас еді», — деді Bloomberg агенттігіне Onyx Commodities зерттеу бөлімінің басшысы Гарри Чилингирян.
2 сәуір күні Трамп АҚШ-тың көптеген елден келетін барлық импортқа ең аз дегенде 10% баж салатынын, ал 60-қа жуық елге бұдан да жоғары мөлшерлеме қолданатынын жариялады. Мұнай, газ және мұнай өнімдері бұл тізімнен тыс қалды. Алайда, сауда соғысы жаһандық жеткізу тізбектерін бұзып, қысқа мерзімде экономикалық құлдырау қаупін арттыруы мүмкін, деп ескертеді Saxo Bank сарапшысы Оле Хансен.
Алда не күтеміз
UBS сарапшылары 2 сәуір күні мұнай бағасына қатысты болжамдарын қайта қарап, 2025 және 2026 жылдарға арналған болжамын $3-қа төмендетті — барреліне $72 деңгейіне дейін. Қысқа мерзімде нарықтағы құбылмалылық күшейе түседі деп болжануда — себебі тарифтер бойынша келіссөздер немесе жауап шаралар жаңа өзгерістерге әкелуі мүмкін.
«Жауап шаралары сөзсіз болады. Ал нарықтың бастапқы реакциясына қарап, рецессия мен стагфляция шын қауіпке айналуы мүмкін», — деді PVM сарапшысы Тамаш Варга.
