Telegram ай сайынғы 1 млрд қолданушы межесінен асты — Дуров

Бұл туралы мессенджердің негізін қалаушы Павел Дуров мәлімдеді. Telegram әлем бойынша WhatsApp-тан кейінгі екінші ең танымал хабарлама алмасу қосымшасына айналды. Дуров компания 2026 жылы IPO-ға шығуды жоспарлап отырғанын айтты. Алайда Франциядағы тергеу бұл жоспарға қауіп төндіруі мүмкін, деп ескертеді Financial Times.

Толығырақ

«Telegram-ның ай сайынғы белсенді қолданушыларының саны қазір 1 миллиардтан едәуір асты. Бұл оны (Қытайдағы WeChat-ты есептемегенде) әлемдегі екінші ең танымал мессенджерге айналдырады», – деп жазды Павел Дуров өзінің Telegram-арнасында.

Сонымен қатар ол Telegram табысының өсуі күрт жеделдегенін айтты. 2024 жылы мессенджердің пайдасы $547 млн-ға жетті. Дегенмен, ол өзге қаржылық көрсеткіштерді нақтыламады.

Telegram қаржысы туралы не белгілі

2024 жылдың соңында Telegram үш жылдық монетизациядан кейін алғаш рет пайда тапқанын Дуров алғаш рет растады. Оның айтуынша, өткен жылы мессенджердің жалпы табысы $1 млрд-тан асқан. Ал Telegram-ның криптовалюталардан бөлек ақша резерві $500 млн-нан көп.

2023 жылы Telegram $342 млн табыс тапқанымен, $108 млн операциялық шығын мен $173 млн таза шығын көрсетті деп жазған еді Financial Times жарияланбаған есептілікке сілтеме жасап.

Контекст

Telegram-ның негізін қалаушы Павел Дуров 2024 жылдың наурызында жеті айлық үзілістен кейін Дубайға оралды. Бұған дейін ол Францияда болған еді, онда мессенджердегі мазмұндарды бақылауға қатысты жеткілікті шаралар қолданбады деген айыппен қамауға алынған. 2024 жылдың тамызында Парижде Дуровқа заңсыз әрекеттер жасалған онлайн-платформаны басқаруға қатысы бар және құқық қорғау органдарымен ынтымақтасудан бас тартты деген айыптар тағылған болатын.

Кейін Дуров 5 млн еуро кепілмен босатылды және оған Франциядан шығуға тыйым салынды. Жақында бұл шектеу алынды, алайда тергеу әлі аяқталған жоқ.

Қамауға алынардан бірнеше ай бұрын Дуров Telegram-ның нарықтық бағасы $30 млрд-тан асып отырғанын мәлімдеді. Ол компания IPO өткізу мүмкіндігін зерттеп жатқанын айтты, бірақ нақты мерзімдерін жарияламады. Financial Times мәліметінше, Telegram 2026 жылдың наурызына дейін IPO-ға шықса, облигация ұстаушылар берешектерін 10–20% жеңілдікпен акцияларға айырбастай алады. Компания жалпы көлемі $2 млрд-тан асатын үш облигация шығарған. Бірақ Франциядағы тергеу бұл жоспарды қиындатуы мүмкін — инвесторлар үшін бұл фактор тәуекел туғызады, деп жазады FT.