Tesla-ның басты оптимисі ЖИ-ге арналған ETF құрды: ол қандай акцияларды таңдады?
Tesla акциялары бойынша ең оптимистік болжамдарымен танымал Wedbush сарапшысы жасанды интеллектке байланысты компаниялардың акцияларына арналған жеке ETF құрды. 4 маусымда NYSE Arca биржасында саудалануды бастаған бұл қор 30 компаниядан тұратын Solactive Wedbush Artificial Intelligence Index индексін бақылайды. Сауданың алғашқы күнінде қор бағасы айтарлықтай өзгерген жоқ.
Егжей-тегжейлі
Wedbush басқарушы директоры және жаһандық технологиялық зерттеулер бөлімінің басшысы Дэн Айвз ЖИ-компаниялар акцияларына маманданған биржалық қор құрды, оған өз аудиториясы да онымен бірге инвестиция сала алады, деп хабарлайды CNBC.
Dan Ives Wedbush AI Revolution ETF атауымен белгілі қор 4 маусымда NYSE Arca биржасында IVES тикерімен саудалана бастады. Сауданың басталуындағы бағасы $25,37 болды, ал қорының капитализациясы — $1 млн. Сауда күні ішінде IVES ETF бағасы 0,1% шегінде ауытқыды.
Техникалық тұрғыда ETF пассивті инвестициялық құрал болып саналады. «Біз белсенді және пассивті тәсілдің шекарасында жұмыс істейміз. Дэннің идеяларын институционалдық құрылым аясында барынша тиімді жүзеге асыруға тырысамыз, бұл инвесторларға тұрақтылық пен болжамдылық береді», — деп түсіндірді инвестициялық директор Wedbush Fund Advisers Каллен Роджерс.
Индекс құрамын қайта қарау тоқсан сайын жүргізіледі, алайда корпоративтік оқиғалар болған жағдайда жоспардан тыс өзгерістер де болуы мүмкін, деп көрсетілген Wedbush компаниясының АҚШ-тың Құнды қағаздар және биржалар жөніндегі комиссиясына (SEC) ұсынған материалдарында.
Контекст
Іс жүзінде Wedbush Fund Advisers Дэн Айвздің инвестициялық идеяларын қадағалайтын қорды іске қосты — технология секторындағы нақты ұсынымдары оны жеке инвесторлар арасында кеңінен танымал етті, деп түсіндіреді Bloomberg ETF-тің нарыққа шығуын. Қордың негізінде Айвз қадағалайтын Ives AI 30 зерттеу тізіміне негізделіп жасақталған индекс жатыр.
«Бұл — біздің зерттеулерімізге негізделген. Егер индекс құрамына кіретін жаңа компаниялар пайда болса, басқалары — шығады. Бұл — тірі организм, бір орында тұрмайтын құрылым. Негізгі ой да осы: жасанды интеллект тақырыбы дами береді», — деді Айвз CNBC-ге берген сұхбатында.
Айвздің X желісінде 180 мыңнан астам жазылушысы бар, әрі ол жиі БАҚ-та сөз сөйлейді. «Біз ішкі ресурстарымызды талдай келе бір нәрсе айқын болды: Дэн Айвз, оның нарыққа көзқарасы және әсіресе жасанды интеллект саласындағы әлемдік ауқымдағы өзгерістерді қабылдауы — біздің ең құнды активіміз», — деп түсіндірді Bloomberg келтірген сөзінде Роджерс.
IVES ETF портфеліне қандай акциялар кіреді?
— Бағдарламалық қамтамасыз ету әзірлеушілері: Palantir Technologies, Salesforce, IBM, ServiceNow, Snowflake, Adobe, Pegasystems, MongoDB, C3.ai, Elastic, Innodata және SoundHound.
— Чип өндірушілер: Nvidia, AMD, Taiwan Semiconductor, Micron және Broadcom.
— Гиперскейлерлер (яғни, үлкен көлемдегі деректерді өңдеуге арналған ауқымды бұлтты инфрақұрылымды дамытып, басқаратын ең ірі компаниялар): Microsoft, Alphabet (Google-дың бас компаниясы), Amazon және Oracle.
— Интернет-компаниялар: Apple, Meta (Facebook пен Instagram-ның иесі), сондай-ақ Қытайдың Alibaba мен Baidu компаниялары.
— Робототехника және пилотсыз жүйелер әзірлеушілер: Tesla (роботакси шығаруға дайындалып жатыр) және энергиямен қамтамасыз етуге арналған ядролық технологияларды дамытып жатқан Oklo стартапы.
— Киберқауіпсіздік саласындағы көшбасшылар: Zscaler, Palo Alto Networks және CyberArk Software.
Жаңа ETF кіммен бәсекелеседі?
Bloomberg дерегінше, қазіргі уақытта нарықта жасанды интеллект тақырыбына бағытталған немесе активтерді басқаруда ЖИ қолданатын 25-тен астам ETF бар. Көп жағдайда мұндай лық толы нарықта бәсекелесу оңайға емес — соңғы жылдары көптеген қорлар жабылып қалған. Сонымен қатар, кірістің төмен болуы қордың жетістікке жетуіне үлкен кедергі келтіруі мүмкін.
Жасанды интеллект тақырыбындағы ETF-тер басқарушылар үшін оңай міндет емес, себебі бұл сала қарқынды дамып жатыр, ал OpenAI секілді кейбір негізгі ойыншылар әлі де жеке компаниялар күйінде қалуда. Сонымен қатар, Nvidia сияқты ЖИ-дің ең ірі ашық бенефициарлары басқа қорларда әлдеқашан кеңінен қамтылған.
IVES қорына бірнеше ұқсас қорлармен, соның ішінде $3 млрд-тан астам активті басқаратын Global X Artificial Intelligence & Technology ETF (тикер: AIQ) қорымен бәсекелесуіне тура келеді. Соңғы 12 айда AIQ 22% өсім көрсетті — бұл S&P 500 өсімінен жоғары, бірақ сол кезеңдегі тек Nvidia компаниясының кірістілігіне шамалас, деп атап өтеді CNBC.
Айвз қоры басқару үшін 0,75% мөлшерінде комиссия алады — бұл көптеген танымал тақырыптық ETF-терден жоғары. Бірақ Morningstar дерегіне сәйкес, АҚШ акциялар нарығындағы белсенді басқарылатын қорлар үшін орташа 1%-дан төмен. Салыстыру үшін айтсақ, AIQ қорының комиссиясы — 0,68%.
