«Тинькоффтың» бұрынғы топ-менеджерлері құрған Plata стартапы $500 млн тартты
Ресейлік «Тинькофф» банкінің (қазіргі Т-банк) бұрынғы топ-менеджерлері негізін қалаған мексикалық Plata финтех-компаниясы $500 млн-ға дейін инвестиция тарту туралы келісімге келді. Бұл туралы стартаптың хабарламасында айтылды.
Егжей-тегжейлі
Қаржыландыру раундын жапондық инвестициялық банк Nomura Securities International ұйымдастырды. Plata мәлімдеуінше, бұл — Мексикадағы финтех-сектор үшін тартылған ең ірі сома. Сонымен қатар, бұл жапондық жетекші инвестициялық банктің мексикалық финтех-сектордағы осындай ауқымды қаржыландыруға алғаш рет қатысуы, делінген баспасөз хабарламасында. Бұл Plata-ға және Мексиканың қаржы жүйесіне халықаралық қызығушылықтың артып келе жатқанын көрсетеді, деп санайды стартап.
Nomura қолдауының арқасында, жаңа қаржыландыру раунды аясында Plata-ға салынған институционалдық инвестициялардың жиынтық көлемі $1,6 млрд-тан асты, деп хабарлады компания.
Қазанда Plata Kora Management жетекшілік еткен $250 млн-дық акционерлік қаржыландыру раундын жапты. Мәмілеге сондай-ақ, Moore Capital Management пен Audeo Ventures қатысты. Раунд қорытындысы бойынша Plata-ның бағалануы екі есеге өсіп, $3,1 млрд-қа дейін жетті. Компания мәліметінше, инвесторлар географиясы АҚШ, Еуропа, Жапония және Латын Америкасын қамтиды.
Қазір Plata Мексикада толыққанды банк іске қосуға дайындалып жатыр, деп хабарлады Reuters. 2024 жылдың желтоқсанында банктік қызметке рұқсат алған цифрлық қаржы платформасы іске қосудың соңғы кезеңінде.
Plata өз өнімдерінде меншікті технологиялар мен жасанды интеллектті қолданады және 2,5 млн белсенді клиентке қызмет көрсетеді. Компания 2023 жылы «Тинькофф» банкінің бұрынғы топ-менеджерлері Нери Толлардо, Александр Бро және Данил Анисимов тарапынан құрылған.
