Трамп Қытайға қарсы тарифтерді 104%-ға дейін көтермек. Акциялар мен мұнай арзандады
АҚШ президенті Дональд Трамп 9 сәуірден бастап Қытайдан келетін импортқа 104%-ға дейінгі мөлшерде тарифтер енгізуді жоспарлап отыр, деп хабарлайды Bloomberg Ақ үй өкілінің сөзіне сілтеме жасап. Оның айтуынша тарифтер түн ортасынан бастап күшіне енеді.
Қытайға қатысты тарифтер пакетіне бұған дейін АҚШ фентанилді әкелуге байланысты дағдарыс салдарынан енгізілген 20%-дық тарифтер, Трамп 2 сәуірде жариялаған қосымша 34%-дық тарифтер, сондай-ақ Пекин АҚШ-тан келетін барлық импортқа 34%-дық жауап тарифін енгізгеннен кейін Трамп уәде еткен 50%-дық тарифтер кіреді.
Трамп 8 сәуірде Truth Social әлеуметтік желісінде Қытайдың да келісім жасағысы келетінін, бірақ неден бастау керектігін білмей отырғанын айтты. «Біз олардың қоңырауын күтеміз. Бұл болады!», - деп жазды ол. Өз кезегінде Пекин бұған дейін жауапты сауда шаралары арқылы «соңына дейін күресуге» дайын екенін мәлімдеген болатын.
Келіссөздер мен ықтимал мәмілелерді қарастыру кезінде Ақ үй кеңесшілері АҚШ-тың одақтастарына басымдық береді, деп хабарлады Ақ үйдің баспасөз хатшысы Кэролайн Левитт. Ол Қытай АҚШ-тан импортқа жауап ретінде тарифтер жариялап, қателік жасады деп мәлімдеді, деп хабарлайды WSJ.
Нарық қалай жауап берді
Жағымсыз жаңалықтар аясында АҚШ-тың үш негізгі қор индексі таңғы өсімнің көп бөлігін жоғалтып, бұрынғы жабылу деңгейлері маңында құбылды. Нью-Йорк уақытымен 14:13-те кең нарықтың S&P 500 индексі мен технологиялық Nasdaq Composite тиісінше 0,2% және 0,3%-ға төмендеді, ал Dow Jones Industrial Average көк фишкалар индексі 0,2%-ға өсті.
Өз кезегінде Brent маркалы мұнайдың фьючерстері 1,5%-ға арзандады, ал WTI 1%-ға төмендеді. Қытай - шикі мұнайдың ірі импорттаушысы, және тарифтер туралы соңғы жаңалықтар нарықта, энергия тұтынуына әсер ететін жаһандық экономикалық құлдырау туралы алаңдаушылықтарға толы атмосфераға қосымша көңілсіздік әкелді, деп жазады Bloomberg.
