Трамп Nvidia Қытайға чиптерді «белгілі шарттармен» жеткізе алатынын айтты
АҚШ президенті Дональд Трамп Truth Social желісіндегі парақшасында технологиялық алып Nvidia компаниясына H200 ЖИ-чиптерін Қытайға және басқа елдерге экспорттауға рұқсат берілетінін жазды. Осы жазбадан кейін постмаркетте Nvidia акциялары 2%-дан аса өсті.
«Мен Қытай төрағасы Сиге [Цзиньпинге] АҚШ Nvidia-ға H200 өнімдерін Қытайдағы және басқа елдердегі мақұлданған клиенттерге жеткізуге рұқсат беретінін хабарладым. Бұл АҚШ-тың ұлттық қауіпсіздігін берік сақтайтын шарттар орындалған жағдайда іске асады. Төраға Си бұл жаңалықты оң қабылдады! 25% АҚШ-қа төленеді. Бұл саясат АҚШ-тағы жұмыс орындарын қолдайды, өндірісті күшейтеді және америкалық салық төлеушілерге пайда әкеледі», — делінген жазбада.
Трамптың айтуынша, қазір Сауда министрлігі барлық детальдарды соңына дейін пысықтап жатыр. Дәл осындай тәсіл AMD, Intel және басқа америкалық компанияларға да қолданылмақ. Кеңейтілген саудада AMD акциялары 1,6%-ға, Intel қағаздары 0,6%-ға қымбаттады.
CNBC президенттің мәлімдемесін келісім аясында АҚШ үкіметі Nvidia процессорларының сатылымынан 25% алатын болады деп түсіндірді. Ақ үй телеарнаның түсініктеме сұрауына жедел жауап бере алмады. CNBC еске салғандай, тамызда жетекші чип өндіруші және оның бәсекелесі AMD Қытайға жеткізілімнен түскен табыстың 15%-ын мемлекетке беруге келіскен. Ол кезде Қытай нарығына арнайы жасалған қуаты төменірек H20 графикалық процессорлары туралы сөз болған. Бірақ шамамен сол уақытта Пекин жергілікті бизнеске H20 сатып алмауға қатысты ескерту жасай бастады.
«Біз президент Трамптың америкалық чип өндірушілерге бәсекеге қатысуға мүмкіндік беру туралы шешімін құптаймыз. Бұл жоғары жалақысы бар жұмыс орындарын және АҚШ-тағы өндірісті сақтауға көмектеседі», — деді Nvidia өкілі CNBC-ке. Ол бұл пікірін H200 сияқты анағұрлым озық чиптерді экспорттауға рұқсатқа қатысты айтты.
Шешім қабылданғанын алғаш болып Semafor салалық басылымы дереккөзге сүйеніп хабарлаған. Сол ақпарат 8 желтоқсанда сауда сессиясы кезінде Nvidia акцияларын 1,8%-ға көтерді. Semafor жазуынша, бұл чиптердің экспорты америкалық технологиялардың әлемдік басымдығын сақтауға көмектесуі мүмкін. Сонымен бірге Nvidia табысын қолдап, компанияға Қытайдың алып нарығын қайта әкелуі ықтимал. Компания басшысы Дженсен Хуангтың айтуынша, екі жақтағы шектеулер салдарынан Nvidia-ның бұл елдегі үлесі 95%-дан нөлге дейін құлаған.
