Трамп Ресей мұнайын сатып алғаны үшін Үндістан импортына қосымша баж салығын енгізді
АҚШ президенті Дональд Трамп Ресейден мұнай сатып алғаны үшін Үндістаннан келетін тауарларға қосымша баж салығын енгізу туралы жарлыққа қол қойды.
Ақ үй жариялаған жарлықта баж салығының мөлшерлемесі 25% болатыны айтылған. Ол 21 күннен кейін — яғни 27 тамызда күшіне енеді. Жаңа салық шілде айының соңында Трамп үнді импортына қойған 25 пайыздық бұрынғы баж салығына қосылады.
Нарық қалай жауап қатты
— Трамп жарлығы аясында MSCI India Index индексіне байланған iShares MSCI India ETF биржалық қоры шамамен 1%-ға төмендеді.
— Қазан айында жеткізілетін Brent мұнайының келісімшарт бағасы 2,2%-ға өсіп, барреліне $69,18-ге жетті, бірақ кейін өсу қарқыны 0,9%-ға дейін баяулады.
Контекст
Үндістан — әлемдегі мұнай импорты мен тұтынуы бойынша үшінші орында. Reuters келтірген деректерге сүйенсек, биылғы қаңтар-маусым аралығында Үндістан күн сайын шамамен 1,75 млн баррель ресейлік мұнай алған, бұл өткен жылмен салыстырғанда 1%-ға көп. Жылдың алғашқы жартысында Ресей Үндістанға ең ірі мұнай жеткізуші ретінде қала берді және жалпы мұнай жеткізілімі көлемінің шамамен 35%-ын қамтамасыз етті, деп хабарлайды агенттік.
«Олар әскери машинаны жанармаймен қамтамасыз етіп отыр. Егер олар мұны жалғастырса, мен бұған наразы боламын», — деді Трамп 5 тамызда CNBC арнасына берген сұхбатында Үндістанның мұнай сатып алуына қатысты.
Ақ үй Үндістанға қарсы баж салығы туралы жарлықты Трамптың арнайы өкілі Стивен Уиткоффтың Мәскеуде Ресей президенті Владимир Путинмен кездескеннен кейін жариялады. Bloomberg-тің жазуынша Кремль бұл кездесуде тек «сигналдармен алмасу» орын алғанын мәлімдеген. Бұған дейін Трамп Ресей мен Украина арасындағы бітімге қол жеткізу әрекеттерінің сәтсіз аяқталғанына көңілі толмайтынын білдіріп, Мәскеуге 8 тамызға дейін атысты тоқтатуды талап етіп, керісінше жағдайда қатаң санкциялар енгізетінін ескерткен болатын.
