Трамп: Украина өз аумағын толық қайтара алады
Украина қазір өз аумағын толық қайтарып алуға мүмкіндік беретін жағдайда тұр. Бұған Еуроодақ пен НАТО-ның қаржылай қолдауы көмектеседі, деді Дональд Трамп. Оның айтуынша, Ресей «үлкен» экономикалық қиындықтарға тап болды, сондықтан Киев үшін «қимылдайтын уақыт келді». АҚШ НАТО-ға қару жеткізуді жалғастырады, ал альянс оны «қалағанынша пайдаланады», деп қосты Трамп.
Егжей-ткгжейі
«Украина мен Ресей арасындағы әскери және экономикалық жағдайды толық түсінген соң және Ресейге келіп жатқан экономикалық қиындықтарды көріп, менің ойымша, Украина Еуроодақтың қолдауымен күресіп, бастапқы шекараларына дейінгі аумақты қайтарып ала алады. Уақыт, шыдамдылық және Еуропаның, әсіресе НАТО-ның қаржылай көмегімен бұл әбден мүмкін», — деп жазды АҚШ президенті Дональд Трамп Truth Social желісінде. Бұл жазба БҰҰ Бас Ассамблеясы аясында Нью-Йоркте Украина президенті Владимир Зеленскиймен кездесуінен кейін шықты, деп жазды The New York Times.
Трамптың ойынша, Украина үшін «қимылдайтын уақыт келді», себебі Ресей үш жарым жылға созылған соғыстан кейін «үлкен проблемаларға» тап болды. «Бұл кез келген мықты әскери күшке бір аптадан аз уақыт алар еді. Бұл Ресейді ерекшелендірмейді, керісінше оны «қағаз жолбарысына» ұқсатады», — деді АҚШ президенті.
Ол Украинаның «мықты рухы» бар екенін, ал Ресейде халық «әскери экономиканың» салдарынан қиындықтарға жиі тап болып жатқанын айтты.
«Украина бастапқы аумағын қайтарып қана қоймай, бәлкім одан да ары жылжуы мүмкін! [Владимир] Путин мен Ресейдің үлкен экономикалық мәселелері бар, сондықтан Украина үшін қимылдау уақыты келді. Қалай болғанда да, мен екі елге де жақсы тілек тілеймін. Біз НАТО-ға қару жеткізуді жалғастырамыз, ал альянс оны қалағанынша қолданады», — деп түйіндеді Трамп.
Бұл нені білдіреді?
The Wall Street Journal жазғандай, Трамптың бұл мәлімдемесі «күтпеген ұстаным өзгерісі» және Ресейге бағытталған «қатаң сын» болып тұр. Бұл бірнеше ай бойы «оқ атуды тоқтатуға тырысқан әрекеттері нәтиже бермегеннен кейін» жасалды. Бұған дейін Трамп Украина бейбіт келісімге жету үшін аумағының бір бөлігін беруге мәжбүр болуы мүмкін деген еді.
Bloomberg атап өткендей, Трамп Truth Social жазбасында Ресейге қарсы жаңа санкциялар туралы ештеңе айтпады. Сондай-ақ ол Вашингтон саясатына жаңа ұстанымының қалай әсер ететіні туралы да мәлімдеген жоқ, деп қосты Reuters.
Bloomberg Economics сарапшылары Алекс Кокчаров пен Бекка Вассер Украина қазіргі Батыс қолдауымен барлық аумақты қайтара алмайтынын айтты. «Жағдайды өзгерту үшін Украинаға Батыстан едәуір көбірек әскери көмек қажет. Соның ішінде алыс қашықтықтағы ERAM жүйелері мен зымырандар секілді шабуыл қарулары жеткізілуі тиіс. Сонда ғана Ресейдің ілгерілеуін тоқтатып, қарсы шабуыл жасауға мүмкіндік туады», — деді сарапшылар. Сонымен бірге Батыс елдері Ресейге қарсы санкцияны күшейтуі керек, сонда ғана Мәскеудің соғысты жалғастыру мүмкіндігі әлсірейді, деп түйіндеді Кокчаров пен Вассер.
