Трамптың болжап болмайтын шешімдерінен кейін алтын бағасы 5 100 доллардан асты. Өсім жалғаса ма?

Алтын бағасы геосаяси шиеленістің күшеюі мен қауіпсіз активтерге жоғары сұраныс салдарынан алғаш рет трой аунциясына 5 100 АҚШ долларынан асты. Сарапшылар бағалы металдар нарығындағы өсімді АҚШ президенті Дональд Трамп әкімшілігінің соңғы сыртқы саяси бастамаларынан туындаған «сенім дағдарысымен» байланыстырады.

Астана уақытымен сағат 12:30-ға қарай алтынның спот бағасы унциясына 2,2%-ға өсіп, 5 094 АҚШ долларына жетті. 26 қаңтардағы сауда барысында бағалы металдың бағасы 5 112 АҚШ долларына дейін көтерілді. Алтын фьючерстері де унциясына 2,2%-ға өсіп, 5 128 АҚШ долларына жетті.

Алтын 2025 жылды 46 жыл ішіндегі ең жақсы көрсеткішпен аяқтады, себебі қауіпсіз баспана активтеріне тұрақты сұраныс, АҚШ-тағы пайыздық мөлшерлемелердің төмендеуі (пайызсыз активтердің тартымдылығын арттырды), орталық банктердің асыл металдарды белсенді сатып алуы және биржада саудаланатын қорларға (ETF) рекордтық қаражат ағымы. 2026 жылдың басынан бері алтын бағасы 17%-дан астамға өсті.

Алтын бағасына соңғы катализатор – «АҚШ әкімшілігіне және америкалық активтерге деген сенім дағдарысы, оны өткен аптада Трамп әкімшілігінің кейбір ойланбаған шешімдері туғызды», – деп Capital.com сарапшысы Кайл Родд Reuters -ке айтты. «Трамп әкімшілігі қалыптасқан тәртіптің қайтарылмайтын бұзылуына себеп болды, сондықтан қазір барлығы жалғыз балама ретінде алтынға жүгініп жатыр», – деді сарапшы.

Өткен аптаның ортасында Трамп Гренландия жөніндегі дау аясында Еуропалық одақтастарына баж салығын салу жоспарынан күтпеген жерден бас тартты, бірақ көп ұзамай қайтадан қақтығысты риторикаға оралды. Демалыс күндері ол Қытаймен сауда келісіміне келсе, Канадаға 100% баж салығын салуға уәде етті. Сонымен қатар Трамп француз шараптарына 200 пайыздық баж салығын салумен қорқытып, Франция президенті Эммануэль Макронды өзінің «Бейбіт кеңес» бастамасына қосылуға мәжбүрлемекші болды.

Bloomberg жазуынша, Трамм әкімшілігінің әрекеттері нарықты дүрліктіріп, осы белгісіздікпен күресуге тырысқан инвесторлар үшін алтынның «қауіпсіз баспана» ретінде тартымдылығы сирек қана бұлай жоғары болған. «Алтын – сенімнің екінші жағы», – деп First Eagle Investment Management компаниясының портфель менеджері Макс Белмонтты агенттік дәйексөздейді. «Бұл инфляцияның күтпеген өршуіне, болжамсыз нарықтық құлдырауларға және күшейіп бара жатқан геосаяси тәуекелдерге қарсы сақтандыру».

«Трамп тудырған қазіргі геосаяси белгісіздіктердің көпшілігі жақын арада жойылмауы мүмкін», – деп болжайды Oversea-Chinese Banking компаниясының инвестициялық стратегия жөніндегі басқарушы директоры Васу Менон (Bloomberg сілтемесі бойынша). Оның айтуынша, «алтын алдағы айларда және тіпті жылдары да маңызды рөл атқаруы мүмкін».

«Біз алтын бағасының әрі қарай өсуін күтеміз. Қазіргі болжамымыз бойынша, биыл жыл соңында баға шамамен 5 500 долларға дейін көтеріледі», – деді Reuters агенттігіне сілтеме жасап, Metals Focus консалтингтік компаниясының директоры Филип Ньюман. Инвесторлар пайдасын алып жатқандықтан мерзімді түсірулер болуы мүмкін, бірақ мұндай түзетулер төмендегенде сатып алу мүмкіндігі ретінде қарастырылады, – деді Ньюман.

Goldman Sachs жақында 2026 жылғы желтоқсанға арналған алтын болжамын унциясына 4 900 доллардан 5 400 долларға дейін көтерді. Инвестициялық банктің айтуынша, жаһандық макроэкономикалық және саяси тәуекелдерге қарсы хеджирлеу күшейіп, нәтижесінде биылғы жылға алтын бағасының бастапқы деңгейі жоғарылады, деп хабарлайды CNBC.