TSMC АҚШ-та Huawei-ге чип жеткізді деген күдікпен миллиардтаған айыппұлға ілікті

Әлемдегі ең ірі контрактілік микросхема өндіруші – TSMC – АҚШ билігінің тергеуінен кейін $1 млрд және одан да көп айыппұл төлеуі мүмкін. Тергеу TSMC компаниясы Қытайдағы тәуелсіз деп саналатын Sophgo үшін өндірген чиптің ақырында мемлекеттік Huawei-дің жасанды интеллект үдеткішінде қолданылғанын анықтауға бағытталған.

Толығырақ

АҚШ Сауда министрлігі TSMC мен Қытайлық Sophgo компаниясы арасындағы байланысқа қатысты тергеу жүргізіп жатыр, деп хабарлайды Reuters дереккөздері. Тергеуге сәйкес TSMC шығарған чип Huawei компаниясының ең жаңа Ascend 910B ИИ чипімен сәйкес келеді.

Huawei 2019 жылдан бері АҚШ санкциясына іліккен. Санкцияларға сәйкес компанияға америкалық технологиялар қолданылған өнімдерді арнайы лицензиясыз жеткізуге болмайды. TSMC өндірісінде осындай технологиялар қолданылуы мүмкін. Экспорттық ережелерді бұзғаны үшін TSMC-ге екі есе көлемде айыппұл салынуы мүмкін. Бұл жағдайда айып сомасы $1 млрд-тан асып, экспорттық бақылау тарихындағы ең ірі айыппұлдардың бірі болуы ықтимал. Мысал ретінде 2023 жылы Seagate Huawei-ге $1,1 млрд сомасына қатты диск жеткізгені үшін $300 млн төледі.

Контекст

TSMC-ге қарсы тергеу 2024 жылдың күзінде басталды. Канадалық зерттеушілер Huawei-дің жаңа ИИ чипін бөлшектеп, ішінен TSMC шығарған чипті тапқан. Осыдан кейін TSMC Sophgo-ға жеткізуді тоқтатты. 2025 жылдың қаңтарында Huawei-мен байланысын жоққа шығарған Sophgo компаниясы да АҚШ санкциясына ілінді.

Акциялар жағдайы

9 сәуірде Тайвань нарығы АҚШ енгізген жаңа тарифтерге байланысты инвесторлардың алаңдаушылығы аясында құлдырауын жалғастырды. Трейдерлердің маржиналды позицияларды жаппай жабуы жағдайды ушықтырды. Taiex индексі 5,8%-ға төмендеп, соңғы 15 айдағы ең төменгі деңгейге жетті – бұл Азиядағы ең нашар нәтиже.

Технологиялық алпауыттар ең көп зардап шекті. Индекстегі ең ірі үлеске ие TSMC акциялары 3,8%-ға арзандады. Foxconn иесі Hon Hai Precision 10%-дық шекке жеткенше құлады, ал MediaTek акциялары 6%-ға жуық төмендеді. Апта басынан бері Taiex 18%-ға төмендеді – бұл Bloomberg мәліметінше 2025 жылы әлемдегі ең әлсіз негізгі индекс.

TSMC жасанды интеллекттің қарқынды өсуінен пайда көріп отырған компаниялардың бірі. Қауіптердің күшеюіне қарамастан, FactSet бақылауындағы ондаған сарапшының ешқайсысы TSMC акцияларын сатуға кеңес бермейді. Компанияның АҚШ-тағы депозитарлық қолхаттарының (ADR) орташа мақсатты бағасы $243,6 деп есептелген – бұл келесі жылы 72% өсу мүмкіндігін білдіреді.