UBS АҚШ акцияларының өсу болжамын кедендік баж салығына байланысты төмендетті

UBS 2025 жылдың соңына қарай S&P 500 индексі бойынша болжамын қайта қарап, оны 6400 пунктке дейін төмендетті. Осылайша, еуропалық инвестициялық банк Wall Street-тің жалпы үрдісіне қосылды: бұған дейін өз болжамдарын Barclays, RBC және Goldman Sachs төмендеткен болатын. Барлық банктер болжамды қайта қараудың себебі ретінде АҚШ-тың кедендік баждарының экономикаға теріс әсерін келтіреді, деп жазады Reuters.

Толығырақ

Еуропалық UBS Global Wealth Management банкі, жеке капиталды басқарумен айналысатын бөлімше, жылдың соңына қарай S&P 500 индексі бойынша мақсатты деңгейді 6600 пунктен 6400 пунктке дейін төмендетті. Жаңа болжам S&P 500 индексінің соңғы саудадағы деңгейден 12% жоғары болуын білдіреді. Банк сондай-ақ 2025 жылға арналған бір акцияға шаққандағы табыс (EPS) бойынша болжамды 270 доллардан 265 долларға дейін қысқартты.

«Саяси белгісіздіктің шокы алдағы апталарда макроэкономикалық көрсеткіштер мен корпоративтік табыстың одан әрі нашарлауына алып келуі мүмкін. Бұл АҚШ акциялары нарығындағы құбылмалылықты қысқа мерзімде сақтап қалуы мүмкін», — делінген UBS-тің бейсенбі күні жарияланған талдамалық жазбасында, оны Reuters келтіреді.

Жыл басынан бері S&P 500 кең нарық индексі 9%-дан астам құн жоғалтты (жұма күнгі 2% төмендеуді есепке ала отырып). Дегенмен UBS нарықтың қалпына келу мүмкіндігіне сенеді: банк индекс өсімі сауда саясатының айқындалуы, экономиканың тұрақты өсуі және жасанды интеллектке инвестиция салу арқылы жүзеге асады деп есептейді.

Болжамдарды кімдер төмендетті

— Wall Street-тің басты оптимистерінің бірі — Yardeni Research-тен Эд Ярдени, S&P 500 индексінің 2025 жылдағы өсуі бойынша ең жоғары болжам берген, өз болжамын 9%-ға төмендетті. Енді ол базалық сценарийде индекс 7000 емес, 6400 пунктке дейін ғана жетеді деп есептейді. Пессимистік сценарийде Ярдени S&P 500 тек 5800 пунктке дейін өседі деп санайды.

— Goldman Sachs S&P 500 индексі бойынша мақсатты болжамды 6500 пункттен 6200 пунктке дейін төмендетті. Банк кедендік баж салығына байланысты белгісіздік пен экономикалық өсу перспективаларына қатысты алаңдаушылықты атап өтті. Goldman Sachs жазғандай, хедж-фондтар нарықтағы позицияларын қысқартып жатыр, бұл негізгі индекстердің төмендеуіне ықпал етеді.

— Barclays стратегы Вену Кришна S&P 500 бойынша 2025 жылға арналған болжамын 6600 пункттен 5900 пунктке дейін төмендетті. Бұл болжам — Wall Street-тегі ең пессимистік көрсеткіш. Barclays болжамды жаһандық саудадағы шиеленістің артуымен түсіндірді.

— RBC Capital Markets-тің америкалық акциялар бойынша стратегия бөлімінің басшысы Лори Калвасина индекс бойынша жыл соңына арналған мақсатты деңгейді 6600 пункттен 6200 пунктке дейін қысқартты. «Біз индекс 10%-дан артық төмендейді деп есептемейміз, бірақ қазіргі жағдайдан желтоқсанға дейінгі жол әлдеқайда күрделі болатыны анық — қарсы жел күшейіп отыр», — деп жазды Калвасина.

Контекст

АҚШ президенті Дональд Трамп сауда соғысын бастап, елдің негізгі серіктестері үшін импортқа баж салығын енгізуді жалғастыруда. Соңғы шара — автокөлік импортына 25% баж салығы — әлемдік қаржы нарықтарында алаңдаушылық тудырды.

Wedbush Securities-тің талдаушысы Дэн Айвздің пікірінше, бұл баждар әлемдік автоөнеркәсіп үшін ауыр соққы болуы мүмкін. Ол бұл шараларды «автомобильдік Армагеддон» деп атады. Айвз жаңа баждар «абсолюттік хаос» тудырып, АҚШ-тағы көліктердің орташа құнын 5–15 мың долларға дейін арттырады деп есептейді.

«Әлемдегі әр автокөлік өндірушісі АҚШ нарығында сатылым кезінде бағаны көтеруге мәжбүр болады, — деді Айвз Bloomberg келтірген 28 наурыздағы талдаулық жазбасында. — Логистика мен жеткізу тізбегіне қатысты бұл баждардың әсерін толық түсіну қиын — бұл жаһандық және терең дестабилизацияға алып келетін шара болады».