UBS енді Ozempic өндірушісінің акцияларын сатып алуға кеңес бермей отыр
UBS талдаушысы арықтауға арналған Ozempic және Wegovy дәрілерін шығаратын Даниялық Novo Nordisk компаниясының акциялар рейтингін «сатып алудан» «бейтарапқа» дейін төмендетіп, мақсатты бағаны екі есеге жуық қысқартты. Инвестбанктің мәліметінше Novo Nordisk компаниясына АҚШ-тың басты бәсекелесі Eli Lilly мен арзан Ozempic көшірмелерін шығаратын басқа да компаниялар тарапынан қысым артып келеді. Қазір Уолл-стриттегі талдаушылардың басым бөлігі Novo акцияларына қатысты бейтарап ұстанымда.
Егжей-тегжейлі
UBS сарапшысы Мэттью Уэстон Novo Nordisk акцияларының рейтингін Buy деңгейінен Neutral деңгейіне түсіріп, мақсатты бағасын 600 кроннан 340 крона дейін төмендетті, деп хабарлайды MarketWatch. FactSet-тың мәліметінше Уэстонның жаңа бағасы компанияны қадағалап отырған барлық талдаушылар ішіндегі ең төменгілердің бірі болғанымен, 5 тамыздағы жабылу бағасымен салыстырғанда тағы 11%-ға өсу әлеуетін көрсетіп отыр.
Рейтингті қайта қарауға себеп болған факторлардың бірі — компаундерлердің, яғни дәрілік препараттардың жекелендірілген әрі арзан көшірмелерін шығаратын компаниялардың тез өсіп келе жатқаны. АҚШ-та қолданыстағы ережелер бойынша мұндай көшірмелер тек түпнұсқа дәрі тапшы болған жағдайда ғана рұқсат етіледі. Алайда UBS-тің дерегінше Hims and Hers сияқты өндірушілер бұл шектеуді айналып өтіп, өндіруді жалғастыру үстінде.
«Жекелендірілген компаундингтің бұрын-соңды болмаған ауқымына қарамастан, сарапшыларымыз жағдай өзгермейді деп есептейді: [АҚШ-тың дәрі-дәрмек реттеушісі] FDA араласуға асығар емес — себебі дәрілік бақылауға жауапты кадрлар қысқарған, әрі қазіргі таңда америкалықтар үшін айқын қауіп жоқ, — деді UBS талдаушысы MarketWatch-қа берген мәлімдемесінде. — Бұдан бөлек, араласу саяси жағынан да тиімсіз болуы мүмкін, өйткені бұл семаглутид негізіндегі препараттардың қолжетімді нұсқалары миллиондаған америкалыққа салмақ тастауға және денсаулықты жақсартуға көмектесіп жатыр».
Алайда көшірмелермен күрес — Novo Nordisk үшін жалғыз қиындық емес, дейді сарапшы. Компания Eli Lilly шығарған Mounjaro және Zepbound препараттарына нарық үлесін беріп қойып жатыр, ал медициналық сақтандыру бағдарламалары Novo өнімдерін өтемақы тізіміне енгізуге құлықсыз.
«Біздің ойымызша Ozempic бренді жоғары танымалдылығына қарамастан, өз шарықтау шегіне тым ерте жетіп қойған сияқты, бұл дәрігерлердің Mounjaro-ны әлдеқайда жылы қабылдағанын білдіреді», — деп қосты сарапшы.
Сонымен қатар, егер Трамп әкімшілігі Medicare сақтандыру жүйесі аясында Ozempic сияқты арықтауға арналған препараттарды өтемақылауға келісім берсе де, «ең тиімді мемлекет» ережесі (Most Favored Nation rule — АҚШ басқа елдер осы тауарды арзан бағада сатып алса, сол бағада сатып алуға құқылы деген сауда қағидасы. — OnInvest) бұл препараттарды АҚШ-та Еуропа бағасымен сатуға мәжбүрлеуі мүмкін. UBS сарапшысының айтуынша бұл «өнімнің құндылығын едәуір төмендетеді».
Акциялар жайлы не белгілі
5 тамыз, сейсенбі күні Копенгагендегі сауда қорытындысы бойынша Novo Nordisk акциялары 2,3%-ға төмендеп, 305,9 кронға ($47,4) дейін түсті.
Жыл басынан бері компанияның нарықтық құны шамамен 51%-ға кеміді. Салыстыру үшін айтар болсақ, дәл осы кезеңде Eli Lilly акциялары небәрі 0,8%-ға арзандаған.
29 шілде күні Novo Nordisk бір ғана сауда сессиясында нарықтық құнының шамамен 23%-ынан айырылды. Бұл — соңғы 40 жылдағы ең нашар күн болды. Инвесторлар компания акцияларын жаппай сатып жатты, себебі 2025 жылы екінші рет АҚШ-тағы сұраныстың төмендеуі, Eli Lilly-мен бәсекелестік және көшірме дәрілердің қысымы салдарынан компания сату және пайда бойынша болжамын күтпеген жерден төмендетті.
Басқа сарапшылар не дейді
MarketWatch-тың деректеріне сәйкес Novo Nordisk акцияларын қадағалайтын 32 талдаушының жартысы — 16-сы бұл қағаздарды сатып алуға кеңес береді (Buy және Overweight рейтингтері). Тағы 13 сарапшы ұстауға (Hold), ал үшеуі сатуға (Sell) кеңес береді. Уолл-стриттің Novo акцияларына қатысты консенсус мақсатты бағасы — $77,8, бұл 4 тамыздағы АҚШ-тағы жабылу бағасынан шамамен 60%-ға жоғары.
