Уолл-стрит Broadcom бағаларын ЖИ сұранысына қарай жаңартты. Акция алуға бола ма?
Сарапшылар Broadcom компаниясы жаңа ірі клиентпен 2026 жылға $10 млрд-тан асатын келісімшартқа қол қойғанын жариялағаннан кейін, чип өндірушінің акциялары бойынша бағаларын көтеріп жатыр. Компания тапсырыс берушінің атын атамады, бірақ кейбір сарапшылар оны ChatGPT жасаушысы OpenAI болуы мүмкін деп болжайды. Broadcom акциялары биылдың өзінде шамамен 50% қымбаттады, бірақ ең оптимистік болжам жасағандар өсімнің тағы үштен біріне дейін жалғасатынын айтады.
Егжей-тегжейі
Broadcom компаниясы ЖИ бөлімшесінің кірісі келесі жылы бұрынғы болжамнан да жоғары болатынын хабарлағаннан кейін, Уолл-стрит сарапшылары акция бағаларын қайта қарады. Melius Research сарапшылары ең батыл болжам жасап, мақсатты бағаны $335-тен $415-ке көтерді. Бұл кейінгі саудадағы жабылу бағасынан 36% өсуді білдіреді. Melius дерегінше, жаңа ірі клиенттің пайда болуымен Broadcom-ның ЖИ чиптерінен түсетін жылдық кірісі $40 млрд-тан асады (бұрын $30 млрд деп күтілген).
4 қыркүйекте жарияланған есептен кейін компанияның бас директоры Хок Тан 2026 қаржылық жылында, яғни қарашада басталатын кезеңде, $10 млрд-тан асатын келісімшарт арқасында кіріс өсетінін айтты.
«Өткен тоқсанда ірі клиенттердің бірі Broadcom-ға өндірістік тапсырыс берді. Енді біз 2026 қаржылық жылындағы ЖИ бөлімшеден түсетін табыс болжамы айтарлықтай жақсарады деп күтеміз», — деді Тан.
Mizuho, Cantor Fitzgerald және KeyBanc сарапшылары бұл клиент OpenAI болуы мүмкін деп санайды. Бұған дейін Financial Times дереккөздерге сүйеніп, екі компания бірлесіп чип жасап жатқанын, ол келесі жылы нарыққа шығатынын хабарлаған. OpenAI CNBC-ге бұл ақпаратқа түсініктеме беруден бас тартты.
Broadcom бұған дейін ЖИ чиптерінен түсетін табыс 2026 жылы шамамен 50–60% өседі деп болжаса, енді жаңа тапсырыс берушінің «жедел әрі айтарлықтай сұранысына» байланысты өсім бұдан да қарқынды болады деп отыр.
Mizuho сарапшылары ЖИ-бөлімшенің табыс өсімін келесі жылы 60%-дан 76%-ға дейін арттырды. Бұл жалпы кірісті $35 млрд-қа жеткізеді.
LSEG сауалнамасына қатысқан сарапшылардың болжамы бойынша, Broadcom компаниясының жалпы жылдық кірісі 2026 жылдың қазанында аяқталатын кезеңде 30% өсіп, $63,1 млрд-тан $81,8 млрд-қа жетеді.
Тағы кімдер таргетті өзгертті?
* Mizuho акция бағасын $320-дан $355-ке көтерді, «Нарықтан жоғары» рейтингін сақтап қалды. Жаңа мақсат алдыңғы жабылу бағасынан 16% өсімді білдіреді.
* Piper Sandler $315-тен $375-ке дейін көтерді, компанияның маржасының тұрақтылығын атап өтті.
* Truist $295-тен $365-ке дейін көтерді, сатып алуға кеңес берді. Олар компанияның төртінші ірі клиентін ерекше атап өтті.
* TD Cowen $355-тен $370-ке дейін өсірді, ЖИ чип өндірісіндегі серпінді атап өтті.
* Jefferies $315-тен $350-ге дейін көтерді, Buy рейтингін сақтап қалды.
* KeyBanc $330-дан $400-ге дейін көтерді. Аналитик Джон Винх ЖИ табысының жылдық өсімі 63%-ды құрағанын айтты.
* Barclays $265-тен $400-ге дейін көтеріп, «Нарықтан жоғары» бағасын қалдырды.
MarketWatch дерегінше, Уолл-стриттегі орташа мақсатты баға $337,6. 49 сарапшының 45-і Broadcom акцияларын сатып алуға кеңес береді, үшеуі ұстауға, ал біреуі сатуға шақырады.
Акциялардың реакциясы
3-тоқсандық есеп жарияланғаннан кейін Broadcom акциялары 5 қыркүйектегі саудада бір сәтте 16%-ға дейін өсіп, $356,2-ге жетті, кейін өсім 10,5%-ға баяулады.
Жыл басынан бері акциялар 45,8%-ға, ал соңғы 52 аптада 148%-ға қымбаттады.
