Viasat акциясы жыл басынан бері 335 % қымбаттады. Сарапшы неден өсу әлеуетін көрді?
Raymond James сарапшысы Брент Пендер спутниктік байланыс нарығында Илон Масктің Starlink қызметімен бәсекелесетін Viasat компаниясының қағазын сатып алуға кеңес берді. Биыл Viasat қағазы 335 % қымбаттады, алайда Пендердің айтуынша, мықты тоқсандық есеп пен қорғаныс тапсырыстарының ұлғаюынан кейін тағы шамамен 40 % өсуі мүмкін. Басты драйверлер ретінде Viasat-3 сериясындағы орбиталық спутниктердің ұшырылуы және компанияның қорғаныс бөлімшесінің жоғары әлеуеті аталады.
Егжей-тегжейлі
Raymond James инвесткомпаниясының сарапшысы Брент Пендер спутниктік байланыс операторы Viasat акциясының рейтингін «ұстау» деңгейінен «сатып алу» деңгейіне көтеріп, жаңа мақсатты бағаны – бір қағазға $52 деп белгіледі, деп хабарлады Barron’s. Бұл мақсатты баға 10 қарашадағы жабылу деңгейімен салыстырғанда шамамен 41 % өсу әлеуетін болжайды. Жыл басынан бері Viasat-тың нарықтық құны 335 % қымбаттады, ал премаркетте 11 қараша, сейсенбі күні акция тағы 4 % өсті.
«Біз соңғы алты айдағы акцияның айтарлықтай қымбаттауына және 2022 жылғы қарашадағы рейтингтің төмендетілгеннен кейінгі қиын кезеңдерге қарамастан, компанияның sum-of-the-parts (бизнесті бөліп бағалау әдісі) моделі және бірқатар катализаторлар арқасында айтарлықтай өсу әлеуеті бар деп есептейміз», – деді Пендер.
Raymond James компаниясы рейтингті Viasat-тың тоқсандық есебі жарияланғаннан бірнеше күн өткен соң көтерді. Есепке сәйкес, компанияның жылдық мәндегі табысы 2 % өсіп, $1,12 млрд-тан $1,14 млрд-қа жетті, бұл Уолл-стриттің консенсус бағалауынан сәл төмен болды, деп жазды Zack’s сарапшылары. Сонымен қатар, компанияның таза залалы өткен жылғы $137,6 млн (немесе бір акцияға $1,07) көрсеткішінен $61,4 млн-ға (немесе $0,45) дейін қысқарды. Операциялық пайда өткен жылғы $24,7 млн залалдан $35,8 млн-ға жетті, ал EBITDA көрсеткіші $375 млн-нан $385 млн-ға дейін өсті.
Басқа да сарапшылар пікірі
Simply Wall St жазуынша, Viasat-тың соңғы есебі нақты прогресті көрсетеді, дегенмен жоғары капиталдық шығындар мен жобалардың кешігуі қысқа мерзімді негізгі тәуекел болып қала береді, әсіресе ақшалай ағым мен рентабельділік тұрғысынан. Сарапшылардың бағалауынша, алдағы айлардағы басты драйвер — Viasat-3 сериясындағы спутниктерді сәтті ұшыру және белсендіру. Бұл компанияға қамту аясын кеңейтуге, кірісті арттыруға, маржиналдылықты жақсартуға және ұзақ мерзімді мақсаттарға қол жеткізу қабілетін растауға мүмкіндік береді.
Дегенмен, Simply Wall St атап өткендей, инфрақұрылымға кететін жоғары шығындар компанияның қаржылық көрсеткіштеріне қысым жасауды жалғастыруы мүмкін. Басылымның есебі бойынша, Viasat акциясының әділ құны $26,14 — бұл ағымдағы бағадан 27 % төменді құрайды.
MarketWatch дерегінше, Уолл-стрит сарапшыларының көбі Viasat қағазының әлі де өсуі мүмкін деп санайды, бірақ нарықтың бір бөлігі оларға сақтықпен қарайды. Компания акциясын қадағалайтын 8 сарапшының 4-еуі оларды сатып алуға кеңес берді. Ұстауға — 3, ал сатуға — 1 сарапшы кеңес берді.
