Walmart — жазғы фаворит: Трамп кедергі емес пе?
JPMorgan-ның пікірінше, АҚШ-тағы ең ірі бөлшек сауда желісі Дональд Трамп бастаған сауда соғысының эпицентріне түскеніне қарамастан, Walmart акциялары әлі де тартымды көрінеді. Инвестбанк Walmart акцияларының өсуін күтіп, жазға арналған үздік инвестициялық идеялардың қатарына қосты. Биыл бөлшек сауда компаниясының акциялары нарық көрсеткіштерінен асып шамамен 10% өсті.
Егжей-тегжейлі
Walmart акцияларын тұтыну секторының ең ірі «тыныш айлағы» деуге болады: бөлшек сауда компаниясының бизнесінің шамамен 70%-ы азық-түлікке тиесілі, ал тіпті дағдарыс кезеңдерінде де әдетте нарықтағы үлесін арттырып отырады, деп атап өтті JPMorgan сарапшысы Крис Хорверс.
«Walmart-тың ұзақмерзімді тарихы инвесторларды ұстап тұрады», — деп жазды ол Yahoo Finance келтірген жазбасында.
Walmart акцияларын сатып алуға кеңес берген Хорверсдің бағалауынша, алдағы 18 айда бұл қағаздар 33% қымбаттап, $130-ға дейін өсуі мүмкін. Бұл — Yahoo Finance деректері бойынша Уолл-стриттегі ең оптимистік мақсатты бағалардың бірі.
Компания есебінен кейін, 15 мамырда сарапшының таргеті $112 болған. Ал Уолл-стрит бойынша акцияларға орташа мақсатты баға — $108.
2 маусымдағы саудада Walmart акциялары бір сәтте 1,1% өсті. Соңғы 12 айда бөлшек сауда компаниясының акциялары 50%, биылғы жылдың басынан 9% қымбаттаған. АҚШ-тың кең ауқымды акциялар индексі S&P 500 — осы кезеңде 1%-дан аз ғана өсті.
JPMorgan ұсынымына ерген дұрыс па?
Walmart акцияларын бақылайтын Уолл-стриттегі сарапшылардың 90%-ы оларды сатып алуға кеңес береді, деп хабарлайды MarketWatch. 28 мамырда Wolfe Research сарапшылары Walmart акцияларының мақсатты бағасын $97-ден $112-ге дейін көтеріп, «орташа деңгейден жоғары» (Outperform) рейтингін сақтады — бұл сатып алуға ұсыныммен тең. 2 маусымда Morgan Stanley өкілі Симеон Гатман бөлшек сауда компаниясының акциялары үшін $115 деңгейіндегі мақсатты бағаны және «сатып алу» ұсынымын растады, деп жазады TipRanks. Гатманның айтуынша, бөлшек сауда компаниясы күшті нарықтық позицияға ие және тұрақты өсімге әлеуеті бар. Негізгі драйверлердің бірі — Walmart+ сервисіне жазылушылар санының сенімді артуы. Бағдарлама жылдық салыстыруда айтарлықтай өсім көрсетіп отыр, бұл жеткізу аумағын кеңейту және компанияның e-commerce бағытын дамыту стратегиясының табысты жүзеге асып жатқанын білдіреді.
Бөлшек сауда: инвестор нені білуі тиіс?
Өткен жылғы күшті өсімнен кейін Walmart акциялары 2025 жылы салыстырмалы түрде баяу қозғалып келеді: соңғы бір айда 1,3% өскен, ал S&P 500 индексі сәуірдегі минимумнан кейін 5,5% өскен, деп жазады Yahoo Finance. Акциялардың бұл баяу қарқыны бірінші тоқсанның аралас нәтижелерінен және жалпы бөлшек сауда компанияларының әлсіз есептілігінен кейін байқалды, деп атап өтті басылым.
Walmart-тың бірінші тоқсандағы сатылымы өткен жылмен салыстырғанда 2,5% өсті, бірақ бұл өсім Уолл-стрит болжамынан төмен болды. АҚШ-тағы гипермаркеттерде сатып алу санының өсу қарқыны былтырмен салыстырғанда баяулады. Компания бір акцияға шаққандағы жылдық пайда бойынша болжамын $2,5–$2,61 диапазонында сақтап қалды — бұл сарапшылар күткеннен төмен. Өткен аптада Gap, Macy’s және Best Buy секілді бөлшек сауда компаниялары Трамп әкімшілігінің баж салығына байланысты пайдаға қысым күшейетінін ескертті. Нәтижесінде нарық бұл жаңалыққа жедел әрекет етіп, сектордағы акцияларды жаппай сата бастады.
Есеп беру маусымы аяқтала келе, инвесторлар назарын макроэкономикалық жағдайға және алдағы оқу жылына дайындық аясында сауда тосқауларына экономиканың қалай бейімделетініне аударып отыр, деп жазады Yahoo Finance.
Экономикалық сигналдар әлі де айқын емес болып отыр, деп жазады басылым. Бір жағынан, Мичиган университетінің тұтынушылық көңіл-күй индексі мамыр айының екінші жартысында 50,8-ден 52,2-ге дейін көтерілді — бұл өткен жылмен салыстырғанда 25% төмен. Екінші жағынан, Экономикалық талдау бюросының қайта қаралған деректеріне сәйкес, АҚШ-тың ЖІӨ-сі бірінші тоқсанда жылдық есептеумен 0,2% қысқарды — бұл 2022 жылдан бергі алғашқы төмендеу.
