Жеке инвесторлар 2020 жылдан бері акцияларды ең жылдам қарқынмен сатып алуда — Ситадел

Нарық құлдырау кезінде акцияларды сатып алу стратегиясы 2026 жылдың алғашқы жартысында бөлшек саудагерлердің басты таңдауына айналды: жеке инвесторлар жеңілдікпен сатылған активтерді рекордтық қарқынмен сатып алды. Бұл туралы Citadel Securities компаниясының басқарушы директоры әрі аға техникалық стратегі Скотт Рубнер хабарлады. Оның сөзін Bloomberg келтіреді.

S&P 500 индексі төмендеген күндері бөлшек инвесторлар күнделікті орташа көрсеткіштен шамамен үш жарым есе көп көлемде сатып алды. Bloomberg мәліметінше, Citadel бұл деректерді есептей бастаған 2020 жылдан бері мұндай белсенділік деңгейі ең жоғары болып, 2021 жылы «мем-акциялар» бумы кезінде орнатылған алдыңғы рекордты басып озды.

Мамыр мен маусым айлары Citadel Securities компаниясының ай сайынғы бөлшек сауда белсенділігі бойынша рекорд орнатты: компанияның барлық бақылау тарихындағы ең қарбалас тоғыз сауда күні осы кезеңде тіркелді. Олардың жетісі маусым айында өтті. Рубнердің айтуынша, Citadel деректерді есептей бастағаннан бері осы ай бөлшек инвесторлар үшін ең мықты ай болуы мүмкін. Бір күндегі ең жоғары таза сатып алу көлемі 12 маусымда тіркелді, сол кезде рекордтық IPO-дан кейін Илон Масктың SpaceX акцияларымен сауда басталды.

«Жеке инвесторлардың қатысуы циклдық құбылыстан заманауи нарықтардың құрылымдық ерекшелігіне айналып, бүкіл АҚШ акциялар нарығында тұрақты сұраныс көзіне айналды», - деді стратег.

Рубнер қазіргі бөлшек саудадағы белсенділіктің өсуі компания байқаған бұрынғы кезеңдерден өзгеше екенін атап өтті. Алдыңғы жылдарға қарағанда бөлшек инвесторлар эталондық индексті анықтайтын секторларға, соның ішінде жартылай өткізгіштерге және биржада саудаланатын инвестициялық қорларға (ETF) барған сайын көбірек назар аударуда.

Тек маусым айында бөлшек саудагерлер күн сайын шамамен 1,9 миллиард долларлық жартылай өткізгіш опцион премияларымен сауда жасады — бұл тарихи орташа көрсеткіштен алты есе көп, — осы белсенділіктің шамамен 75 пайызы call опцияларына (бағаның өсуін күту мақсатында белгіленген бағамен активті сатып алу құқығын беретін келісімшарттарға) шоғырланған, – деді стратег.

Биыл бөлшек инвесторлар S&P 500 индексінің өсу кезеңдерінде де акциялар нарығына ақша құюды жалғастырып, сауда көлемдерін күнделікті орташа көрсеткіштің шамамен бір жарым есесіне дейін жеткізді. Агенттіктің мәліметінше, Таяу Шығыстағы соғыстан туындаған белгісіздік пен пайыздық мөлшерлемелерге қатысты анықсыздыққа қарамастан, индекстің өзі наурыздағы ең төменгі деңгейінен шамамен 17 пайызға өсті.

17 маусымда АҚШ Федералдық резерв жүйесі пайыздық мөлшерлемені өзгеріссіз қалдырды, алайда басқарма мүшелерінің болашақ бағыты жөніндегі пікірлері бөлінді: тоғызы жыл соңына дейін кемінде бір рет мөлшерлеменің өсетінін болжады, ал қалған тоғызы мөлшерлеменің өзгеріссіз қалатынын немесе төмендейтінін күтеді.