Инвесторлар үміті АҚШ пен Қытай арасындағы келіссөздерге қатысты жаңалықтан қуат алды

АҚШ-тағы негізгі қор индекстерінің маусымдық фьючерстері 16 сәуір күні сессиялық минимумдардан жоғары көтерілді. Бұған Bloomberg агенттігінің Қытай сауда келіссөздеріне белгілі бір шарттармен дайын екенін хабарлауы себеп болды. Агенттіктің жазуынша Пекин Ақ үйден көбірек құрмет, америкалық санкциялар мен Тайвань мәселесін талқылауға дайындықты талап етуде. Дегенмен, бұл жаңалықтан туған оптимизм ұзаққа созылған жоқ — Nvidia компаниясының Қытай нарығындағы қиындықтары фьючерстерді қайтадан төмен қарай тартты.

Толығырақ

S&P 500 индексіне арналған маусымдық фьючерстер құлдырауын 1,6%-дан 0,4%-ға дейін қысқартты. Технологиялық NASDAQ-100 индексі 2,4%-дан 1,4%-ға дейін қалпына келді. Ал Dow Jones Industrial Average («көк чиптер» индексі) бойынша фьючерстер таңертеңгі шығынды дерлік толығымен жапты. Бұл өзгерістердің себебі — Bloomberg агенттігінің Қытай мен АҚШ арасында кедендік баж мәселесі бойынша келіссөздер жүргізілуі мүмкін деген хабары, деп жазады MarketWatch.

Юань долларға қатысты 0,2%-ға нығайды. Қытайдың экономикалық серіктес валютасы ретінде саналатын австралиялық доллар 0,5%-ға өсті.

Алайда осы өсімнен кейін нарықтағы фьючерстердің қозғалысы қайта баяулай бастады. Мысалы, S&P 500 фьючерстері -0,7%-ға дейін, Dow -0,1%-ға дейін төмендеді. CNBC жазуынша, инвесторлар Nvidia компаниясының экспорттық шектеулерге байланысты 5,5 млрд доллар көлемінде шығын жазатыны жөніндегі ескертуінен кейін нарықтың келешегін қайта бағамдап жатыр.

Қытай нені қалайды

Bloomberg агенттігіне сұхбат берген Қытай басшылығының ұстанымымен таныс дереккөздің айтуынша Пекин Дональд Трамп әкімшілігімен сауда келіссөздерін жүргізуге дайын, бірақ бұл үшін бірнеше шарт орындалуы қажет. Атап айтқанда, қытайлық тарап АҚШ шенеуніктерінің жария сөздерінде ұстамдылық танытып, өз елін «құрметпен» қарағанын қалайды.

Трамптың ҚХР төрағасы Си Цзиньпинге қатысты риторикасы жұмсақ болғанымен, оның Ақ үйдегі командасы әлдеқайда қатаң мәлімдемелер жасап отыр. Бұл Вашингтонның шынайы ұстанымына қатысты Пекинде күмән тудырып жатыр, деп жазады Bloomberg. Дереккөздің айтуынша қазір Қытай басшылығы Трамп өз командасын толық бақылайтынына сенімді. Сондықтан президент өз кеңесшілерінің өткір мәлімдемелерінен ашық түрде бас тартпаса, ол сөздер Трамптың жеке ұстанымы ретінде қабылданады. Мысал ретінде, АҚШ вице-президенті Джей Ди Вэнстің «қытайлық шаруалар» туралы айтқандары Қытайда үлкен наразылық туғызды. ҚХР СІМ өкілі Линь Цзянь бұл сөздерді «надан әрі қорлайтын» деп атады. Bloomberg атап өткендей, Қытай шенеуніктері АҚШ көшбасшыларын әдетте тікелей сынамайды.

Қытай ұсынған басқа да шарттар қатарында — АҚШ-тың келіссөздерде бірізді болуы, Қытай үшін маңызды мәселелерді (мысалы, санкциялар мен Тайваньға қатысты жағдайды) талқылауға дайын екендігін көрсетуі. Сонымен қатар, Пекин АҚШ тарапынан келіссөздерге президенттің тікелей қолдауына ие өкіл тағайындалуын қалайды. Бұл тұлға Трамп пен Си Цзиньпиннің жеке кездесуі барысында қол қойылуы мүмкін келісімді алдын ала әзірлеуі тиіс.

Контекст

Трамп президенттік қызметін бастаған сәттен Қытайға қатысты қатаң сауда саясатын ұстанып келеді. Бүгінде Қытайдан келетін импортқа салынған АҚШ-тың жиынтық кедендік баж салығы 145%-ға дейін жеткен. Бұл Қытайда қарсы шараларды қолдауға бағытталған қоғамдық пікірді нығайтты. Осы фактор Си Цзиньпинге Трамптың ашық келіссөзге шақыруына бірден жауап бермеуге және уақытша ымырасыз ұстанымды сақтауға саяси мүмкіндік беріп отыр.