«Оны жұмыстан босату ойымда жоқ»: Трамп ФРЖ басшысы Пауэллге қатысты көзқарасын айтты
Дональд Трамп АҚШ Федералдық резерв жүйесінің төрағасы Джером Пауэллді қызметінен босатуды жоспарламайтынын мәлімдеді. Ол пайыздық мөлшерлемелерді төмендетуді қалайтынын айтқанымен, Пауэлл бұған бармаса да, бұл «соңы емес» деді. Бұған дейін Трамп Пауэллді «үлкен сәтсіздік» деп атап, оның отставкасын асыға күтетінін жазған болатын.
Толығырақ
«Мен оны [Пауэллді] қызметінен босатқым келмейді. Мен оның пайыздық мөлшерлемелерді азайтуға қатысты белсендірек болғанын қалаймын. Қазір — мөлшерлемелерді төмендетуге ең қолайлы уақыт. Егер ол мұны жасамаса, бұл соңы бола ма? Жоқ», — деді Трамп X әлеуметтік желісінде жарияланған видеода. Бұл жазбаны Ақ үйге жақын Rapid Response 47 аккаунты жариялаған.
Нарықтар бұл мәлімдемеге оң көзқараспен жауап берді: S&P 500 индексінің фьючерстері 2%-ға, технологиялық Nasdaq Composite — шамамен 2,3%-ға, ал Dow Jones — 1,7%-ға өсті.
Трамптың сыны
MarketWatch басылымының жазуынша Трамп Пауэллге қатысты риторикасын жұмсартып, енді оны достық сипатта сынай бастады. Дегенмен, бұған дейін, 21 сәуірде Truth Social желісіндегі жазбасында Трамп Пауэллді «Мистер «тым кеш», үлкен сәтсіздік» деп атады және оның әрекеттерінің кеш екенін айтып, мөлшерлемелерді шұғыл төмендетуді талап етті. Ол Еуропалық орталық банктің мөлшерлемелерді жеті рет төмендеткенін мысалға келтірді.
Бұл — Трамптың бір апта ішінде Пауэллге бағыттаған екінші эмоционалды сыны еді. 17 сәуірде ол Truth Social желісінде Пауэллдің қызметінен кеткенін күтіп жүргенін жазды. Бұл жазбада оның нақты не айтқысы келгені — Пауэллді орнынан босату ма, әлде оның өкілеттігі мерзімінің аяқталуын күту ме — түсініксіз болды.
The Wall Street Journal газетінің деректеріне сәйкес Трамп өзінің жақын ортасында Пауэллді мерзімінен бұрын жұмыстан босатуды талқылаған. Кейінірек президенттің экономикалық кеңесшісі Кевин Хассетт бұл ақпаратты растады: оның айтуынша Трамп командасымен бірге Пауэллді қызметінен алу мүмкіндігін зерттеуде.
Ал Пауэлл өз кезегінде АҚШ заңнамасы президентке ФРЖ басшысын жұмыстан босатуға құқық бермейтінін және ол Трамп сұраса да, қызметінен кетпейтінін айтқан. Ол өзінің өкілеттігін 2026 жылғы мамырға дейін атқаратынын мәлімдеді. Айта кетейік, Пауэллді бұл қызметке алғаш рет дәл Трамптың өзі ұсынған.
Контекст
ФРЖ Пауэллдің басшылығымен пайыздық мөлшерлемелерді төмендетуге асығар емес. Сәуір айының басында Федералдық резерв жүйесінің төрағасы Трамп енгізген импорттық тарифтер инфляцияның өсуіне және экономикалық өсімнің баяулауына әкелетінін мәлімдеді. Сондықтан ФРЖ мөлшерлемелерді төмендету туралы шешімді жаңа сауда шектеулерінің салдарын толық түсінген соң ғана қабылдайтынын айтты. Сәуірдің ортасында Пауэлл Трамп жариялаған тарифтердің «күткендегіден әлдеқайда жоғары» екенін, сондықтан олардың экономикалық салдары да айтарлықтай болатынын атап өтті.
Трамптың Пауэллге бағыттаған шабуылдары Уолл-стритте алаңдаушылық туғызып, акциялардың құлдырауына әкелді. Инвесторлар ФРЖ-ның тәуелсіздігіне төнетін қауіптен қауіптенеді. Evercore ISI вице-президенті Кришна Гуханың айтуынша, егер Трамп Пауэллді орнынан алуға тырысса, бұл АҚШ қор нарығында жаппай сату толқынын тудыруы мүмкін. Ал Oversea-Chinese Banking Corp валюталық стратегы Кристофер Вонг Федрезерв беделіне күмән туа қалса, бұл долларға деген сенімді айтарлықтай әлсіретуі мүмкін екенін ескертті.
