АҚШ доллары алғашқы 100 күнде 50 жыл ішіндегі ең үлкен құлдырауды бастан кешті
АҚШ долларының индексі жаңа сауда кедергілері, инвесторлардың ағынының азаюы, америкалық институттарға деген сенімнің әлсіреуі және рецессияға қатысты алаңдаушылықтың күшеюі аясында соңғы 50 жылдағы президенттік мерзімнің ең әлсіз бастамасын тіркеуге жақын, деп хабарлады Bloomberg. Дональд Трамптың Ақ үйге қайта оралған алғашқы 100 күнінде доллар басқа валюталарға қатысты 9%-ға әлсіреді.
Толығырақ
Bloomberg деректері бойынша 20 қаңтардан (Трамптың инаугурациясы) 25 сәуірге дейін АҚШ долларының индексі шамамен 9%-ға төмендеген. Егер бұл үрдіс сақталса, бұл 1973 жылдан бері — яғни Ричард Никсонның екінші мерзімінің басталған кезінен бері — жаңа президенттің алғашқы 100 күніндегі доллардың ең ірі құлдырауы болады. Сол жылы АҚШ алтын стандартына негізделген валюта жүйесінен бас тартып, еркін өзгермелі валюта бағамына көшкен болатын.
Алайда соңғы ондаған жылдарда АҚШ президентінің алғашқы 100 күні, керісінше, доллардың нығаюымен қатар жүретін еді, деп жазады Bloomberg. Мысалы, 1973 жылдан бастап 2021 жылға дейін — яғни Никсонның екінші мерзімі мен Джо Байденнің қызметке келуі аралығында — доллар орта есеппен 0,9%-ға нығайған.
Трамп өзінің екінші мерзімінің басында сайлауалды уәделерін белсенді іске асырып: жаңа баж салығын енгізді, Қытай мен АҚШ-тың басқа да сауда әріптестеріне қарсы риториканы күшейтті. Бірақ бұл шаралар инвесторлардың америкалық активтерден кетуіне себеп болып, долларды әлсіретті және еуро, швейцариялық франк пен жапон иенасы сияқты басқа валюталардың нығаюына жол ашты — олардың әрқайсысы инаугурациядан бері 8%-дан астамға қымбаттады.
Сарапшылар не дейді
BMO Global Asset Management басқарушы директоры Бипан Рай Bloomberg-ке берген түсініктемесінде: «АҚШ долларының ғаламдық басымдығы мен халықаралық сауда және қаржыдағы рөлі американдық институттарға деген терең сенімге, сауда мен капитал ағындарындағы төмен кедергілерге және болжамды сыртқы саясатқа негізделген еді. Қазір біз осы ірге тастардың әлсіреуінің айқын белгілерін көрудеміз. Бұл әлемдік активтерді бөлу трендтерінің доллардың пайдасына емес өзгеріп жатқанын көрсетеді. Бұл құрылымдық өзгеріс», — деді.
АҚШ-тың сауда саясатының белгісіздігі және рецессия қаупі аясында ірі инвестициялық банктер де доллар өсіміне қатысты болжамдарын нашарлатуда. Мәселен, UBS сәуір айында екі рет өз болжамдарын төмендетті. Банк бұл шешімді АҚШ пен Қытай арасындағы сауда қақтығысының өрбуіне байланысты доллар бағамының одан әрі қозғалысы тәуелді болатынымен түсіндірді, ал соңғы апталарда бұл бағытта айтарлықтай прогресс байқалмай отыр.
Deutsche Bank та доллардың құрылымдық құлдырау қаупі туралы ескертіп, америкалық валютаның еуроға қатысты соңғы онжылдықтағы ең төменгі деңгейге дейін құлдырау мүмкіндігін болжаған болатын.
