CNBC Трамп президент болған бастапқы 100 күнде үздік және ең әлсіз акцияларды атады
АҚШ президенті қызметіне
кіріскен сәттен бастап ең көп құн
жоғалтқан акциялар – Deckers, Tesla, Delta және
United компанияларының құнды қағаздары.
Ал ең үздік нәтиже көрсеткен акциялар
қатарына Palantir, Netflix, Philip Morris және AT&T
кірді.
Дональд Трамптың сауда
тарифтерін енгізу және федералдық
шығыстарды қысқарту жоспарлары нарықта
алаңдаушылық туғызып, соның салдарынан
S&P 500 индексі 1970-жылдардағы Ричард
Никсон кезінен бергі ең нашар президенттік
бастама көрсеткішіне жақындады. CNBC осы
индекске кіретін акциялардың динамикасын
зерттеп, Трамп Ақ үйге қайта оралғаннан
кейінгі алғашқы 100 күн ішінде қай акциялар
жақсы, ал қайсысы нашар нәтиже көрсеткенін
анықтады. Есептеулер 17 қаңтардағы,
инаугурация алдындағы соңғы сауда
күнінің жабылу бағалары негізінде
жүргізілді.
Ең көп құн жоғалтқан
акциялар
Инаугурациядан кейін
ең көп арзандаған — аяқ киім өндіруші
Deckers Outdoor компаниясының акциялары. Олар
48%-ға құлдырады. Ugg пен Hoka брендтерінің
иесі инвесторлар қорқынышының астында
қалды. Өйткені инвесторлар импорттық
тарифтер пайдасын азайтады деген үреймен
отыр. Evercore сарапшысы Джесалин Вонгтың
айтуынша, Deckers өндірісінің негізгі
бөлігі Қытай мен Вьетнамда шоғырланған.
Дегенмен Wall Street сарапшылары компанияның
қайта қалпына келуін күтуде. LSEG дерегіне
сүйенсек, көпшілік сарапшы Deckers акцияларын
сатып алуға кеңес береді, ал орташа
мақсатты баға акциялардың 67%-ға өсу
мүмкіндігін көрсетеді.
Tesla компаниясының
нарықтық құны алғашқы 100 күнде шамамен
үштен бірге азайды. Бұған сауда тарифтері
ғана емес, Илона Масктың Трамп
әкімшілігіндегі белсенділігіне қарсы
наразылықтар да әсер етті. Сондай-ақ,
Масктың Германияның оңшыл «Альтернатива»
партиясына қолдау білдіруі тұтынушылардың
наразылығын күшейте түсті. Baird сарапшысы
Бен Каллоның айтуынша, тұтынушылар
көліктеріне зақым келуі мүмкін деп
қауіптенеді. Сондықтан Tesla сатып алудан
бас тартуы ықтимал. LSEG сауалнамасына
қатысқан сарапшылардың көбі Tesla акцияларын
сатып алуға кеңес береді, бірақ олардың
орташа болжамы бойынша, бір жыл ішінде
акция бағасы айтарлықтай өзгермейді.
Сондай-ақ, ең көп
арзандағандар қатарына Delta және United
Airlines әуе компанияларының акциялары
кірді. Олар 36%-дан астам құнын жоғалтты.
Тұтынушылар сенімінің әлсіреуі
инвесторларда әуе тасымалдау саласы
рецессиядан аман қала ала ма деген күмән
туғызды. Әуе тасымалына сұраныс жылдың
екінші жартысында әлсіреуі мүмкін, ал
компаниялар брондауды ынталандыру үшін
жеңілдіктерге жүгінуге мәжбүр. Сонымен
бірге, мемлекеттік және корпоративтік
шығындардың қысқаруынан іссапарлар
көлемі де азаюы ықтимал. Алайда сарапшылар
оптимизмді сақтап отыр. LSEG мәліметінше,
Delta мен United акцияларының мақсатты
бағаларының 30%-дан аса алатын әлеуеті
бар.
Ең табысты акциялар
Ең үлкен өсім Palantir
жасанды интеллект бағдарламалық
жасақтама компаниясының акцияларына
тиесілі. О лардың құны 57%-дан астам өсті.
Алайда сарапшылар бұл өсімге сақтықпен
қарайды: LSEG дерегі бойынша, Palantir акцияларын
негізінен «ұстап тұру» ұсынылады
және келесі жылы олардың құны 18%-ға
төмендеуі мүмкін.
Netflix акциялары
инаугурациядан кейін 28%-дан астам өсті.
28 сәуірде компания акциялары өз
тарихындағы ең жоғары деңгейге жетті.
Netflix бизнесі тарифтік қысымнан жақсы
қорғалған. Компания басшылығы экономикалық
қиындықтар кезінде тұтынушылар кинотеатр
мен мейрамхана орнына стриминг қызметтерін
таңдайды деп санайды. Дегенмен, сарапшылар
Netflix акцияларының әрі қарай қарқынды
өсуін күтпейді: болжам бойынша, келесі
жылы баға тек 2%-ға ғана өседі.
CNBC атап өткендей,
жеңімпаздар қатарына «қорғаныс активтері»
саналатын акциялар да кірді. Мысалы,
Philip Morris темекі компаниясының акциялары
40%-ға қымбаттаса, AT&T телекоммуникация
алыбының акциялары 20%-дан астам өсті.
Екі компанияның акциялары бойынша да
сарапшылар көбіне сатып алуға кеңес
береді. Орташа мақсатты бағалар Philip
Morris үшін шамамен 2%-ға, ал AT&T үшін
3,6%-ға өсу мүмкіндігін болжайды.
