Ақ үй Amazon-ды сынға алды: акциялары құлдырады
29 сәуірде Amazon акциялары премаркеттегі аздаған өсімді жоғалтып, негізгі сессияда 2,5%-ға төмендеді. Сауда сессиясының басында құн 1,9%-ға түсті. Бұл АҚШ Ақ үйінің Amazon-ды қатаң сынға алғанынан кейін болды, деп хабарлайды CNBC.
Президенттің баспасөз хатшысы Кэролайн Левитт Amazon-ның сайтында тауар бағасының қасында Трамп енгізген кедендік баж салығының үлесін көрсету жоспарын қатаң сынға алды. Бұл жоспарды Punchbowl News өз дереккөздеріне сілтеме жасап жазған болатын.
«Бұл — Amazon тарапынан дұшпандық әрі саяси әрекет», — деді Ақ үй өкілі баспасөз мәслихатында. Оның айтуынша ол бұл жағдайды президентпен телефон арқылы талқылаған.
«Amazon Байден әкімшілігі кезінде инфляция соңғы 40 жылдағы ең жоғары деңгейге жеткенде неге осындай қадам жасамады?» — деп сұрады Левитт. — «Бұл әрекет мені қатты таң қадырып отырған жоқ, өйткені жақында Reuters хабарлағандай, Amazon қытайлық үгіт-насихатпен қызметтес болған. Сондықтан америкалықтар өз өнімдерін сатып алуы керек», — деді ол. Осы сөздерді айтқанда, баспасөз хатшысы Amazon компаниясының 2021 жылғы желтоқсанда ҚХР басшысы Си Цзиньпиннің сөздерін өз сайтында жариялағаны туралы мақала көшірмесін көрсетті.
Журналистер Amazon басшысы Джефф Безос Трампты әлі де қолдай ма деген сұрағына Левитт жауап беруден бас тартты. CNBC Amazon-нан ресми түсініктеме ала алмады.
