Еуроаймақ экономикасы бірінші тоқсанда болжамнан жоғары өсті
Еуроаймақтың ЖІӨ өсімі 2025 жылдың алғашқы тоқсанында сарапшылар күткеннен жоғары болды. Бұл – жаһандық сауда соғысына байланысты белгісіздікке қарамастан тіркелген оң нәтиже. Қазіргі уақытта ЕО-дан АҚШ-қа жеткізілетін тауарларға 10% кедендік баж күшіне енген, ал Брюссель мен Вашингтон арасындағы келіссөздер сәтсіз болса, бұл көрсеткіш 20%-ға дейін көтерілуі мүмкін.
Толығырақ
2025 жылдың бірінші тоқсанында еуроаймақтың экономикасы алдыңғы тоқсанмен салыстырғанда 0,4%-ға өсті, деп хабарлады сәрсенбі күні Еуростат. Reuters сауалнамасына қатысқан экономистер бар болғаны 0,2% өсім күткен еді. 2024 жылдың соңғы тоқсанында аймақтың экономикасы дәл осындай – 0,2% өсімді көрсеткен.
Еуроаймақтың ірі елдеріндегі өсім күткендей болды. Германияның ЖІӨ 0,2%-ға, Францияда – 0,1%-ға, Италияда – 0,3%-ға өсті. Reuters сарапшылары Италияда 0,2% өсім ғана болады деп болжаған.
Еуропадағы ең ірі экономика – Германия ұзақ уақыт бойы әлсіз жағдайда болды: соңғы екі жылда оның ЖІӨ әр тоқсанда не өсіп, не қысқарып отырған, деп жазады CNBC. Ал Франциядағы баяу өсім ішкі сұраныс пен сыртқы саудадағы әлсіздікпен байланысты болды. Дегенмен, бұл әлсіздік компаниялардың қоймадағы қорларын қалпына келтіру арқылы біршама өтелген, деп хабарлады Reuters INSEE дерегіне сілтеме жасап.
Испания мен Литва ең жоғары нәтиже көрсетті — екі елде де ЖІӨ 0,6%-ға артты. Ал Ирландия экономикасы 3,2%-ға өсті. CNBC атап өткендей, бұл елдің көрсеткіштері жиі құбылмалы болады, себебі мұнда трансұлттық корпорациялардың үлесі жоғары.
Контекст
2023 және 2024 жылдардың көп бөлігінде еуроаймақтағы экономикалық өсім әлсіз болды. Бұл Еуропалық орталық банкі (ЕОБ) негізгі пайыздық мөлшерлемені бірнеше рет төмендетіп, экономикалық белсенділікті ынталандыруға тырысқанына қарамастан орын алды, деп жазады CNBC. Қазіргі таңда депозиттік мөлшерлеме — яғни ЕОБ-ның негізгі көрсеткіші — 2023 жылдың ортасындағы шарықтау шегі 4%-дан 2,25%-ға дейін төмендеді.
Наурыз айында ЕОБ 2025 жылы еуроаймақ экономикасы 0,9%-ға өседі деп болжаған болатын. Бұл – қаңтардағы болжамнан сәл төмен, деп ескертеді CNBC. Жаңартылған экономикалық болжам маусым айында жарияланады.
Халықаралық валюта қоры (ХВҚ) өткен аптада еуроаймақтың 2025 жылға арналған ЖІӨ өсімі бойынша болжамын 1%-дан 0,8%-ға дейін төмендетті.
Осы орайда еуроаймақтағы инфляция ЕОБ белгілеген 2%-дық мақсатқа жақындап қалды: наурыз айында ол 2,2%-ға жетті. Жаңа мәліметтер осы аптада жарияланады деп күтілуде.
